ဇာတ်လမ်းအကျဉ်း

ပက်ကြားအက် မြေပြင် (၁၅မိနစ်)၊
ကြက်ခြေခတ်အပြည့် စာမျက်နှာများ
တစ်ရွက်ပြီးတစ်ရွက်ကျ (၁၅မိနစ်)၊
မီးတောက်မီးလျံများ (၅မိနစ်)၊
ကြက်ခြေခတ်အပြည့် စာမျက်နှာများ ပြာ အဖြစ်ပြောင်းသွား (၅မိနစ်)၊
မီးသင့် ပက်ကြားအက် မြေပြင်ပေါ် ပြန့်ကျဲနေသော စက္ကူပြာများ (၅မိနစ်)၊
နောက်ခံတေးဂီတ - ဟစ္စတီးရီးရ ရယ်သံ ၊ မွန်းလိုက်ဆိုနာတာ၊ နဂါးနီ (၁၅မိနစ်စီ)။

သီဟသူ
၃-၄၊ ၆၊ ၂၀၁၃

နှစ်ထောင့်တစ်ဆယ့်သုံး

ဧပြီ
----

တစ်စက္ကန့် မှ တစ်စက္ကန့်
ကူးပြောင်းဖို့ ကြာမြင့်ပုံ
နေ့ရက်များ မြန်မြန်ဆန်ဆန်
ကူးပြောင်းသွားပုံ
အားလုံး ပုံမှန်အတိုင်း
ပုံမမှန်တဲ့ စိတ်နဲ့
မှန်ပုံမပေါ်တော့တဲ့ အမှန်တရား
ဒီနွေမှာ
ငါ့လှေငါထိုး ဘယ်ပဲရောက်ရောက်
ကိုယ့်တရားနဲ့ ကိုယ်ဖြေပါတယ်
နေတတ်တတ်
မနေတတ်တတ်
ကျေနပ်ဖို့ပါပဲ။

သီဟသူ
၀၄-၀၅-၂၀၁၃

နှစ်သစ်ကူး ဆုံးဖြတ်ချက်များ

ဘယ်နေရာမှာ ဒီအချိုးအကွေ့မှားတွေကို ပြုလုပ်မိခဲ့သလဲ*

၂၀၁၂-၁၃

ဘယ်နေရာက လိပ်ပြာတွေအတောင်ခတ်လို့ ဒီစမ္ပါနဂိုရ်က နွားမပေါင်ပဲ

လာ လာ ကျိုးနေရတာလဲ

၁၃၇၄-၇၄

မသိခြင်းဟာ ကောင်းချီးပေးခံရခြင်းပဲ (သုံးကြိမ်ရွတ်)

ဘုရားသခင် သိတော်မူ၏

သို့သော်

သို့သော်..

သို့သော်...

ကိန်းဂဏန်းများ အသက်ကိုစား၏

ခရစ်သက္ကရာဇ်၊ ကောဇာသက္ကရာဇ်များ

မေ့လျော့ခြင်း မြစ်အတွင်း

အကြိမ်ကြိမ် ရေချိုးဆင်းကာ

အချိုးအကွေ့မှားများ ဆက်လက်ပြုလုပ်ရန်

တေးမှတ်ထားဆဲ

သီဟသူ

ကောဇာသက္ကရာဇ် ၁၃၇၅ပြည့်နှစ် တခူးလဆန်း ၇ရက်

*Stephen Dobyns ၏ Lost ကဗျာမှ စာသား

နှစ်ထောင့်တစ်ဆယ့်သုံး

မတ်

---

၁ မှ ၃၁

မနက် ၈ မှ ည ၅

လမ်းပေါ်မှာက ၁၀ နာရီ ၄၀ မိနစ် ၄ စက္ကန့် ၊ ၆၄ ဒသမ ၅၅ မိုင်

ရှင်းလင်းချက် မပါဘဲ နားမလည်နိုင်ရင်

ရှင်းပြလည်း နားလည်မှာ မဟုတ်*

ရွှေ ဝတ္ထုများ

အမြန်သွား လမ်းမကြီးပေါ်က ဘီယာပုလင်းတွေတင်လာတဲ့ကားတစ်စီးရဲ့

ကြေကွဲဖွယ် ဖြစ်ရပ်မှန် ဇာတ်လမ်း

ပိုက်ဆံအတွက် မဟုတ်။ အသိပေးခြင်းသာဖြစ်။

အရာအားလုံး လောင်ကျွမ်း**

သီဟသူ

၁၂-၀၄-၂၀၁၃

* ဉီးကာဝါန ပြောစကား

** လူရွှင်တော် ပြောစကား`

ပုံဖျက်ခြင်း

သဘာဝရဲ့ ရွေးချယ်မှု။ အားကြီးသူတို့သာ ရှင်ကျန်မယ့်

တောရဲ့ ဥပဒေသ။ ပြောင်းလဲနေမှု။ ရောနှောပေါင်းစည်းမှု။

မျဉ်းဖြောင့် အချိန်။ မျဉ်းပြိုင် ဆင့်ကဲဖြစ်စဉ်။ ဒိုင်နိုဆောများ။

သဘာဝက ရွေးချယ်ခဲ့တာလား။

ဒိုင်နိုဆောများ ခေါင်းမာခဲ့တာလား။

အခြားတစ်ခုခုအဖြစ် ဆင့်ကဲ ပြောင်းလဲသွားတာလား။

ရှင်ကျန်ဖို့လား၊ ရှင်သန်ဖို့လား။

ဒါဝင်မပြောလည်း ရွေးချယ်ခဲ့တယ်။ မိမိတို့ အမှတ်အသား။

နေမလား၊ သေမလား။

ကွန်မန်ဒိုဇာတ်ကားတွေ ကြိုက်လား။

သီဟသူ

၃၊ ၄၊ ၂၀၁၃

တယ်လီဖုန်းစကား

အကွာအဝေး မိုင်တိုင်များ

တယ်လီဖုန်း တိုင်များ

လေလှိုင်းမှ တဆင့်

ကြေးနန်းကြိုးများမှ တဆင့်

အားလုံးပဲ အဆင်ပြေကြောင်း

သား ပျော်ရဲ့လား အမေးမှာ

ဆွံ့ အ သွား

အားလုံးပဲ အဆင်ပြေပါကြောင်း

သီဟသူ

၂၇၊ ၀၃၊ ၂၀၁၃

နှစ်ထောင့်တစ်ဆယ့်သုံး

ဇန်နဝါရီ

-----

ပြန်ခေါ်ကြည့်တော့

မှတ်ဉာဏ်မှာ ဘာမှ မကျန်ခဲ့၊

အလင်း အမှောင် ပုံရိပ်များသာ (MB အချို့)

ကျန်ရစ်ခဲ့။

ငါ့ ဓါတ်ပုံများ -

ဒါကြောင့် ငါဖြစ်သည်။

ဖေဖေါ်ဝါရီ

------

ပြည်ထောင်စုနေ့၊ ဗိုလ်ချုပ်မွေးနေ့ -

ကလေးများနေ့၊

ချစ်သူများနေ့၊

အဖေ့မွေးနေ့၊ အစ်မမွေးနေ့၊

တရုတ်နှစ်ကူးနေ့၊

တစ်နေ့

ပြီး

တစ်နေ့

ဒီ ကွန်ပျူတာ ဖန်သားပြင်ရှေ့။

သီဟသူ

၂၀-၀၂-၂၀၁၃

စနေ နေ့တစ်ဝက် (၁၈)

ဒီစနေဟာ ၂၀၁၂ ရဲ့ နောက်ဆုံး စနေ

အဲ ဒီ တော့ ?

ထူးခြားမသွားပါဘူး

မထူးခြားတော့ပါဘူး

ဒီလိုနဲ့ ၂၀၁၃ ရောက်လာ

မိတ်ဆွေများ

ဟက်ပီးနျူးရီးယားပါခင်ဗျာ။ ။

သီဟသူ

၂၉၊ ၁၂၊ ၂၀၁၂

နိဂုံး ၏ နောက်ဆက်တွဲ

ရေမြွေတစ်ကောင်လို နေနိုင်ခဲ့ရင်တော့ အကောင်းသား

မိကျောင်းတစ်ကောင်ဖြစ်နေတာက ခက်တယ်။

လောလောဆယ် နေ့ရက်တွေကတော့

ဗွက်အိုင်တွေထဲမှာပါပဲ

ဒါတောင်မှ သွေးမပျက်တတ်သေးတာ

မိုက်တွင်းနက်တယ် ဆိုမလားပဲ။

ကိုယ့်ပျော့ညံ့ချက်တွေအတွက်

ကိုယ့်ကိုယ်ကို ကန့်ကွက်

ဘာကိုမှ မိမိရရ မဆုပ်ကိုင်ဖြစ်သေးတဲ့ လက်ချောင်းတွေနဲ့

တစ်ရက်ပြီးတစ်ရက် ကြက်ခြေခတ်ခဲ့ရ

ညပေါင်းများစွာ...

“စတေးရမယ်...

စတေးရမယ်...”

အဲဒီလိုတွေးမိပြန်တော့

လောင်းကစားသမားရဲ့ ပုံအောမှုမျိုးကို

ကိုးကွယ်သူတစ်ယောက်အနေနဲ့

နည်းနည်းချင်းတော့ ဖဲ့မပေးနိုင်။

မေ့လျော့ခြင်းကို အပြစ် မတင်ပါနဲ့

ဘဝကို နားကြည်း ငြီးငွေ့စွာ

တစ်ယောက်က ပြောတော့

“ဘဝဟာ မသေချာတော့ဘူး...” တဲ့

ဒုက္ခတောအုပ်ထဲမှာ

မင်းဘဝလေး မိုးမချုပ်စေလိုတဲ့ စေတနာ

ခွင့်လွှတ်ပါကွာ... ။

စကားလုံးတွေကို အားပြုနေရတာ

ရွံစရာကောင်းလှပါတယ်

လောကရဲ့ ရွဲ့စောင်းမှု ထုသွင်ကြီးထဲမှာ

စာအုပ်တွေ တစ်အုပ်ပြီးတစ်အုပ်ဖတ်

မိမိရဲ့ ကြောင်တောင်ကန်း စိတ်ဓာတ်ကို ပျက်ရယ်ပြု

ယုံကြည်မှုဆိုတာ တစ်ခုထဲနဲ့

ဟောဒီ ကမ္ဘာကြီးပေါ်က

တစ်စုံတစ်ရာကို ရယူချင်မိတာပါ။

လှသန်း

ကျွန်တော်ရဲ့ ယခုအချိန်နှင့် အခြားမငြိမ်သက်မှုများ

ပထမအကြိမ်၊ ဧပြီ၊ ၂၀၁၂

ကျွန်တော့်ရဲ့ ယခုအချိန်

မိုးအုံ့ ညနေရဲ့ ရင်ခွင်ထဲက

လပ်ဟာမှုဝိညာဉ်

မေတ္တာတရားရဲ့ ဆွဲငင်မှုမှာ

သူ့ရဲ့ ယူကြုံးမရ ဟင်းလင်းပြင်

သက်ညှာစွာ စီရင်ချက် ချပါတော့။

တိုက်ဆိုင်မှုတွေ အလယ်မှာ

မမိုက်ကန်းရဲခဲ့ပါ

ဝမ်းနည်းရမှာကို သိပါတယ်

ခုလို ဖုံးကွယ်နေရတာကိုက

ပိုမို ကြေကွဲဖွယ်

ဘာမှမတတ်နိုင်ခြင်း ပင်လယ်။

အထီးကျန်

အထီးကျန်

အထီးကျန်... တဲ့

ဒီအသံက ကျယ်လွန်းအားကြီးတယ်

သွေးသားတောင်းဆိုမှု သက်သက်နဲ့တော့

အဲဒီ ဖန်ခွက်ထဲ ခုန်မဆင်းရဲပါဘူး။

ကိုယ့်စိတ်ကိုယ် အလိုလိုက်မိတဲ့

ခေါင်းငိုက်စိုက်နာရီတွေ

ဟောဒီ တစ်နွေလုံး

သူ့ခမျာ အရည်ပျော်နေရှာတယ်

လက်ဖက်ရည်ဆိုင်ရဲ့ ခပ်နိမ့်နိမ့် ထိုင်ခုံပေါ်မှာ။

ဘာဖြစ်လို့ ရင်းနှင်းဖို့ ဝန်လေးနေတာလဲ

တစိမ်းဆန်ဆန် နေထိုင်ခြင်းဟာ

ပျင်းစရာကောင်းပါတယ်။

ကျေနပ်လောက်အောင် မဖန်တီးနိုင်တဲ့ အနေအထား

အဲဒီ တံတားက စိတ်မချရဘူး

အနိုင်မရခဲ့တဲ့ ပြိုင်ပွဲတွေ...

နေ့စွဲတွေ...

… … … ။

အဆုံးအစွန်အထိ စွဲလန်းခဲ့

အဆုံးအစွန်အထိ စွန့်လွှတ်ခဲ့

အစွန်းနှစ်ဘက်ကို ဆက်သွယ်ထားတဲ့ မျဉ်းတစ်ကြောင်း

ခေါင်းမာမှုတွေနဲ့ ပျော်ချင်ယောင်ဆောင်

မျှော်လင့်ချက်မဲ့ပုံက ဆန်းကြယ်လှပေရဲ့။

ခုတော့ ထွက်ပေါက်မဲ့စွာ

သူ့ဆာလောင်မှုကို ဘယ်သူကြားနိုင်မှာလဲ

အခွင့်အရေးနဲ့ အစွမ်းအစ

မညီမျှသေးခင်...

… … … …

… … … ။

ငှက်ပျောသီးတစ်ဖီးလောက်မှ

မကြီးကျယ်နိုင်သူတစ်ယောက်

ကိုယ့်ကိုယ်ကို သစ္စာဖောက်ဖို့ဆိုတာ

သိပ်နောက်ကျနေပြီ။

လှသန်း

ကျွန်တော်ရဲ့ ယခုအချိန်နှင့် အခြားမငြိမ်သက်မှုများ

ပထမအကြိမ်၊ ဧပြီ၊ ၂၀၁၂