Indie သီချင်းထဲက သာမန်လူတယောက်
(ကမ္ဘာ့ကဗျာနေ့/၂၃)
===============
မနေ့က မှာထားတဲ့
သဲကြမ်းတကျင်းမှာ
အနုပညာ ဘယ်နှစ်အောင်စ၊
အုတ်တခဲမှာ
အမှန်တရား ဘယ်လောက်များများ
ပါလာမလဲ

ဒီမြို့မှာ
မတ်လ တတိယအပတ် ရောက်နေပြီ
မနက် ၆ နာရီလောက်အထိ
မူလအရသာ မကျန်တော့တဲ့
မြူတွေ... မကွဲသေးဘူး
အဲသလို မြူကြောင်တွေကြား
တူးလက်စမြေကျင်းဝမှာ တောင်တောင်အီအီ ရပ်နေရင်း
အရင်ဘဝက အမှတ်မရတော့တဲ့ ကဗျာတွေ မျက်မှန်မှာ လာသီးနေလို့
​အင်္ကျီအောက်စ နဲ့ သုတ်ချရတယ်

ငါ့ကဗျာ မကောင်းလည်း
သူတို့ကဗျာ ကောင်းကြမှာပါ
ငါ မရေးလည်း
သူတို့ ရေးကြမှာပါ။ ။


#ဝင်းမင်းထွန်း
၂၁/၀၃/၂၀၂၃
အင်္ဂါ

တကယ်ရှိသော နေ့များ (၇၇၉)

မနှစ်တနှစ်က ဒီရက်ဟာ (၄၉)
မနှစ်က ဒီရက်ဟာ (၄၁၄)
ဒီနှစ် ဒီရက်မှာ (၇၇၉)
ကြာခဲ့ပြီ
အမှောင်ထဲမှာ
ကဗျာ (နေ့)

သီဟသူ
မတ် ၂၁၊ ၂၀၂၃။

ပုံမှန် မနက်ခင်း

.
ငါဟာ သွေးရွှဲရွှဲစိုနေတဲ့ မြေကြီးထဲက ထိုးထွက်လာတဲ့
နွေဦးပန်းပွင့်အသွင်ရှိတဲ့
စိတ်ကူးတခု။

ငါတို့ နေထိုင် နေထိုင် နေထိုင်ခဲ့ကြပြီး
အသက်ရှင်နေရခြင်းကို မြတ်နိုးခဲ့ပုံများ။

ငါတို့ လက်မလွတ်ချင်ခဲ့ကြဘူး။
.
Joy Harjo
.
သီဟသူ မြန်မာပြန်သည်
သြဂုတ် ၄၊ ၂၀၂၂။
_____________________________________________________

Indie သီချင်းထဲက သာမန်လူတယောက်
=========================
မသေသေးကြောင်း ပြုံးပြလိုက်ပြီး
မနက်စာကို ခပ်သွက်သွက် လက်စဖြတ်လိုက်တယ်
အပြင်မှာ မိုးက လူရိုသေ ရှင်ရိုသေ ရွာနေသေးတော့
လက္ခဏာရေး သုံးပါး ထက်
ထီး က ပိုအရေးကြီးသွားပြီ
လွယ်အိတ်ထဲ ဖတ်လက်စ စာအုပ်တအုပ်ထည့်
​ဘုရားကန်တော့ပြီး
လမ်းမဆီ ထွက်လာ
အသက်ထက် ဈေးပိုရတဲ့ ခရီးတွေအတွက် ရေဝေးဖလား လုနေတဲ့ ကားသမားတွေ များနေတော့
လမ်းကို ချက်ချင်းမကူးရဲသေး
ထီးတဖက် / လွယ်အိတ်တဖက် နဲ့
မနက်ခင်းကို အန္တရာယ်ကင်းဂါထာ ရွတ်ပြီး
ဖြတ်ကူးရတယ်
ငါ့မိတ်ဆွေ မေးနေကျ စကားလေး စိတ်ထဲ အမှတ်ရ
"ခြေနေ"...။
#ဝင်းမင်းထွန်း
၀၄/၀၈/၂၀၂၂
ကြာသပတေး
_____________________________________________________

တကယ်ရှိသော နေ့များ (၅၅၀)
.
"ခြေနေ" လို့ မေးလိုက်တိုင်း
အဖြေကို သိနေပြီးသား
ဆိုပေမဲ့ တကယ် မသိပါဘူး
ရန်ကုန်ရဲ့ အဝေးကလူဆိုတော့
မြေပြင်သတင်း မြေပြင်ဖီလင်နဲ့
အဟလေးတွေတော့ ရှိတာပေါ့
သမုဒ္ဒရာ ဝမ်းတထွာ က အခုမှ ဒုတ်ဒုတ်ထိ သိနေရတာ
အသက်နဲ့ရင်းပြီး သွားလာနေရသလို ခံစားနေရတာ
လူအဆင်ပြေတောင် စိတ်အဆင်မပြေ
မကောင်းတဲ့သတင်း
တွေပဲတော့ မဟုတ်ပါဘူး
ကဗျာအကြောင်း စာအကြောင်းနဲ့
ဖြေဆည်ရာတချို့
ပန်းချီကားတချို့ရယ်ပေါ့
ရယ်ပြီးရင်တော့ ရှိုက်ရတာပေါ့
အရှိုက်ခက်တဲ့အခါ
ငိုလိုက်ရတာပေါ့
အေးဗျာ
မလွယ်ဘူး
.
သီဟသူ
ဩဂုတ် ၄၊ ၂၀၂၂။
_____________________________________________________

 အပြာဖျော့ဖျော့ ဂျင်းဦးထုပ်တလုံးရဲ့ နောက်ဆုံးညနေ

(ချိမ့် သို့)

============================

လွယ်လွယ်မျက်ရည်ကျရတဲ့ ဩဂတ်စ် လ ရဲ့ နေ့ခင်းတခု မှာ ရွာတော့မလိုလိုနဲ့ မိုးက လုံးဝ မရွာခဲ့ပါဘူး။ "မိုးက မတိတ်တော့ဘူး / ဟောဒီ လောကမှာ" လို့ ပွင့်အံ့ခဲ့သူကို အဆုံးသတ် နှစ်သိမ့်ခြင်းလား...။  အရောင်လွင့်နေပြီဖြစ်တဲ့ အပြာရောင်ဂျင်းဦးထုပ်တလုံး ဟာ ပိုင်ရှင်ရဲ့ လောကဓံ နဲ့ သက္ကရာဇ်များကို အတိုင်းအတာတခုအထိ ပြောပြနေသလိုပဲ။ ဒုက္ခတွေ အနှံအပြား ပေါက်ရောက်ရာ နေရာ မှာ ကိုယ့်မှတ်ဉာဏ်နဲ့ ကိုယ်၊ ကိုယ့်အလွမ်းနဲ့ ကိုယ် ငြိမ်နေမိတယ်။ 

"ကျွန်တော်ဟာ အရူးအမူးသမား

ခံစားမှုပဲ ယုံတယ်။"

ကျောက်ပြား အနီရောင်ပေါ်မှာ အဖြူစာလုံးနဲ့၊

အကြောင်းအရာ မျိုးစုံနဲ့ ဖြတ်သန်းမိခဲ့တဲ့ ဆုံမှတ်ဟောင်းတခုမှာ ပြန်လည်ဆုံမိတဲ့ မျဉ်းကြောင်းတွေလို အချင်းချင်း မသိပေမယ့် ဆုံမှတ်က တူနေတယ်။ တချို့ တိတ်တဆိတ်၊ တချို့ ဆူဆူလောင်လောင်။ 

လေငြိမ်နေတာကြောင့်လည်း ဖြစ်မယ်ထင်တယ်။ Mask တပ်ထားပေမယ့် သုသာန်ရဲ့ ရနံ့ က ထင်ရှားနေတယ်။ မြက်ရိုင်းတွေရဲ့ အလယ်မှာ အစီစီ အရီရီ အုတ်ဂူ အသစ်တွေ၊ ထောင့်အကျဆုံး နေရာမှာတော့ သူ့အတွက် နေရာ။ အောက်မေ့ခြင်းများစွာနဲ့ ပို့သလိုက်တဲ့ ပန်းခြင်းများ မမွှေးမြနိုင်တော့ပါ။ ကျနေရောင်အောက်မှာ အိုက်စပ်စပ် ဖြစ်လာပြီး မျက်ရည် နဲ့ ချွေးရောထွေးကုန်တဲ့ မျက်နှာတွေ။ ဆရာတော်တပါး ရဲ့ လက်ထဲမှာ သစ်သားပက်လက်ကုလားထိုင်ပေါ်မှာ ကျောမှီပြီး ကင်မရာဆီ ခေါင်းငဲ့ ကြည့်နေတဲ့ ဆံပင် ရော မုတ်ဆိတ်ပါ ဖွေးနေတဲ့ အဖြူအမည်းဓါတ်ပုံ နဲ့ ကဗျာ တကြောင်း။

"ဦးခိုက်ရှိခိုးပါ၏ဘုရား

တပည့်တော်ဟာ ဘယ်သူပါလဲ"

ကိုယ့် ယူလာတဲ့ အဝါရောင် ပန်းစည်းကို အုတ်ဂူပေါ် တင်လိုက်ပြီး ကိုယ်တပိုင်းပေါ်တဲ့အထိ ဖွင့်ထားတဲ့ ပန်းတွေအပြည့်နဲ့ ခေါင်းတလားကို ကြည့်မိတော့ မျက်ရည်မဆယ်နိုင်တော့ပါ။ သေခြင်းတရားမှာ အရောင် ရှိမယ်ဆို အဝါ ၊ အသံ ရှိမယ်ဆို D-minor ပဲ။ 

ကံ ဖြတ်ရင် ဘယ်သူမှ နေလို့မရဘူး ဆိုပေမယ့် ၇၃ ဆိုတာ ကျန်ရစ်သူတွေ မချိတင်ကဲ ဖြစ်သင့်သေးတဲ့ အရွယ်ပဲ မဟုတ်လား။ 

" ရူးမတတ်ပါဘဲ ကိုကို

    ကိုကို ကောင်းရာသုဂတိလားပါစေ

                                        ညီမလေး" တဲ့

အားလုံးတုန်လှုပ်ခဲ့ရပါတယ်

ကောင်းရာသုဂတိမှာ ငြိမ်းချမ်းပါတော့ ဦးချိမ့်....။

#ဝင်းမင်းထွန်း

၁၁/၀၈/၂၀၂၁

ဗုဒ္ဓဟူးနေ့

ငါဟာ ပုံမှန်
မဟုတ်ဘူး ဆိုတာ ငါမသိခဲ့ဘူး


ငါမွေးဖွားခဲ့ရာ ဒေသရဲ့
ရေ မြေ လေ
ပုံမမှန်မှုကို
ငါမသိခဲ့ဘူး။

ရွာမလို တိမ်မည်းတွေရဲ့
အနောက်က 
အတိတ်ရဲ့ အရိပ်မည်း
ငါမသိခဲ့ဘူး။

နေရောင်ဟာ
အမှောင်ထဲ အလင်းတကွက်ထိုး
ငါ့မျက်စိကို စူးစေခဲ့
အမှောင်တွေကို
ငါမမြင်နိုင်ခဲ့ဘူး။

ပျော်ရွှင်ရီမောဖို့ထက်
ရီဝေ မူးလိုက်ရတယ်
ငါ့ လူငယ်ဘဝ
ပုံမှန် မဟုတ်ခဲ့ဘူး။

ဒီနွေဦး
ငါနေထိုင်ရတာ ပုံမှန်
မဟုတ်ဘူး၊
ဒါကို ငါသိတယ်။

ဒီနွေဦး
ကျဆုံးသူတွေ
စစ်ပွဲရှောင် ထွက်ပြေးရသူတွေ
နာကျင်
ငိုကြွေးသံတွေ
ငါမြင်တယ်
ငါကြားတယ်
ငါတောက်ခေါက်တယ်
ငါဟစ်အော်တယ်
ငါငိုတယ်။

ငါသိတယ်
ဒီနွေဦးမှ စ၍
အာဏာရူးကို ကမ္ဘာမကျေဘူး။ ။


သီဟသူ
ဧပြီ ၉၊ ၂၀၂၁။ 

အမှောင်ညများ

 (၁)

ည

မှောင်ရိပ်ခို

သူတို့တွေ

ငါတို့မနက်ဖြန်

ငါတို့အနာဂတ်

ငါတို့တိုင်းပြည်ကို

ပြန်ပေးဆွဲသွားကြတယ်။

အလင်းရောက်လုခင်မှ။

(၂)

ငါအိပ်ရာနိုးတော့

မနက်ခင်းဟာ မှောင်နေတယ်

ဖေဖေါ်ဝါရီ ၁၊ ၂၀၂၁။

ညတာရှည်ခဲ့ပြီ။

(၃)

ည ၈ နာရီ

သံပုံးတွေ

နာနာတီး

အံကြိတ်

မျက်ရည်ကျ

ညဟာ အန်တုမှုတွေနဲ့ သက်ဝင်လို့။

ညဟာ တော်လှန်ရေး။

(၄)

မန္တလေး လမ်းပေါ် စ ထွက်

နောက် ရန်ကုန်

နောက် တပြည်လုံး

လမ်းပေါ်ထွက်

ရှေ့လာမဲ့ အမှောင်လွှမ်း နေ့ညတွေကို ငြင်းဆန်တယ်

မတရားမှုကို ဖီဆန်တယ်

အာဏာရူး အလိုမရှိ

အာဏာဟာ ပြည်သူ့မှာတည်တယ်၊

သူတို့ သေနတ် စ ပစ်တယ်။

ညအမှောင်မှာ အနီစွန်းခဲ့ပြီ။

(၅)

သူရဲကောင်းတွေကြွေတိုင်း

အံကြိတ်၊ လက်သီးကျစ်ကျစ်ဆုပ်

စစ်ခွေး သောင်းကျန်း သေနတ်သံနဲ့နေ့တွေ။

စစ်ခွေး ရမ်းကား အမှောင်ဖုံးညတွေ။

(၆)

ရွေးခဲ့ပြီးသောလမ်း

သူတို့လမ်း နဲ့ ငါတို့လမ်း

အမှောင် နဲ့ အလင်း

နှစ်၆၀နီးပါး အရိပ်ထိုးနေခဲ့တဲ့

အမှောင်ထုကို ငြင်းဆန်ခြင်း

ငါတို့ရဲ့ လက်သုံးချောင်း သင်္ကေတ

ည၅၀ကျော် မှောင်ခဲ့တာ

ရက်၅၀ကျော် တိုက်ခဲ့ပြီ။

အမှောင်ဆုံးအချိန်တွေမှာ တွဲလက်တို့မြဲလို့ချီ

နေ့သစ်ကို ရောက်လုပါပြီ။

(၇)

နေ့သစ်မှာ

လတ်ဆတ်သော လေကိုရှူ၍

ငါနေထိုင်မယ်

ဒါပေမဲ့

ဘယ်တော့မှ မမေ့ဘူး၊

ဘယ်တော့မှ ခွင့်မလွှတ်ဘူး။

ကမ္ဘာမကျေဘူး၊

ကမ္ဘာမကျေဘူး။ ။

သီဟသူ

မတ် ၂၄၊ ၂၀၂၁။

နွေဦး

ဒီကမ္ဘာ
ကိုယ့်ဒုက္ခနဲ့ကိုယ်၊ မင်းဒုက္ခနဲ့မင်း ဆိုရာမှာ
ဒီနွေဦးမှာ
ငါတို့ဒုက္ခဆိုတာ
ဖေဖေါ်ဝါရီ ၁၊ ၂၀၂၁ ကတည်းက
တိုင်းပြည်နဲ့ ပြည်သူ့အာဏာကို
အာဏာရူးမင်း‌အောင်လှိုင် ပြန်ပေးဆွဲတာပဲ
အာဏာရူးတယောက်တည်းပဲလားဆိုတော့
သူ့အလိုတော်ရိ စစ်ယူနီဖောင်းဝတ်တွေ၊ ရဲယူနီဖောင်းဝတ်တွေလည်း ပါတာပဲ
စစ်၊ ရဲ ယူနီဖောင်းဝတ်တွေ အပြင် ရုံးတက်မပျက် "ပြည်သူ့ဝန်ထမ်း" ဆိုသူတွေလည်းပါတာပဲ
ဝန်ထမ်းဆိုသူတွေအပြင် နိုင်ငံရေးသမား အယောင်ဆောင်တွေ၊ ပါတီတွေလည်း ပါတာပဲ
ဒါ့အပြင် အရပ်ထဲက ဒလန်တွေလည်း ပါတာပဲ
ဒလန်တွေအပြင် ခြံစည်းရိုးခွထိုင်သူတွေလည်းပါတာပဲ
သူတို့တွေ၊ သူတို့တွေ
သူတို့တွေကြောင့်
ငါတို့တွေ လမ်းတွေပေါ်ထွက်
ငါတို့ပေးခဲ့‌တဲ့ မဲတွေကို လေးစားဖို့
ငါတို့တွေ ဆန္ဒထုတ်ဖော်
ငါတို့ သံပုံးတွေတီးလို့
ပြင်းပြတဲ့ဆန္ဒမှတပါး
လက်နက်မပါတဲ့ ငါတို့ကို
အာဏာရူးနဲ့
သေနတ်ကိုင်ပြီး အမှန်တရားဖိနှိပ်ရတာကို အားရနေတဲ့ အလိုတော်ရိတွေက
ငါတို့ တိုင်းပြည်နဲ့လူငယ်တွေကို ပစ်သတ်နေတယ်
ငါတို့ တိုင်းပြည်နဲ့လူငယ်တွေ‌ရဲ့အနာဂတ်တွေကို ပစ်သတ်နေတယ်
မန္တလေး၊ မြိတ်၊ နေပြည်တော်၊ ရန်ကုန်၊
ဘားအံ၊ ပဲခူး၊ ထားဝယ်၊ ပခုက္ကူ၊
မော်လမြိင်၊ တောင်တွင်းကြီး၊ စလင်း၊ မုံရွာ၊
မြင်းခြံ၊ ကလေး၊ ပင်လောင်း၊ မကွေး၊
ထီးလင်း၊ မူဆယ်၊ မြစ်ကြီးနား၊
ဖျာပုံ၊ မြိုင်၊ ချောက်၊ ပြည်။
ကျဆုံးသူရဲကောင်းများ၊
ဒဏ်ရာရ သူရဲကောင်းများ၊
သူရဲကောင်းတွေကို ထိမှန်တဲ့ ကျည်ဆန်တိုင်းအတွက် ငါတို့အားလုံး ကြေကွဲရ
သူရဲကောင်းတွေကို ရိုက်တဲ့ ရိုက်ချက်တိုင်းအတွက် ငါတို့အားလုံး နာကျင်ရ
ဒါပေမဲ့
ငါတို့ ကြေကွဲရမှုတိုင်းဟာ အာဏာရူးကို ဖြုတ်ချဖို့ ဖြစ်တယ်
ငါတို့နာကျင်ရမှုတိုင်းဟာ အာဏာရူးနဲ့ အလိုတော်ရိတွေ ကျဆုံးဖို့ ဖြစ်တယ်
ငါတို့ ဒေါသထွက်ပြီး နိုးထရတဲ့ မနက်ခင်းတွေနဲ့
ငါတို့ ဝမ်းနည်းမှုနဲ့ ကုန်ဆုံးရတဲ့ ညတွေနဲ့
ဒီနွေဦးမှာ
၁၉၆၂ က စ တဲ့ သန္ဓေမမှန်တဲ့ အာဏာရူး မျိုးဆက်ကို
ငါတို့ဖြုတ်ချတော့မယ်
ပြည်သူ့အာဏာ ပြည်သူပြန်ယူမယ်
ငါတို့ပြည်သူတွေ ညီကြမယ်
ငါတို့ပြည်သူတွေ ညီတယ်
တယောက်ကို တယောက် အားပေး
တယောက်ကို တယောက် ဖေးမလို့
ဒီ နွေဦးတော်လှန်ရေး
အရေးတော်ပုံ အောင်တော့မည်
အရေးတော်ပုံ အောင်တော့မည်
အရေးတော်ပုံ အောင်တော့မည်။ ။


သီဟသူ
မတ် ၁၄၊ ၂၀၂၁

*မြို့အမည်များကို ကျဆုံး သူရဲကောင်းများ ပေါ်ထွန်းခဲ့ရာ အချိန်စဉ်အတိုင်း heroesofmyanmar.com ကို ကိုးကား ထားပါတယ်။

ရုန်းကန် ရန်ကုန်

ရန်ကုန်ကို မအိပ်စေချင်ရင်

ရန်ကုန်ဟာ မအိပ်ဘူး။

ရန်ကုန်မအိပ်ရင်

တော်လှန်ရေးဟာလည်း

မအိပ်ဘူး။

ခု လှုပ်ကြည့်တယ်

လှုပ်တယ်။

ဘီလူးစီးလို့ လှုပ်တဲ့မြို့ကြီးမဟုတ်

အသိဉာဏ်နဲ့ လှုပ်တဲ့မြို့ကြီး။

ရန်သူတွေက

အင်အားကြီးယောင်ပြရင်

သူတို့ အင်အားနည်းနေလို့ပေါ့။

ရန်ကုန်ဟာ ဒါကို

ရုန်းကန်နေတဲ့ကြားမှာ

ဖော်ထုတ်လိုက်တယ်။

ရန်ကုန်ရဲ့

လက်မောင်းကြွက်သားတွေကို

သူတို့ဖြုံတယ်။

ရန်ကုန်ပေါ့။

ရန်ကုန်ဟာ

မင်းကိုခါးပြောသလို

ပြန်လာပါတယ်။

ရန်ကုန်ဟာ ပြန်လာမယ်တဲ့။

ရန်ကုန်ဟာ ပြန်လာနေပြီ။

ရန်သူတို့ရဲ့

သွေးရူးသွေးတမ်း တုံ့ပြန်ပုံကို

ကမ္ဘာက သိသွားတယ်။

အဲဒီမှာ ရန်ကို ကုန်ဖို့လမ်းစ။

ရန်ဟာ ကုန်မှာပဲ။

ရန်ကုန်ပဲလေ။

ဖြတ်ခနဲ လူးလွန့်သွားတဲ့

ရန်ကုန်ည လမ်းမများဟာ

ကြွက်သားတွေပေါ့။

ရန်ကုန်ဟာ

နောက်ဆုံးလက်သီးအတွက်

ရှိနေပြီ။

ရေဝတီ

၈-၃-၂၀၂၁

နွေအပြ နွေအပြော

အပိုင်း - ၁

ခြေဆင်း

၁။

နွေဦး ကို ခူးမယ့် လက်

အိပ်မက်ချင်း တူရင်

လမ်းချင်း တွေ့မယ်

စုပေါင်းအား သာ အဓိက။

၂။

ဒီတနွေကို ကျော်မယ်

ဒီမုန်တိုင်းကို ဖြတ်မယ်

ဒီဓါးသွားပေါ် လျှောက်မယ်

နက္ခတ် မလိုဘူး

နိမိတ် မလိုဘူး

ဓမ္မကို ခေါင်းမှာ ပန်ထားတဲ့ ငါတို့

ခရီး မဆုံးမချင်း

တနေကုန်သွားလည်း

အလံက တလွင့်လွင့်။

၃။

ခြေသံတွေ ပြင်းလာတဲ့ လမ်းမတွေက ပြောတဲ့ သမိုင်း

နွေနေအောက်မှာ တဖန် ရုန်းကြွလာတဲ့ အတိတ်ဝိဉာဉ်

ကြွေးကြော်သံတွေနောက်ကွယ် တောက်လောင်ဆူပွက်နေတဲ့ ပစ္စုပ္ပန်

တဟုန်ထိုး ပျံတက်သွားမယ့် ပျိုရွယ်မှုကို ဌာပနာထားတဲ့ အနာဂတ်

ဓါးတန်းလန်း နဲ့လည်း ရောက်အောင်သွားမယ်

မြှားတန်းလန်း နဲ့လည်း ရောက်အောင်သွားမယ်

၄။

တသက်မှာ တခါပဲ သေရတယ် ဆိုတာ

အသက် ကို ပြောတာ

အိပ်မက် ကို မဟုတ်ဘူး

သေနတ်မှန်လို့ သေသွားတဲ့ အိပ်မက် ရယ်လို့ ကြားဖူးလား

မင့်အိပ်မက်ကို ငါတို့ ဆက်မွေးမြူတယ်

မင့်တိုက်ပွဲကို ငါတို့ နိုင်အောင် တိုက်မယ်

၅။

စားပွဲပေါ်မှာလား

လမ်းပေါ်မှာလား

ရိုးသားမှု နဲ့ မေတ္တာတရား

ဉာဏ်ပညာ နဲ့ ဆင်ခြင်တုံတရား

၆။

မမေ့နဲ့...

အသက်ချင်း ပေးထားတဲ့ ရဲဘော်ရဲဘက် ကိုရော

နောက်ကျောကို ဓါးစိုက်သွားတဲ့ သစ္စာဖောက် ကိုရော

မမေ့နဲ့...

ငါတို့ခန္ဓာကိုယ်အနှံ့ ထိုးကျလာတဲ့ နံပါတ်တုတ်တွေ

ငါတို့ခေါင်းကို လာမှန်တဲ့ ကျည်ဆန်တွေ

ငါတို့နှလုံးသားတွေထဲထိ ပစ်လိုက်တဲ့ မီးကွင်းတွေ

မမေ့နဲ့...

ငါတို့တတွေရဲ့

ခွန်အားတွေ

ချွေးတွေ

သွေးတွေ

မျက်ရည်တွေ

အထူးသဖြင့် သူရဲကောင်းတွေ

မမေ့နဲ့...

တော်လှန်ရေးမှာ

လူ့သိက္ခာအရ

ငါတို့

အမြဲ နိုင်တယ်

သူတို့

အမြဲ ရှုံးတယ်

၇။

ရေကြည် ရေနောက် လည်း ခွဲတတ်စေ

ဓမ္မ နဲ့ အဓမ္မ လည်း ကွဲပြားစေ

အမှန်တရားပဲ နှလုံးသားထဲ သယ်ယူလာသူ လူငယ် ရေ...

အရေးတော်ပုံ အောင်ရမယ်။

အပိုင်း - ၂

ခွေးစကား

======

လူတွေ ဘာပြောနေလဲ

ငါ နားမလည်ဘူး

ငါ က ခွေး ပဲ

ဟောင်ချင်ရာ ဟောင်မယ်

ဆွဲချင်ရာ ဆွဲမယ်

ကိုက်ချင်ရာ ကိုက်မယ်

ဒီခွေး ကွာ၊ လို့ လူတွေ ကြိုက်သလောက် ဆဲ

ငါ ကိုက်မယ် ဆို ပြေးကြမှာပဲ

ငါ့ အစာ ပုံမှန်ကျွေးနေတဲ့ လက်ကို

ငါ လျှက်မယ်

သူ့အသိုက်အမြုံကို လုံအောင် စောင့်မယ်

လူတွေ ဘာပြောနေလဲ

ငါ နားမလည်ဘူး

ငါ က ခွေး ပဲ

အပိုင်း - ၃

လူပျောက်ကြော်ငြာ

===========

မိစ္ဆာမှိုင်းမိနေတဲ့ ရဲဘော် ရေ...

သစ္စာဖောက်တွေဆီမှာ သစ္စာ မရှိတဲ့အတွက်

သစ္စာခံစရာ မလိုဘူး ဆိုတာ၊

အများညီလို့ ဤ ကို ကျွဲ ဖြစ်နေစရာ မလိုဘူး ဆိုတာ၊

မကောင်းဆိုးဝါးရဲ့ လက်မှာ နယ်ရုပ် အဖြစ်ခံစရာ မလိုဘူး ဆိုတာ၊

မင့်အသက်နဲ့ ရင်းပြီး ကာကွယ်စောင့်ရှောက်နေတဲ့ မင့် မိသားစု က ပြည်သူပဲ ဆိုတာ၊

အသိ ပြန်လည်ပါ

ငါတို့ပို့သတဲ့ မေတ္တာမှာ

မင်း အဆိပ်အတောက် ပြေပါစေ

ရောက်ရာအရပ်က အမြန်ပြန်လာပါ

ငါတို့ မင်းကို ခွင့်လွှတ်တယ်။

အပိုင်း - ၄

မိစ္ဆာနှင်ပွဲ

======

မင်းတို့ ရိုက်နှက်ချိုးဖဲ့လိုက်တဲ့ အမြင့်ပျံတွေကြား

အမှန်တကယ် ပြိုလဲနေသူဟာ မင်းတို့ပဲ

မင်းတို့ ပစ်လွှတ်လိုက်တဲ့ မီးခိုးတွေကြား

အမှန်တကယ် မွန်းကြပ်နေသူဟာ မင်းတို့ပဲ

မင်းတို့ ပစ်လွှတ်လိုက်တဲ့ ကျည်ဆန်ထိလို့

အမှန်တကယ် နှလုံးသား သေဆုံးသွားသူဟာ မင်းတို့ပဲ

မကောင်းဆိုးဝါးရဲ့ အရိုးအရင်းလောက်နဲ့

အမှန်တကယ် ငတ်မွတ်နေသူဟာ မင်းတို့ပဲ

မကောင်းဆိုးဝါးရဲ့ အရိပ်အာဝါသအောက်မှာ

အမှန်တကယ် လောကငရဲခံနေသူဟာ မင်းတို့ပဲ

ရှေ့မှာ ဘယ်လိုအတားအဆီးပဲ ရှိနေပါစေ

မှန်မှန်ချီတက်လာနေတဲ့ ငါတို့ရဲ့ ကြွေးကြော်သံတွေကို

အမှန်တကယ် သွေးပျက်နေသူဟာ မင်းတို့ပဲ

ငါတို့မှာ ပြေးစရာ မြေမကျန်တော့ရင်တောင်

ငါတို့ဘက်မှာ အမှန်တရား အမြဲရှိတယ်

ငါတို့ကို ဖိနှိပ်လို့ ရရင်တောင်

ငါတို့နှလုံးအိမ်ထဲက ဓမ္မကိုတော့ မင်းတို့ လက်ဖျားနဲ့တောင် ထိခွင့်ရမှာ မဟုတ်ဘူး

မင်းတို့ရဲ့ မိစ္ဆာစိတ်ကို ငါတို့ အမှုန့်မချေသေးခင်

အချိန်မီ လက်နက်ချပါ

မိစ္ဆာဒိဌိ အဖြစ် ဘဝ မဆုံးသေးခင်

အချိန်မီ တရားရပါ။

အပိုင်း - ၅

နိဂုံး

သူရဲကောင်းတေး

===========

သူရဲကောင်းဟာ နေရာမျိုးစုံကနေ ပုံသဏ္ဌာန်အမျိုးမျိုး နဲ့

ရောက်ရှိလာတယ်

ကျောင်းသူ ကျောင်းသား အဖြစ်

ဆရာ ဆရာမအဖြစ်

ပရဟိတသမား အဖြစ်

ပညာတတ် အဖြစ်

မီဒီယာသမား အဖြစ်

ရဟန်းတပါး အဖြစ်

သမိုင်းပေးတာဝန်ကျေတဲ့ ပြည်သူတဦး အဖြစ်

အသက်မပြည့်သေးတဲ့ ချာတိတ်လေးတဦး အဖြစ်

ငါတို့ရှေ့မှာ ဘွားခနဲ ပေါ်လာပြီး ငါတို့တွေကို ကယ်ဆယ် ခွန်အားဖြည့်ပေးတယ်

မိစ္ဆာသွေးနဲ့ နေ့ချင်းကြီးလာတဲ့ မင်းတို့ရဲ့ သူတို့အပေါ် ရက်စက်ယုတ်မာမှုတွေဟာ

ငါတို့ရဲ့ ရှေ့ခရီး မိုင်တိုင်တွေအတွက် လောင်စာ အဖြစ် ရောက်ရှိလာတယ်

သူတို့တတွေဟာ

ငါတို့ဆီ ကိုယ်စောင့်နတ်တွေ အဖြစ် ပြန်လာတယ်

သူတို့တတွေရဲ့ ကိုယ်ရောင်ကိုယ်ဝါမှာ

ငါတို့ဟာ သူရဲကောင်းတေးကို အလှပဆုံး ရင့်ကျူးတယ်

အရေးတော်ပုံ အောင်ရမည်

အရေးတော်ပုံ အောင်ရမည်

အရေးတော်ပုံ အောင်ရမည်

#ဝင်းမင်းထွန်း

၂၈/၀၂/၂၀၂၁

တနင်္ဂနွေ

စက္ကူလူသား

ပျောက်ဆုံး ဆိုတဲ့ ခေါင်းစဉ်အောက်မှာ
မြို့ နဲ့ မြစ် လက်ချင်းတွဲထား
ဘယ်သူက မတည်ငြိမ်တာလဲ
ဘယ်သူက မအေးချမ်းတာလဲ
ရောက်ရာအရပ်က ပြန်လာပါ မပြော၊
အပြစ်တွေကိုလည်း ခွင့်မလွှတ်ပါ

ခင်ဗျား သတိမထားလိုက်ခင်မှာပဲ
ရာသီတွေ ညတွင်းချင်း ပြောင်းသွား
ခင်ဗျားရဲ့ မျက်နှာကို လာတိုက်နေတဲ့ လေ က
သိပ်အေးတယ်
ဇာတိကိုရော တခါတခါ မလွမ်းဘူးလား
ခင်ဗျားက အခန်းကျဉ်းထဲမှာ
တိတ်တဆိတ်နဲ့ပဲ ကျောပေး လို့

ဒုက္ခရောက်တော့မှ တခါက ပျော်ခဲ့ဖူးတာကို
ပြန်အောက်မေ့ရတာထက်
ပိုဝမ်းနည်းစရာကောင်းတာ မရှိဘူး လို့
Dante က ပြောတယ်၊

တကယ်တမ်းမှာတော့ သံသရာမှာ မကြုံဖူးတဲ့
လောကဓံ ရယ်လို့ မရှိဘူး။ ဒီဘဝအနေနဲ့
မမှတ်မိသေးတာပဲဖြစ်လိမ့်မယ်။

၂၉/၀၂/၂၀၂၀

ဝင်းမင်းထွန်း