လေရဲ့
မြှောက်စားမှုမှာ
ကလေးငယ်တစ်ယောက်
လက်မှ လွတ်သွားသော
မိုးပျံဘောလုံးတစ်လုံး။
ဗြုန်းဆို
ညနေခင်းရွဲ့စောင်း
ခေါင်းလောင်းသံများဖိတ်စင်
အမှောင်ရိပ်တွေဝင်လာပြီ
ငါ့ရဲ့
တိတ်ဆိတ်မှုတွေကြောင့်
ငါ
စောင့်နေရပြန်ပေါ့။
ရွံစရာ
ဝန်စည်စလယ်တွေနဲ့
ခေတ်ကြီးတစ်ခုလို
ပျက်ခဲ့ပြီလား
အချစ်
ပလ္လင်ပေါ်
လည်စင်းပေးချင်တဲ့
သိုးငယ်
ခပ်လွယ်လွယ်
ဘာသာရပ်တော့ မဟုတ်ဘူး။
မာကြောတဲ့
ဝေဖန်ရေးတွေကြား
အလေးချိန်မဲ့စွာ
ပမာဏမဲ့စွာ
ပုံသဏ္ဌာန်မဲ့စွာ
အသံမဲ့
ဒေသတစ်ခုသို့ အရောက်
ကြောက်စိတ်တစ်ခုထဲနဲ့
နေရဲခဲ့ပါပြီ။
ဟောဒီမှာ
သေခြင်းတရားနဲ့ လဲလှယ်ဖို့
သက္ကရာဇ်
နည်းနည်းပါးပါးနဲ့
စားကြွင်းစားကျန်တွေပဲ
ရှိပါတယ်။
အခုတော့
ကမ္ဘာ့ ဆွဲငင်အားမှ
ခေတ္တ
ကင်းလွတ်သွားသော...
… … … … …
… … … …
ကျွန်တော်ရဲ့
ယခုအချိန်နှင့် အခြားမငြိမ်သက်မှုများ
ပထမအကြိမ်၊
ဧပြီ၊ ၂၀၁၂
No comments:
Post a Comment