> သီဟသူ [dot] blogspot [dot] com: အထူးအမြန်

Aug 31, 2011

အထူးအမြန်

အိပ်မက်တွေ
ဒါတွေကို ဒီနေ့ခေတ်လူသားက
အာရုံမကျတော့ဘူး
ထမင်းတစ်လုပ်ကိုသယ်ဖို့
လက်ငါးချောင်းကို အလိုက်သင့်အလျားသင့်သုံးဖို့
အာရုံကျနေတယ်။ ဟောကြည့်
မင်း ဇွန်း၊ ခက်ရင်း၊ ဓားနဲ့ စားမြိန်စားမှ မတတ်ဘဲ။

ကဗျာဆိုတာက
ခေါင်းကို ခဏခဏ ပြူမထုတ်ရတဲ့
ဘတ်စ်ကားစီး ခရီးသည်ပဲ
ထိုင်ခုံရရင်တောင် ကံကောင်း
ချွေးတွေလည်းထွက်မယ်
ကဗျာနဲ့ အိပ်မက် ဆွေမျိုးဆက်တာ
ရှေ့သုံးလေးမှတ်တိုင်မှာ
ဆင်းမယ့်ကိစ္စ မေ့သွားလို့ဖြစ်မယ်။

လာရင်းကိစ္စပြောပါ
အချိန်တွေက ပြန်အမ်းဖို့အကြွေမရှိဘူး
ဒါနဲ့ အိပ်မက်တွေ ပြန်ပြန်အမ်းနေတာ
ခေတ်ပေါ် ငွေကြေးလဲလှယ်မှု
အတုတွေ အစစ်တွေထားပြီး
လက်တွေ့ အလုပ်ဖြစ်ရေး အသိဥာဏ်ကို
စဉ်ဆက်မပြတ် သင်ယူလေ့လာခြင်း။

မနှေးကွေးပါနဲ့
မွေးရာပါနဲ့ သေရာပါအမှတ်အသားတွေ
လူကြီးမင်းအနေနဲ့ နေ့တစ်နေ့ချင်းကို
ဘယ်လို ကုန်ခမ်းအောင် သုံးစွဲရပါသလဲရှင့်
ဒီလိုရှိပါတယ်။ ခင်ဗျားမသုံးစွဲခင်မှာပဲ
ရက်လွန်ခြင်း၊ အငွေ့ပျံခြင်းနဲ့
ဖိတ်ကျယိုစီးခြင်းတွေကို မျက်နှာပူရမှာပါ။

ရေ၀တီ