နောက်ထပ်နေ့များ ၂

မနက်အိပ်ယာအထမှာ
မိုးသည်းထန်စွာရွာတာနဲ့ ကြုံတော့
ဘာဖြစ်ရမှာလဲ
ရောမန္တိကမိုးပေါ့၊ တစ်မနက်လုံးလုံး
အိပ်ဇစ်စတယ်လစ်ဇင်မိုးပေါ့၊
ကဲ။ နေမွန်းတည့်ပြီ၊ အပူရှိန်အလွန်ပြင်းသည်၊
မစည်ကားအပ်တဲ့ နေရာတွေမှာ စည်ကားပြီ၊
ယန္တရားတွေ လည်ပတ်ပြီ၊ မုန်တိုင်းတွေတိုက်ပြီ၊ ငလျင်တွေ လှုပ်ပြီ။ မနေ့က
ဟုတ်တယ်ဆိုတာ
ဒီနေ့ မဟုတ်တော့ဘူးတဲ့၊
ဟော အခု ဟုတ်သွားပြန်ပြီတဲ့။
မီဒီယာပေါင်း သောင်းခြောက်ထောင်မှ ထုတ်လွှင့်နေပါပြီ။
(လက်ညိုးနဲ့ လက်မဝိုင်းပြပြီး) ‘ဒါ အရေးကြီးတယ်’တဲ့ ‘မင်းရောဘယ်လိုလဲ’တဲ့
ဟုတ်ပါပြီ၊ ဟုတ်နေပါပြီ
ထမင်းဝတော့ တီဗွီလေးဘာလေး ကြည့်ပေါ့
ဘယ်ကနေဘယ်လို
မော်ဒယ်ဖက်ရှင်လိုင်း ရောက်လို့ ရောက်သွားမှန်း မသိ သတိဝင်လာတော့
ငါ့အတွက် ဒါ အရေးကြီးတာပဲ
ကဲ၊ ကဲ ကဲ
နေဝင်ပြီ။
လမ်းမီးတွေ လင်းပြီ
စားဖွယ်ဆိုင်တွေလည်း လင်းပြီ၊ ညမှ ဖွင့်တဲ့ ဆိုင်တွေလည်း ဖွင့်ပြီ မီးရောင်မှာ
ပိုးကောင်တွေ ယောက်ယက်ခပ် နေပြီ
နောက်မှ ခံစား၊ နောက်မှ စဉ်းစား
‘ဘယ်လိုလဲ ခေါ်မှာလား မြန်မြန်’ တဲ့
ဘယ်လိုလဲ။

မောင်ယုပိုင်
တီဗီဖန်သားပြင်ကြီးဖွင့်လျက်
၂၀၀၉၊ ဇွန်၊ နှစ်ကာလများ။

နောက်ထပ်နေ့များ

တကယ်တော့ ချာလီချက်ပလင်နဲ့ မပြီးဘူး
တကယ်တော့ ကတ်ကိုဘိန်းနဲ့
အိလိယော့နဲ့ ပေါင်းနဲ့
မပြီးသေးသော နေ့များအတွက်
မီးစင်ကြည့် ကယူရတယ်။
မီးခွက်ထွန်း ရှာယူရတယ်။
နောက်ထပ်ဂျိန်းစဘွန်းကို ဘယ်လိုတင်ပြမလဲ
ဘယ်လိုတင်ပြသွားသလဲ၊
နောက်ထပ်
သမိုင်းရဲ့ နိဒါန်းကိုဘယ်လိုစကြမလဲ။

ဒီဘဝဟာ အဆုံးရှိတာတော့ သေချာပြီ၊
ပင့်ကူတွေထွက်လာလည်း အခန်းရှင်းရမှာပဲ၊
ကြောင်တွေတက်နင်းမိလည်း အပြင်ထွက်ရမှာပဲ။

တစ်နာရီမိုင် ၁၂၀ နဲ့ ငါတို့ဆီသေချာနေပြီဖြစ်ကြောင်း အထူးသတင်း
ထုတ်လွှင့်နေတယ်။

တီဗွီဖန်သားပြင်ကြီးဖွင့်လျက်တန်းလန်း
ညကြီးမင်းကြီး ထပြီးထိုင်နေ
တစ္ဆေက ဘယ်လိုနေလဲ။

မောင်ယုပိုင်
တီဗီဖန်သားပြင်ကြီးဖွင့်လျက်
၂၀၀၉၊ ဇွန်၊ နှစ်ကာလများ။

နေ့များ

စောစောစီးစီး
ချာလီချက်ပလင် ကြည့်ပြီးပြီ
သူ့ထက် ပိုရယ်စရာကောင်းလည်း သူ့လောက်
မရယ်ချင်တော့ဘူး။

စကြဝဠာအစ
လူ့ဘဝရဲ့အဆုံး
အခန်းထဲမှာ အံဆွဲတွေအားလုံး ဖွင့်လျက်တန်းလန်း
အခန်းရှင်းရင် ပင့်ကူတွေ ထွက်လာမယ့်အခန်း
အပြင်ထွက်ရင် ကြောင်တွေတက်နင်းမိမယ့်အခန်း။

ဘတ်စ်ကားတစ်စီး ဗုံးဖောက်ခွဲခံရ
ကင်ဆာအမြစ်ပွား
သက်ရှိတို့၏ ဖိုမသဘာဝ
ခွေးအလှပြိုင်ပွဲ
လှေခါးထစ်တက်နိုင်သော စက်ရုပ်
အပိုင်း ၂၃ အခန်းဆက် စုံထောက်ဇာတ်လမ်းတွဲ
ပိုမိုပူနွေးလာသော ကမ္ဘာမြေ
အဲဒီ တီဗွီဖန်သားပြင်ကြီး ဖွင့်လျက်တန်းလန်း
သူ အိပ်မောကျသွားပြန်ရော ။ ။

မောင်ယုပိုင်
စတိုင်သစ်၊ ၂၀၀၄ မေ
အဲဒီကျွန်းမြို့လေးမှာမြေပုံအပြောင်းအလဲနဲ့
၂၀၀၇၊ ဖေဖော်ဝါရီ၊ နှစ်ကာလများ။

သူလို(လို) ကိုယ်လို(လို)

သီးချိန်တန်သီးဆိုတဲ့ ချိန်သီးကို
ကိုယ့်လက်နဲ့ကိုယ်ရွှေ့ ကိုယ်ဝန်တစ်လကျော်ပွင့်ပြီးမှ
ချိန်ထားတဲ့အချိန်နဲ့တန်လိုက်ကြရသလို
အိမ်ထောင်ကို လက်တွေ့မှာ မိန်းမထဘီနားဦးစီးရသလား
ဘယ်သမိုင်းကပေးမှန်းမသိ တာဝန်ကိုလွှဲပြောင်းယူထားသလား
ဘဝဆိုတဲ့တိုက်ပွဲမှာ ရန်သူဘယ်သူမှန်းသိရဲ့လား
ကိုယ့်ရုပ်ကိုယ်မှန်ထဲ ပြန်မကြည့်
မူးယစ်သောက်စားရခြင်းအကြောင်း ခေါင်းစဉ်ရှာ အလွယ်ကလေးရှိ
ပြစ်မှုကြီးငယ် ကျူးလွန်ပြီးရင်
လျှောက်လဲချေပစရာ ကျမ်းတစ်ပုံတစ်ပင်
ကိုယ်ထင်ရာ ကုတင်ရွှေနန်းဖြစ်ကြောင်း
အပြည့်အဝထောက်ခံထားတဲ့ အလိမ္မာစာမှာရှိပြီးသား
စပီကင်သင်တယ်၊ ကွန်ပျူတာကျွမ်းတယ်
အပြင်ထွက်မယ် ငွေပို့မယ်
.…မယ်၊….မယ်၊….မယ်
နောက်တော့ ခလုတ်ထိမယ်ဆူးငြိမယ်
ပြီးရင် မိဘမေတ္တာကို အထူးသိတတ်လာမယ်
ဇာတိချက်ကြွေပဲ အေးချမ်းပါတယ်
မိရိုးဖလာလုပ်ငန်းသာ အကောင်းဆုံးဖြစ်ပါတယ်
အဲ ဒါပေမယ့် ပျင်းတောင်ပျင်းသေးတယ်
နွားပျိုသန်လှ နွားအိုပေါင်ကျိုးပဲ
ယောက်ျားတို့လုံ့လ သေခါမှလျှော့ပဲ
လောလောဆယ်
လေနေတယ် နားထားတယ် ဘာဖြစ်တယ် ညာဖြစ်တယ်
အေးဆေးမှ ပြန်ရွေ့မယ်။

မောင်ယုပိုင်
တီဗီဖန်သားပြင်ကြီးဖွင့်လျက်
၂၀၀၉၊ ဇွန်၊ နှစ်ကာလများ။

ကို(ကိုယ်)လူပျို

ကိုယ့်အဖြစ်ကလည်း မလွယ်ဘူး
ဒင်းကလေး အရေးပေးလိုက်တဲ့အခါ
ကိုယ်ကြည်နူးမိတယ်၊ ဒင်းကလေး ဆိုတဲ့နေရာမှာ
ဖြူဖြူချောချော ငယ်ငယ်လှလှလေးပဲပေါ့၊ သဘောထားချင်းက
နောက်မှ တိုက်ဆိုင်၊ အကျင့်စာရိတ္တလေးက နောက်မှ ကောင်းမွန်
သူ့နောက်ကြောင်းကို နောက်ရွှေ့ထား
ကိုယ်တို့ ပြောနေသမျှ ပြုနေသမျှ၊ ဆိုင်ကယ်ကို
အိပ်ဇောဖြုတ်မောင်းခဲ့သမျှ၊ ဘုရားလူကြီးလုပ် ရှေ့ဆုံးက ဝတ်ဖြူ
စင်ကြယ်ခဲ့သမျှ၊
လိုင်ဘီဒိုဥာဉ်မှာ အခြေခံတယ်ဆိုလား
ကိုယ် ရုပ်ကြမ်းကြီးနဲ့ နွဲ့ခဲ့ပြီ
ကိုယ် လျှာရိုး မဲ့ခဲ့ပြီ
ကိုယ် ဒိုင်ယာလော့တွေ လွှတ်ကောင်းခဲ့ပြီ
ကိုယ်မခုပ်တတ်ကြောင်း ကြောင်ခဲ့ပြီ
ကိုယ့် ယောက်ျားမာယာ ဘယ်နှဖြာမှန်းတောင် မသိတော့ပြီ
ကိုယ် ရယ်စရာထဲက ရယ်စရာတွေပြော၊ ပုံတွေအများကြီးပြော
ဂျာနယ်ထဲက အတင်းအဖျင်းသတင်းတွေ ဖောက်သည်ပြန်ချ
ကိုယ် ခေါင်းလိမ်းဆီအပီလူး၊ မှန်ရှေ့က ခွာမရဖြစ်
အင်္ကျီတွေ တစ်ထည်ပြီးတစ်ထည်၊ အမွှေးနံသာတွေ ဆွတ်ဖြန်း
ရီဝေဝေ/ပြီတီတီ/ညုတုတု/ညို့မျက်ဝန်း/မျက်လုံးရွဲ
ကိုယ်
မျက်လုံးအမျိုးမျိုး ဖြုတ်လဲကြည့်ခဲ့ပြီ
ကိုယ့်’ဘဝ’ကတော့ တကယ်မလွယ်ဘူး

ကိုယ့် ဝမ်းနာနေတာတောင် ကိုယ်မေ့
ဝရော လုံးကြီးတင်ရောခဏငှားပြီး ဝိ
ကိုယ် လူပျိုလှည့်ခဲ့ပြီ။

မောင်ယုပိုင်
တီဗီဖန်သားပြင်ကြီးဖွင့်လျက်
၂၀၀၉၊ ဇွန်၊ နှစ်ကာလများ။

ရော/မှန်/တိ/က ကဗျာဆရာ

အလွမ်းဓာတ်ခံလေးတော့ ရှိပါတယ်
ရှိကြပါတယ်
ဒါနဲ့ ဒီအလွမ်းဓာတ်ကလေးက ဘယ်မှာလာခံ ခံလာနေတာလဲ
‘အက်စ်အိပ်ခ်ျအိုင်ပီ’ကို သင်္ဘောမဟုတ်လား ဘာကုန်တင်/ချရင်
ကောင်းမလဲ သင်စဉ်းစားနေစဉ်မှာ သင်ရထားဥသြသံလေးများ
ကြားတဲ့အခါမှာလို ဥရောပသားများ
လွမ်းလို့(အရိုး)ဆွေးပြီးလောက်ပါပြီ
(အသည်း)(ရင်ဘတ်)နှလုံး(သား)မှာ ဒဏ်ရာဒဏ်ချက်များတာလည်း ပါပါတယ်
ပါကြပါတယ်
ဆေးလိပ် အရက်အလွန်အကျွံသောက်လို့လည်း ဖြစ်နိုင်သလို
မျိုးရိုးလိုက်တာလည်းဖြစ်နိုင်သလို Boss ဘောလ်ပင်နဲ့တွေ့ပြီး
ဟတ်ထိသွားတာလည်း ဖြစ်နိုင်တာပဲ
အနုပညာဗီဇလေးရှိတာတော့ လက်ခံရလိမ့်မယ်
(စကြာတံဆိပ်ကို ကိုယ်တိုင်ဆွဲခဲ့တဲ့)ဟစ်တလာလိုပေါ့
လက်ခံချင်ပါတယ်
အဲဒါနဲ့ ကဗျာရေးတော့မယ်
ရေးခဲ့တယ်၊ ရေးနေတယ် ဆိုပါတော့
တို့ ဘယ်လိုခံစားရမလဲ
မင်းစဉ်းစားသင့်တယ်။

မောင်ယုပိုင်
တီဗီဖန်သားပြင်ကြီးဖွင့်လျက်
၂၀၀၉၊ ဇွန်၊ နှစ်ကာလများ။

အဲဒါတော့ ငါရေးလိုက်ပါတယ်

မင်းဆီကိုရည်ရွယ်ပြီး စာတွေအကြိမ်ကြိမ် ငါရေးတယ်။ ဒါပေမယ့် တစ်စောင်မှမပို့ဖြစ်ဘူး။ မပို့ဖြစ်ဘူးဆိုတာက အချို့စာတွေက ရေးပြီးမှ ငါ့အနေနဲ့ သိပ်အရေးမပါဘူး ထင်လို့။ ဥပမာ သာကြောင်းမာကြောင်း သတိရကြောင်း အဲဒီလိုဟာမျိုးတွေ၊ မင်းနဲ့ငါကြား ထူးခြားတဲ့ ဆက်သွယ်မှု ဖြစ်မလာလောက်ဘူးထင်လို့။ ဒါပေမယ့် ဒီလောက်နဲ့တော့ မင်းဆီကိုစာရေးဖို့စိတ်ကူးက ပျောက်မသွားပါဘူး။ ထပ်များရေးမိပြန်တော့လည်း ငါရေးချင်တာကတစ်မျိုး၊ ငါရေးမိသွားတာကတစ်မျိုး၊ ငါရေးတဲ့ဘာသာစကားက ငါဖြစ်နေတာတွေကို ကိုယ်စားမပြုနိုင်ဘူး။ ဟုတ်တယ် အဲဒီဘာသာစကားက ဘယ်တော့မှလည်း ကိုယ်စားပြုနိုင်မှာ မဟုတ်ဘူး။ တော်ကြာ ငါပြောချင်တာကတစ်မျိုး မင်းအနေနဲ့ တစ်မျိုးမြင်သွားမှာလည်း စိုးရတယ်။ ငါဖြစ်နေတယ်၊ ငါကြုံနေရတယ် ဆိုတာတေကလည်း တစ်ချိန်နဲ့တစ်ချိန် တစ်ကြိမ်နဲ့တစ်ကြိမ် တူတာမဟုတ်ဘူး။ ဘယ်ဟာကို ဦးစားပေး ရေးရမှန်းလည်း ငါမသိဘူး။ စာဆုံးခါနီးမှ ဆုံးသွားပြီးမှ ငါပြောချင်တာတွေ ထပ်ထပ်ပေါ်လာပြီး အဆုံးသတ်မရ ဖြစ်နေတာမျိုးလည်း ရှိတယ်။ ရေးထားသမျှအထဲက ဘယ်စာကို ဦးစားပေး ပို့ရမှန်း မသိ ဖြစ်ရတာမျိုးလည်းရှိတယ်။ ဒါနဲ့ပဲ ငါဘာစာမှ မင်းဆီမပို့ဖြစ်တာပါ။ မင်းဆီပို့လိုက်တယ်ပဲ ထားဦး။ ငါ့စာတွေ အကြောင်းအမျိုးမျိုးကြောင့် ရောက်ချင်မှရောက်မှာ။ ငါနောက်ဆုံး ရ,ထားတဲ့ မင်းလိပ်စာမှာ မင်းရှိချင်မှရှိမှာ။ မင်းမှာ လိပ်စာအပြောင်းအလဲရှိမရှိလည်း ငါမှမသိရတာ။ ဘာပဲဖြစ်ဖြစ်လေ အဲဒါတော့ ငါရေးလိုက်ပါတယ်။

မောင်ယုပိုင်
တီဗီဖန်သားပြင်ကြီးဖွင့်လျက်
၂၀၀၉၊ ဇွန်၊ နှစ်ကာလများ။

မြိတ်မြို့တွင်ပြုလုပ်သည်

ရေးတော့ မြိတ်၊ ဖတ်တော့ဘိတ်။ ဘိတ်??? ဘိတ်ဆုံးမှာနေတာလား
ဘိတ်မှာဆုံးနေတာလား
တစ္ဆေခြောက်သောအိမ်ကြီးနဲ့ မြို့ရဲ့လသာဆောင်မှာ ဆင်မြူရယ်ဝှိုက်ဖ်ရဲ့
ဖြူဖြူသဏ္ဌာန်အရိပ်တွေ၊ အချို့နိုင်ငံခြားသားတွေမြေပုံထဲမှာ ပြန့်
ကျဲနေတဲ့ အမည်မဲ့ကျွန်းတွေ
အချို့တွေရဲ့ ကမ္ဘာ့မြေပုံထဲမှာ(ခဲတံချွန်ထိပ်ဖျားလေးနဲ့တစ်ထောက်စာ)နေရာလေးမှာ

ဘိတ်သားတချို့တောင်မသိတဲ့ ‘မာဂွီး’လို့ ရေးထားတယ်
ထင်ရှားသော အလောင်းမင်းတရားအမာရွတ်နဲ့ တောင်တန်းတွေ
က အသားနည်းနည်းညိုသလိုလိုပဲနော်
ရေမြေကလည်း နည်းနည်းစိမ်းနေသေးတယ်၊ ဘာသာစကားတဝဲဝဲ
မှတ်ပုံတင်အမှတ်-
ငပိမျဉ်းစောင်းဟွန်ဒါယဉ်ကျေးမှု(မှတ်သားဖွယ်ရာမိုးရေချိန်)ရေလုပ်ငန်း
ကော့သောင်းနဲ့ထားဝယ်ဆိုတာ ဒီနားလေးတင်ပါဗျာ၊ ရှပ်ပြေးအမြန်ယာဉ်က
ပြောတယ် ရထားဆိုတာ အလုံးလားအပြားလား
မြိတ်လေ/လှေဆိပ်(ဟေ့ ဘိတ်သား လေလားလှေလား)မှာ
ပင်လယ်ကူးလေယာဉ်ကြီးတွေ၊ အပြည်ပြည်ဆိုင်ရာသင်္ဘောကြီးတွေ
ဆယ်သက်စားမကုန်တဲ့ ပင်လယ်ကြီးက ရွှေသီးသလို
သမုဒ္ဒရာထဲက တစ်ထွာပြီးတစ်ထွာအဖဲ့ခံ/အဖမ်းခံရတဲ့ ရှားပါးပင်လယ်တွေ
ကရိန်းလက်တံကြီးတွေရဲ့ ချိတ်ဖျားမှာ
ယိုးဒယားပါကင်လိုက်၊ တရုတ်ကွန်တိန်နာ၊ ဂျပန်အစီးတစ်ရာ
ပင်လယ်ကူးသင်္ဘောကြီးတွေနဲ့ အိမ်တိုင်ယာရောက် ပို့ဆောင်ပေးနေပါပြီ
ကိုကာကိုလာ၊ ဟမ်ဘာကာ၊ ဟော့ဒေါ့၊ ဆင်းဒဝစ်နဲ့ မြိတ်ကတ်ကြေးကိုက်
ယိုးဒယားကွေးတရုတ်၊ ကုလားဒန်ပေါက်၊ ရှမ်းခေါက်ဆွဲ၊ ချစ်တီးထမင်းနဲ့
တရုတ်ဟော့ပ်ပေါ့၊ ထားဝယ်မုန့်လက်ဆောင်း၊ ရခိုင်မုန့်တီ၊ ရန်ကုန်မုန့်ဟင်းခါး
ယနေ့ရနိုင်သော စားစရာများ/လူမျိုးမရွေးဘာသာမရွေး
စားသုံးရန်စီမံထားပါသည်
ဗြူတီပါလာလတ်လတ်ဆတ်ဆတ်ကြီးတွေ၊ ရေချိုကာရာအိုကေတေ
ပါကင်လိုက်ထုပ်ပိုးထားတဲ့ အရှင်လတ်လတ်အကောင်လှလှလေးတွေ
နိုင်ငံခြားဈေးကွက်ရှိတယ်လေ၊ မြောင်းထဲမှာ
ဟင်းစားရှာဖို့တဲ့ ဘယ်ရပ်ကွက်က ကျူးကျော်လာမှန်း မသိတဲ့ဟာတွေ၊
ဖက်မိုး ဆေးသုပ် ပန်းရန်လုပ်၊ ကျပန်းအလုပ်တွေမှာ အခြေကျလို့
လုပ်သက်ရင့်နေပါပြီ၊ ဘိလိယက်ခုံတွေ၊ တီဗွီဂိမ်းတွေ၊ ဆိုင်ဘာကဖေးတွေ

ဟုတ်ကဲ့ပါ၊ သရီးအင်ဝမ်းပေါ့၊ တရုတ်နဲ့ယိုးဒယားဖက်စပ်ပါ
ဆိုင်ကယ်တွေနဲ့လွဲအောင် လက်ညှိုးထိုးပါ၊ ကိုးရီးယားဇာတ်လမ်းတွဲမကြိုက်သူ
လက်ညှိုးထောင်ပါ၊ မြိတ်ကိုလက်ညှိုးထိုးရင် ကိုယ့်ဘက်ကို
သုံးချောင်းပြန်ထိုးနေတာ သိရဲ့လား၊
တန်ခိုးကြီးဘုရားနဲ့ စေတီပုထိုးများပေါ်မှာ ခုနစ်ရက်သားသမီးများစည်ကားလို့
တရုတ်ဘုံကျောင်းမှာ စာချပြီး အသားတုဆွမ်းနဲ့အလှူပွဲ
ဘုရားကျောင်းမှာ နှစ်ခြင်းခံယူ ခရစ်တော်မှာ အိပ်ပျော်လို့
ကုလားအပ်စိုက်ပွဲ၊ ကုလားကျားအက၊ တရုတ်ခြင်္သေ့အက၊ မြန်မာနဂါးအက
ဘာလူမျိုးလဲ၊ ဘယ်သိင်္ချိုင်းသွားချင်သလဲ၊ ပိတ်ရက်မရှိ တစ်လမ်းတည်း
သင့်ကြောင့်အေ့စ်မလောင်ပါစေနဲ့၊ လိင်ဆက်ဆံလျှင် ဦးထုပ်ဆောင်းပါ၊
မေးသိုင်းကြိုးတတ်ပါ မီးဘေးအန္တရာယ်ကာကွယ်ခြင်းသည် ကုသခြင်းထက်
ထိရောက်သည်၊ ဆူနာမီတုပ်ကွေး ကြက်ငှက်ငလျင်၊ ဂြိုဟ်တုစလောင်းတွေက
ကိုယ့်ဖက်လှည့်လာပြီ၊ ကမ္ဘာ့ဖလားပွဲလည်း နီးလာပြီဆိုတော့လေ
ရန်ကုန်မြို့နှင့်တစ်ပြိုင်တည်းပြသပါပြီ၊ မြိတ်မြို့
မှ နှုတ်ခွန်းဆက်သပါ၏။ ။

မောင်ယုပိုင်
တီဗီဖန်သားပြင်ကြီးဖွင့်လျက်
၂၀၀၉၊ ဇွန်၊ နှစ်ကာလများ။

PG-13 ရုပ်ရှင်

ဗြုန်းခနဲ ထွက်လာမယ်
ဘရိတ်ပေါက်လာတဲ့ ကားများ
ပျံ့နှံ့လာတဲ့ ပိုးမွှားများ
အပြာရောင်မိန်းမများ
ဘရုစ်တပ်များ၊ ဂျူဒတ်စ်များ
သွေးတရဲရဲ အစွယ်တဖွေးဖွေးများ
နားနဲ့မဆန့်တဲ့ အသံကြီးများ

ဆက်လက်ပြသနေဆဲ ကမ္ဘာကြီးမှာ
လူကြီးမင်းများ အသက်ပြည့်ဖို့ မျှော်လင့်ရပါတယ်။ ။

၂၀၀၄
မောင်ယုပိုင်
တီဗီဖန်သားပြင်ကြီးဖွင့်လျက်
၂၀၀၉၊ ဇွန်၊ နှစ်ကာလများ။