> သီဟသူ [dot] blogspot [dot] com: 2015

Oct 4, 2015

ဝိုင်ဂျီအန် '၁၅ (ဖျတ်ခနဲ ရန်ကုန်)

ရက်အနည်းငယ်မျှသာ
မိုင်ထောင်အနည်းငယ်
အဝေး
အဲဒီသောက်မီးခိုးငွေ့တွေရဲ့
အဝေး
ဒါပေမဲ့ ဒီမှာ သောက်လမ်းတွေ
ပိတ်တာကို ကျွန်တော် သောက်ရမ်းမုန်း
အနည်းငယ် စိတ်ကျဖို့ကောင်း
အနည်းငယ် ဈေးပိုသက်သာ
ဒါပေမဲ့ ပန်းသီး
ဟာ အပင်ရဲ့ဝေးဝေးကို ကြွေမကျဘူး
လူတွေဟာ ပြောင်းလဲသွားကြ
ဒါပေမဲ့ များသောအားဖြင့် ပိုလို့တော့ ကောင်းမလာ
ဒါတွေအားလုံး
မလုံလောက်ဘူး
အခု လူတိုင်း ပျံသန်းလို့ရနိုင်ပါပြီ။ ။


သီဟသူ
၂၄၊ ၀၉၊ ၂၀၁၅

ဓာတ်ပုံတွေ စကားပြောနိုင်လား။ မလုံလောက်ဘူး။ အဲဒါကြောင့် ဒီဟာကို ကျွန်တော်ရေး

ဓာတ်ပုံတွေ စကားပြောနိုင်လား။
မလုံလောက်ဘူး။
အဲဒါကြောင့် ဒီဟာကို ကျွန်တော်ရေး။



ပါ့စ်ပို့
ဓာတ်ပုံရိုက်ဖို့သွားခဲ့တိုင်း
အဖြူအမည်း
ပဲ ရိုက်ခဲ့။
ဆံပင်အရှည်၊
အမေဒေါသထွက်ရုံမျှ အရှည်၊
ကိုယ့်ကိုယ်ကို ဂေါ်တယ်
အထင်ရောက်ရုံမျှ အရှည်၊
ဒါပေမဲ့ မလုံလောက်ဘူး။
ဒါပေမဲ့ နေ့တွေကတော့
နာကျင်ရမှုကို လုံလုံလောက်လောက်
ပေးခဲ့တယ်။
လိုတာထက်ပိုခဲ့။
ဆယ်စုနှစ်
တစ်ခုကြာပြီးနောက်
ကျွန်တော်
ပိုပြီးတော့ နေလို့ကောင်း
မလာ။
ဒါပေမဲ့ အဖြူအမည်း
ပါ့စ်ပို့ဓာတ်ပုံ
ကာလာ ပါ့စ်ပို့
ဓာတ်ပုံ
ခွဲ ပြောမနေတာ့ဘူး။


သီဟသူ
၂၀၁၅၀၉၂၁

Sep 11, 2015

ဒီညနေ

မိုးရွာအပြီး
၉ကနေ၅အပြီး
အိမ်
အပြန်
လမ်းမှာ
လေချွန်
လမ်းလျှောက်ခဲ့၊
ဘယ်သူ့ကိုမှ
ဂရုမစိုက်၊
သူတို့တွေလည်း
နားကြပ်ကိုယ်စီတပ်
မျက်စိတွေလည်း
စမတ်ဖုန်းတွေကိုစိုက်ကြည့်၊
အဲဒီလိုဆိုတော့လည်း
ကျယ်နိုင်သမျှ
ကျယ်ကျယ်
လေချွန်ခဲ့။


သီဟသူ
၀၉၊ ၀၉၊ ၂၀၁၅

တနင်္ဂနွေ (အဖေနဲ့အမေသို့ တမ်းချင်း)

တနင်္ဂနွေညနေ
တံတားပေါ် လမ်းလျှောက်ထွက်
သက်ကြီးပိုင်းစုံတွဲ
သုံးတွဲ
ကျွန်တော် သတိထားမိခဲ့။

ပထမဆုံးက သူတို့
သမီးဖြစ်လိမ့်မယ်။
အဖေနဲ့ အမေ
ဟိုမှာရပ်၊ ဒီမှာရပ် ပြောပြီး
ဓာတ်ပုံရိုက်။
အဖိုးကြီးနဲ့ အဖွားကြီး
ကင်မရာရှေ့ မနေတတ်။
တည့်တည့်မကြည့်။
အမျိုးသမီး
သူ့အဖေနဲ့ အမေတို့ရဲ့ ပုံကောင်းကောင်းရဖို့
ကျွန်တော် ဆုတောင်းပါရဲ့။

ဒုတိယ
အဖိုးကြီးက အဖွားကြီးလက်ကိုဆွဲ
ဟိုမှာရပ်၊ ဒီမှာရပ်
ပြောပြီး ဓာတ်ပုံရိုက်။
အဖွားကြီး ကင်မရာရှေ့မနေတတ်။
တည့်တည့်မကြည့်။
သူတို့နှစ်ယောက်ကို
အတူတွဲ ဓာတ်ပုံရိုက်ပေးဖို့တော့
ကျွန်တော် အကူအညီမပေးမိခဲ့။

တတိယ
အဖိုးကြီးက ဓာတ်ပုံရိုက်ခါနီးတိုင်း
အဖွားကြီးကို ပြုံးဖို့ သတိပေး။
အဖိုးကြီးကလည်း ဓာတ်ပုံရိုက်တာ
ကုန်းလိုက် ကွလိုက်နဲ့ ကြိုးစားပမ်းစား။
အဖွားကြီး သဘောတွေကျ၊
အဖွားကြီး ပြုံးလို့။
ပုံတွေ ကြည့်ကောင်းမယ်ဆိုတာ
ကျွန်တော် လုံးဝ သံသယမရှိ။

ကျွန်တော်
အဖေနဲ့ အမေ
သတိရမိ။
ပထမ အဖိုးကြီးနဲ့ အဖွားကြီး
စုံတွဲကို တွေ့လိုက်ကတည်းက။

ဟိုဟိုဒီဒီ
ဓာတ်ပုံရိုက်ပြီး
ကျွန်တော်လည်း အိမ်ပြန်ခဲ့။
အဖေနဲ့ အမေ့အိမ်
အဝေးက အိမ်။

လမ်းမှာ ကျွန်တော် တွေးမိတယ်။

ဘဝနဲ့ သေခြင်း
အကြောင်း။

များသောအားဖြင်ကတော့
သေခြင်း။


သီဟသူ
၃၀၊ ၀၈၊ ၂၀၁၅

Aug 14, 2015

ဖြစ်တည်မှု (၅)

အခု မြေနီကုန်းမှာ၊ ဖတ်လက်စ စာအုပ်
၂၃.၃% ပြီးတော့ ၂၄%
လက်ကျန် ဘက်ထရီ
ညနေ ၁၉:၃၁

ရထားထဲ ဒီမျက်နှာတွေချည်း
ဒါပေမဲ့
ပြီးတော့ ကျွန်တော်လည်း အပါအဝင်

ဝတ်စုံမဝတ် ဂျင်းပင်ဝတ်
ဒါပေမဲ့ ကျွန်တော်လည်းပဲ လခစား

ဒီလိုနေ့တွေမှာ
ဘတ်စ်ကားဟာ အချိန်မှန်
ပြီးတော့ ရှေ့တည့်တည့်လာရပ်

လေယာဉ် ပထမတန်း
ကတော့ မစီးဖူးဘူး

အသက်၁၆နှစ်မှာ
အိမ်ကနေ ထွက်
မပြေး အဲဒီကတည်းကသိခဲ့
အမေ့အိမ်ထမင်း အိမ်ဟင်းသာ
အကောင်းဆုံး

ကဗျာ
ဖတ်တဲ့အခါ ဖတ်နေတာ
ကဗျာ
လို့ တင်ကူးစိတ်နဲ့
ဖတ်တယ်

ဒါဆို
ဒီဟာကော...

သီဟသူ
၂၈၀၇၂၀၁၅

Jul 18, 2015

အဲဒါ/အတွက်/တစ်ခွက်

အဲဒါ
အတွက်
တစ်ခွက်


ချင်းတွင်း
တစ်အုပ်
တစ်လေ
ရလို့
ကောက်ဖတ်
ယခင်
လမှ
အဆက်
ဆိုတာ
တွေ့လိုက်
ရတဲ့
အခါ
အဲဒါ
အတွက်
တစ်ခွက်။
ပန်းဆိုး
တန်းစာ
အုပ်ဆိုင်
သတိ
ရတဲ့
အခါ
အဲဒါ
အတွက်
တစ်ခွက်။
ကျစိမ့်
ကျောက်မြောင်း
သတိ
ရတဲ့
အခါ
အဲဒါ
အတွက်
တစ်ခွက်။
ကျွန်တော့်
အမှတ်
ရခြင်း
အများ
အပြား
အဲဒါ
တွေ

တွက်
...


သီဟသူ
၂၀၁၅၀၇၁၇

Jul 11, 2015

ဖြစ်တည်မှု (၄)

မနေ့က ကျွန်တော် အင်္ကျီအသစ်တစ်ထည်ရတယ်။
စာအုပ်တွေ၊ ကျွန်တော်ကြိုက်တဲ့ စာအုပ်တွေဟာ
ကျွန်တော့်အတိတ်နဲ့ စပ်ဟပ်လို့ရတာမျိုးတွေ။
ကျွန်တော် ဘာကိုကြိုက်မိမယ်
လုံးဝမတွေးတတ်ဘူး

အနာဂတ်မှာ။ နာမည်
ကို မမေ့ဘူး။
ဒါပေမဲ့ သူမရဲ့မျက်နှာ
လုံးဝဗလာ
အခု၊ ကျွန်တော့်မှတ်ဉာဏ်ထဲမှာ။

ကျွန်တော့်ရဲ့ ပီစီကို ဖောမတ်မချခင်
ဘက်ကပ်လုပ်တော့
ဖိုင်တွေ
အများကြီး
လုံးဝအရေးမကြီး

ကျွန်တော့်အတွက်။ ဒါတောင်မှ
အချိန်အကြာကြီး
ကျွန်တော်သိမ်းထားခဲ့။
ပြီးတော့ ဖြုန်းတီးခဲ့
မှတ်ဉာဏ်

နေရာတွေ။ ဒီနေ့၊ ကျွန်တော်
နေလို့ထိုင်လို့ကောင်း
ကျွန်တော့်မှတ်ဉာဏ်ကို
ဖောမတ်ချခဲ့ပြီး ဆံပင်ညှပ်ခဲ့ပြီး
မနေ့ကအင်္ကျီအသစ်ကို ဝတ်ဆင်ခဲ့။

သီဟသူ
၂၀၁၅၀၇၀၃

ငါ့လူငယ်ဘဝကို ဖော်ပြမယ့် တီရှပ်

-၁-
ငါကြိုက်တဲ့ သေနတ်များနဲ့ နှင်းဆီပန်းများ
ဒါမှမဟုတ်
ခပ်မိုက်မိုက် စာသားနဲ့
ဒါမှမဟုတ်
'ချေ'
ဒါမှမဟုတ်
'ကတ်'
ဒါမှမဟုတ်
ပလိန်းသက်သက်

ဒါပေမဲ့
အနက်ရောင်။ ။


-၂-
 လျှော်တာများပြီး အရောင်လွင့်
စတစ်ကာလည်း သိပ်မကျန်

"နင့်အင်္ကျီက အရောင်တောင်မပေါ်၊
စုတ်တီးစုတ်ဖတ်နဲ့"

အမေက မဝတ်ဖို့ပြောလည်း
ပြန်ပြန်ဝတ်

ငါ့အတွက်တော့
ဆေးသားအပြည့်နဲ့
အနက်။ ။


-၃-
အနက်ရောင်
တီရှပ်ပေါ်
အဖြူရောင်
သင်္ဘောဆေး
ΝIИ
လိုဂို
စပရေးဖျန်း
ကိုယ်တိုင်လုပ်
တီရှပ်
ငါဝတ်ခဲ့။

ငါအိမ်ကထွက်လာတော့
အဲဒီတီရှပ်
ငါနဲ့အတူ ပါမလာခဲ့။

ဒီတစ်ခေါက်
အိမ်အပြန်
ငါ့အဖေ
အရောင်မရှိတော့တဲ့
ငါ့ ΝIИ တီရှပ်
ကိုဝတ်ပြီး ကားရေဆေးနေတာ
ငါတွေ့ခဲ့ရ။

အရောင်မရှိတော့တဲ့
ငါ့ ΝIИ တီရှပ်ဟာ

ငါ့မျက်စိထဲမှာ
ငါ့လူငယ်ဘဝ၊
ဟုန်းဟုန်းတောက်
အနက်ရောင်တွေနဲ့။ ။

သီဟသူ
၂၀၁၅၀၇၀၁

သို့/ ဗျူကောင်းစကီး (၄)

လွန်ခဲ့တဲ့ များမကြာသေးမီကာလအထိ
ဦးလေးကြီးကို ကျွန်တော်
မသိဘူး။ ဘယ်သူလဲ

ဗျူကောင်းစကီးဆိုတာ။ အခု
ကြည့်လိုက်ပါဦး ဒီမှာ
ကျွန်တော် ဦးလေးကြီးဆီ

စာတွေဘာတွေရေးလို့။
ပြောချင်တာက ဒီနေ့
ကျွန်တော် အခမဲ့ညစာ၊

ဝိုင်တစ်ပုလင်း
လက်ဆောင်အဖြစ် ရခဲ့တယ်။
ချီးယားစ် ဦးလေးကြီး၊

များမကြာသေးမီကာလအထိ
ကျွန်တော်မသိခဲ့တဲ့
ဗျူကောင်းစကီး။

သီဟသူ
၁၄/၀၃/၂၀၁၅

သို့/ ဗျူကောင်းစကီး (၃)

ဘီယာ ၄ပိုင့်
အကုန် ဆိုင်ကပြန်
ပိုက်ဆံအိတ်ထဲ ရထား
လက်မှတ်ကတ်၊ ၂ဒေါ်လာ၊ နောက်ဆုံးအိမ်
အပြန် ရထားပေါ် ကောင်မလေး
ပေါင်၊ ခြေသလုံး - ခြေထောက်နှစ်ဖက်လုံး
အမာရွတ်တွေ

၀၀၂၃နာရီ
ဦးလေးကြီးလို ခြေထောက်
စိတ်ဝင်စားသူ
ဘာရေးဖြစ်မယ်
ကျွန်တော်
မသေချာ

"ကောင်လေးရ၊
အမာရွတ်တွေအကြောင်း ငါ
ရေးပါ့မလားကွ။"လို့ ပြောမှာ
သေချာ

၀၀၂၃နာရီ
ဦးလေးကြီး ထပ်သောက်ဖို့လုပ်ဦးမယ်
အသေအချာ။ ။

သီဟသူ
၂၆/၀၂/၂၀၁၅

သို့/ ဗျူကောင်းစကီး

မနေ့ကသောက်ခဲ့တဲ့ ဘီယာ
၂.၆လီတာရဲ့
ကယ်လိုရီပမာဏကို
တွက်ချက်ပြပါ။

ဒါမှမဟုတ်

"ကောင်လေးရ၊
မင်းသောက်တာ
နည်းလွန်းသကွ။"လို့
ပြောလိုက်စမ်းပါ။

သီဟသူ
၀၆/၀၂/၂၀၁၅

သို့/ ဗျူကောင်းစကီး (၂)

နောက်တစ်ဆိုင်ပြောင်းတော့ ဘီယာ
အမည်ပြောင်းသွားတယ်
စားပွဲထိုးကောင်မလေး ပြောင်းသွားတယ်။
မပြောင်းလဲတာကတော့. . .

ဒီအနေအထားရောက်လာရင်
"ကောင်လေးရ၊
သိပ်မတွေးနဲ့ကွ
သောက်သောက်။"လို့
လာပြောလှည့်ပါ။ ။

သီဟသူ
၀၇/၀၂/၂၀၁၅

မွေးနေ့သီချင်း

တစ်ခါတစ်လေ ဝမ်းနည်းဖို့ကောင်းစရာဖြစ်ပေမဲ့
ဒါမျိုးကလည်း
ဖြစ်တတ်ပါတယ်

မဖန်တီးနိုင်တဲ့အခါ
ဘာသာပြန်တယ်

ကဗျာနဲ့
ဝန်ဆောင်မှုပေးဖို့ကို
ငြင်းဆန်ပိုင်ခွင့် ကျုပ်မှာရှိတယ်

သီဟသူ
၃၁/၀၅/၂၀၁၅
ရန်ကုန်

Jun 14, 2015

ဖြစ်တည်မှု (၃)

ကားဒက်ရှ်ဘုတ်ပေါ်မှာ ပိတောက်ပန်း
ယာဉ်ကြောပိတ်ဆို့မှု
မြင်နေကျ ဆိုင်းဘုတ်/သက်ပြင်းများ

ကျနော့်မိဘတွေ
ဘဝကို ရိုးရိုးရှင်းရှင်းနေထိုင်
ဒါတောင်မှ သူတို့မှာ ဆင်းမ်ကတ် ၄ကတ်

တစ်ယောက်ကို ၂ကတ်စီ
ဖုန်းအားသွင်းကြိုးများ
ဖုန်းငွေဖြည့်ကတ်များ

ခွေးတစ်ကောင်
ဒါမှမဟုတ် နှစ်ကောင်လောက်မွေးဖို့
သူတို့ကို အကြံပေးခဲ့တယ်

နောက်တစ်ခေါက် ထပ်မံနှုတ်ဆက်
တွေ့ကြမယ်လေ
နောင်ပြန်တွေ့ကြရင်ပေါ့

သီဟသူ
၁၂/၀၆/၂၀၁၅

Apr 28, 2015

ဖြစ်တည်မှု (၂)

လူတွေဟာ စိတ်ဝင်စားဖို့ ကောင်းတယ်။
သူတို့ရဲ့ သောက်တလွဲတွေက
ခင်ဗျားကို မပျင်းရိစေသေးတဲ့အထိ။

ကျုပ်တွေ့ခဲ့တဲ့ လူတစ်ယောက်၊
ယာကူဇာ
ဂိုဏ်းဝင်ဖို့ ကမ်းလှမ်းခံခဲ့ရတယ်၊
သူပြောတာပဲ။

နောက်တစ်ယောက်၊
ဘာလဲဆိုတာ
ကျုပ် မမှတ်မိတော့။

ဒါပေမဲ့
သောက်တလွဲတွေနဲ့ လူတွေဟာ
စိတ်ဝင်စားဖို့ကောင်းတယ်၊
ခင်ဗျား သူတို့ကို မငြီးငွေ့သေးသရွေ့။ ။

သီဟသူ
၂၇-၀၄-၂၀၁၅

ဖြစ်တည်မှု

ဂျင်း သုံးထည်
သိပ်များလား။
ကျွန်တော်တော့ မထင်ဘူး။
နှစ်ထည်က
ဂွမှာပါးနေ။
နှုတ်ခမ်းမွှေးရိတ်ဖို့လိုနေပြီ။
မနေ့က ရှပ်နှစ်ထည်
လျှော်လိုက်တော့
ဒီနေ့ဝတ်ထားတာက
နောက်ဆုံးသော လျှော်ပြီးသား
အင်္ကျီ။ စီးတဲ့ဖိနပ် ပေါ်လစ်တိုက်ဖို့ အထူးလိုအပ်။
ဖနောင့်တွေက တစ်ဖက်တည်းစားနေတော့
ခွာလဲဖို့လည်း လိုအပ်နေ။
အိမ်ကို ဖုန်းခေါ်တယ်၊
အဖေက ဖုန်းမြည်သံဆုံးတဲ့အထိ
အိမ်နောက်ဖေးခြံထဲ ပေါင်းနှုတ်နေ။
အခု ကျွန်တော်
သွားပိုးစားတာ ၅ပေါက် ရှိနေပြီ။
ကော်ဖီ လျှော့သောက်ဖို့လည်း
သတိပေးခံထားရ။
'၁၅မှာ အခုထိ
ကောင်းနေတာက
ခွင့်မဲ့ပျက်ကွက် ၂ရက်ရှိပေမဲ့
လခ အပြည့်ရတာပဲ။ တကယ်လို့
ပြင်သစ်ဝိုင် ကောင်းတယ်
ထင်ရင် ခင်ဗျား
သူတို့ရဲ့
ဘီယာ
သောက်ကြည့်သင့်တယ်။

သီဟသူ
၂၇-၀၄-၂၀၁၅

ရိုးရိုးသားသားကမ္ဘာ

ရိုးရိုးသားသားကမ္ဘာ-၁

ဖရဲသီးတစ်လုံးလုံး
တစ်ယောက်တည်း
စားရဖို့
အိပ်မက်ခဲ့ဖူး



ရိုးရိုးသားသားကမ္ဘာ-၂

ဘောလုံးပွဲမှာ
ဘောလုံးကောက် ကောင်လေးတစ်ယောက်
အဖြစ်နဲ့ ဘောပွဲကြည့်ရဖို့
အိပ်မက်ခဲ့ဖူး



ရိုးရိုးသားသားကမ္ဘာ-၃

စနေနေ့တွေမှာ
အမေကြော်တဲ့ ကြက်သားကြော်ဒယ်အိုးကနေ
ဦးဦးဖျားဖျားကျွေးတဲ့ ကြက်အရေပြားကြော်လေးတွေ အမြဲစားရဖို့
အိပ်မက်ခဲ့ဖူး



ရိုးရိုးသားသားကမ္ဘာ-၄

လူပျိုဖြစ်ရင်
အပြင်ဘော်ဒါဆောင်မှာနေမယ်၊ ဘေးအခန်း
နှစ်ဖက်မှာ စာပေသမားတွေ (သူတို့မှာ လျှို့ဝှက်ထားတဲ့ အတိတ်နဲ့) ဖြစ်မယ်လို့
အိပ်မက်ခဲ့ဖူး


သီဟသူ
၄/၂၀၁၅

Apr 4, 2015

သို့/ ဗျူကောင်းစကီး (၅)

ဦးလေးကြီးရဲ့ ပေးစာအဟောင်းတွေကို
ကျွန်တော် ဖတ်နေတယ်။ အိုအိုး တော်တော်လည်း
စကားများတဲ့ အမူးသမား ဦးလေးကြီးပါလား။

စကားပြောဖို့ / စာရေးဖို့
လူတွေရှိနေတာ
ကောင်းတာပဲ။

ဒီမှာ ကျွန်တော်ကတော့
ဦးလေးကြီးဆီ စိတ်ကူးယဉ်ပေးစာတွေ
ရေးလို့။ စာတစ်စောင်မှ မပို့ဖြစ်ဘူး

ကျွန်တော့်ရဲ့ သူငယ်ချင်းတွေဆီ။
စကားစမြည်တော့ ပြောဖြစ်ရဲ့။ ဒါပေမဲ့
ကျွန်တော် ပျင်းအားကြီး၊

ဂျီတော့ခ်က ချက်လော့တွေ၊
ဖေ့ဘုတ်က မက်ဆေ့တွေ၊
ပြန်ရှာဖတ်ကြည့်ဖို့။ ဒီအတိုင်းဆို

ဦးလေးကြီးဆီ မကြာခင်အတွင်း
(မကြာခဏ) စာရေးဖြစ်ဦးမယ်ထင်တယ်။
ကျန်းမာရေး ဂရုစိုက်ပါ။ ။

သီဟသူ
၂၉/၀၃/၂၀၁၅

Mar 27, 2015

ချာတိတ်ဘဝ-၆

ဆူးလေဘုရားအနီး
မဟာဗန္ဓုလပန်းခြံနားက
စားသောက်ဆိုင်လေးထဲမှာ
ပထမဆုံး ဘီယာတစ်ကျိုက်ကို
"စ"သောက်ဖြစ်တော့ "ခါးလိုက်တာ"
လို့ သောက်ပြီးပြီးချင်း ခွက်ကို စားပွဲပေါ်ချ
ပြောမိတော့ ကျွန်တော့်သူငယ်ချင်း
ပြုံးပြုံးကြီးနဲ့ ကျွန်တော့်ခွက်ကို
ယူ"ရှင်း"လိုက်လေရဲ့။
ကျွန်တော်ကတော့
အမြည်း ကန်စွန်းရွက်ကြော်ကိုပဲ ဆက်မြည်းခဲ့။

အခု၊ ဆယ်စုနှစ်တစ်ခုအကြာမှာ
ကျွန်တော့်လျှာဟာ အရသာခံနိုင်စွမ်း
ဖွံ့ဖြိုးလာခဲ့၊ ခါးသက်မှု ချိုမြိန်မှု
ဆိုတာ ပုဂ္ဂလိကရွေးချက်မှုသက်သက်သာဖြစ်ကြောင်း
ကိုယ်သိ သိ။ နောက်ထပ်အကြိမ်ကြိမ်
ကူးလို့ရနိုင်တဲ့ အမျိုးမျိုးသော ဘီယာမြစ်ထဲ
ကျွန်တော်၊ ဆူးလေဘုရားအနီး
မဟာဗန္ဓုလပန်းခြံနားမှာ ရှိခဲ့ဖူးတဲ့
စားသောက်ဆိုင်လေးထဲက နေ့လည်ခင်းကို
ပြန်လည်
ရှာဖွေနေ။ ။

သီဟသူ
၁၉/၀၃/၂၀၁၅

ချာတိတ်ဘဝ-၅

အဲဒီတုန်းက မန္တလေး
ဆောင်းမနက်တွေမှာ ကျွန်တော်
ထရပ်စုဝတ်၊ ဝေါကင်းရှူးစီး၊ မြစ်ကြီးနားက
အဖေဝယ်လာခဲ့တဲ့ သားမွှေးဦးထုပ်ကိုဆောင်း၊
အဖေ့ဆိုင်ကယ်ရှေ့မှာ ထိုင်ပြီး
တိမ်မိုးလွင်ကို သွားကြတယ်။

မန္တလေးဆောင်းမှာ ဆိုင်ကယ်ရှေ့
ထိုင်စီးတဲ့အခါ ဘယ်လောက်အေးသလဲဆို
ဆယ်တန်းမှာသင်ရတဲ့
အချုပ်တန်းဆရာဖေရဲ့ မန်းတုန်အောင်
လမ်းဆုံကဟစ်ချင်တာကို ဆရာမ ရှင်းပြတာ
မလိုအောင် လုံလောက်စေခဲ့။

အဲဒီတုန်းက မန္တလေးတောင်
အနောက်ဖက် မြင်းပြိုင်ကွင်း မျက်နှာချင်းဆိုင်
တိမ်မိုးလွင်မှာ လက်ဖက်ရည်ကို
လက်ဖက်ရည်ပန်းကန်ပြားထဲ
ထည့်၊ အေးအောင်မှုတ်ပြီးသောက်၊
မလိုင် နံပြားစား။

ဒီတစ်ခေါက်
တိမ်မိုးလွင်ကို
ဖြတ်သွားရင်း
ထိုင်ဦးမလား
အဖေကမေးတော့
ဟင့်အင်းလို့သာ ဖြေမိ။

တိမ်မိုးလွင်ဟာ
ဆိုင်းဘုတ်မှာသာ တိမ်မိုးလွင်
ကျွန်တော် ထရပ်စုဝတ်၊
ဝေါကင်းရှူးစီးပြီး သွားခဲ့တဲ့
တိမ်မိုးလွင်
မဟုတ်တော့။ ။

သီဟသူ
၁၇/၀၃/၂၀၁၅

ချာတိတ်ဘဝ-၄

အဲဒီတုန်းက ကျွန်တော်စက်ဘီးစီးကျင့်ခဲ့တဲ့လမ်းဟာ အကျယ်ကြီး
အဲဒီလမ်းမှာ တော်တော်မတ်တဲ့ကုန်းတက်တစ်ခုရှိတယ်
အဲဒီကုန်းတက်မှာ နင်းရတာတော်တော်မောတယ်။ မှတ်ဉာဏ်
အလွှာအထပ်ထပ်မှာ ဒီအမှတ်ရမှုက ဟိုးအောက်ခြေနား
ဒါပေမဲ့ ကြည်လင်နေဆဲ။ ဓာတ်ပုံသက်သေမရှိဘူး
အဲဒီတုန်းက ဖလင်စျေးကြီးတယ်။

ပြီးခဲ့တဲ့နှစ် ကျွန်တော်ပြန်ရောက်ခဲ့တယ်/အရောက်ပြန်သွားခဲ့တယ်
ကျွန်တော့်အတွက် အကျယ်ကြီးကျယ်ခဲ့တဲ့လမ်းဟာ
ကားနှစ်စီးသွားစာပဲရှိတာပဲ။
တော်တော်မတ်တဲ့ ကုန်းတက်၊ ကျွန်တော်သိခဲ့
အကြိမ်ကြိမ်နင်းတက်ခဲ့တဲ့ မတ်စောက်သောကုန်းတက်ကြီးဟာ
နိမ့်နိမ့်လေးပါလား။ သားမှတ်မိသလိုလဲမဟုတ်ပါလား။

အဲလိုပြောမိတော့ အဖေကရယ်တယ်။
အဖေ့ရယ်သံမှာ/ဟာ
ကျွန်တော် ချာတိတ်
သေးသေးလေးတစ်ယောက်ဖြစ်ခဲ့ကြောင်း သက်သေခံနေတယ်။
ဓာတ်ပုံသက်သေမလိုဘူး။ အခု
ချာတိတ်တစ်ယောက် ကြီးပြင်းခဲ့ပြီ မေမေရယ်*

သီဟသူ
၂၄/၀၂/၂၀၁၅
* ကောင်းကင်မေမေ၊ သုခမိန်လှိုင် (ကလေးလေးတစ်ယောက် ကြီးပြင်းခဲ့ပြီ မေမေရယ် စာသားကို ယူသုံးပါတယ်)

Feb 15, 2015

ချာတိတ်ဘဝ-၃

ချာတိတ်ဘဝဟာ
ဖြစ်နိုင်ခြေတွေအပြည့်နဲ့။

ကျနော့်ကမ္ဘာကြီး ပိုငြိမ်းချမ်းပြီး
ကျနော်ရှူတဲ့လေထု ပိုလတ်ဆတ်တယ်။

ကျနော့်အခန်းနံရံမှာ
အေကေ၄၇ နဲ့ အမ်၁၆ တစ်လက်စီရှိခဲ့တယ်။

လူကြီးတွေမေးလိုက်တိုင်း
တစ်နေ့ အင်ဂျင်နီယာလုပ်မယ်၊ နောက်တစ်နေ့ စစ်ဗိုလ်လုပ်မယ်။

အဲလို
အမျိုးမျိုးသော ဖြစ်နိုင်ခြေတွေနဲ့ အိပ်မက်

ကျနော်မက်ခဲ့၊
ပြန်မက်ချင်နေဆဲ။ ။

သီဟသူ
၁၄/၀၂/၂၀၁၅

Feb 14, 2015

မေးခွန်းများ

ငါရေကူးဖြစ်ခဲ့တဲ့နှစ်တွေတုန်းက ရေကူး
ကန်ကအပြန်လမ်းမှာ ပြေး
သူတို့ကိုမြင်တိုင်း တွေးမိတယ်။ ဘာလို့
သူတို့တွေ ပြေး
ကြသလဲ။

နောက်တော့ ငါလည်း ပြေးဖြစ်လာတယ်။

ခုတစ်ခါရေပြန်ကူးဖြစ်တော့ ရေကူး
ကန်ကအပြန် ပြေး
သူတို့ကိုမြင်ရင် မေးခွန်း
မထုတ်ဖြစ်တော့ဘူး။

ရောက်ရှိခဲ့၊ ပြုလုပ်ခဲ့ပြီး။

လက်ထဲက ဝီစကီ
လက်နှစ်လုံးကတော့ သောက်တိုင်း
ဘဝ၊ ချစ်ရမ္မက်၊ မိသားစု၊ အသက်ရှင်/သေမှု၊
စိတ်ခံစားချက်များ၊ မေးခွန်းများထုတ်လေ့ရှိတယ်။ အထပ်ထပ်
မေးတဲ့ မေးခွန်းကတော့ နောက်ထပ်
ယူဦးမလား လက်နှစ်လုံးစာ
ဝီစကီ။

သီဟသူ
၂၇/၀၁/၂၀၁၅

ဘား

သောက်ခဲ့တဲ့ခွက်
အရေအတွက် မမှတ်မိတော့ဘူး။
ဘီလ်မှာ တစ်ယောက် လက်မှတ်
ထိုးပေးလိုက်တယ်။
စာရင်း
မှန်တယ်လို့ တစ်ယောက်က
တော်တော်ကြာမှ
ဝင်ပြောတယ်၊ ခေါင်း
ငိုက်စိုက်ကျနေပြီ။ မဝသေးဘူး
တစ်ယောက်က ပြောတယ်။
"လမ်းအတွက် တစ်ခွက်"
မှာလိုက်တယ်။ မဝသေးဘူး။
ပြန်ဖို့ တက္ကစီပေါ်အတက်
ကားသမားကို အော်
ပြောလိုက်တယ်။ အနီးဆုံး
ဘား
သွားမယ်။

သီဟသူ
၂၇/၀၁/၂၀၁၅

ချာတိတ်ဘဝ-၂

အဲဒီတုန်းက ကျနော့်မှာ နားပေါက်၊
လီဗိုက် ၅၀၁၊ ဒါမှမဟုတ်
ဆေးလိပ်သောက်ကျင့်
မရှိဘူး။ ဆံပင်ရှည်
ရှိတယ်။

ကိုယ့်ကိုယ်ကို မိုက်တယ်
ထင်တယ်။ တကယ်တော့ မဟုတ်ဘူး။

နောက် ခင်ဗျားတို့လည်းတွေ့ရတဲ့
"၁၀နှစ်ကြာသော်"
ရုတ်တရက် စာတန်းထိုး။
အခု ဒီမှာ ကျနော်

လက်ထဲမှာ သောက်စရာတစ်ခွက်၊
ပျောက်သွားတဲ့ ၁၀နှစ်အတွက်
အမှတ်ရစိတ်

သောကြာညနေတိုင်း။ ။

သီဟသူ
၁၃/၀၂/၂၀၁၅

ချာတိတ်ဘဝ

ဒီနေ့ကျနော်ဟာ ချာတိတ်ကျနော်
အသက်ကြီးလာတာ
ဒါကတော့ သေချာတယ်။
ဖတ်ခဲ့တဲ့ စာအုပ်တွေ၊
နားထောင်ခဲ့တဲ့ သီချင်းတွေ၊
ကြည့်ခဲ့တဲ့ ရုပ်ရှင်တွေ၊ သူငယ်ချင်းတွေ၊
ကြီးပြင်းခဲ့ ပတ်ဝန်းကျင်
အသိုင်းအဝိုင်း၊ နောက်ဆုံး
အမေနဲ့ အဖေ
ရန်ဖြစ်တာက အစ
ဒါတွေကို ပြန်ပြန်ပြီး သတိတရ။

ကျနော့်ချာတိတ်ဘဝဟာ သီးသန့်၊
ကျနော့်ချာတိတ်ဘဝဟာ သူများတွေထက် ထူးမခြားနား။

အခုကျနော်လုပ်နေတာ
ချာတိတ်ဘဝကအကျင့်အတိုင်း လုပ်ခဲ့ဖူးတာတွေ ထပ်ကျော့၊
နောက် ချာတိတ်ဘဝက မလုပ်ခဲ့ရတာတွေ အတိုးချလုပ်။

ဘဝမှာဖြစ်ချင်တာကလည်း
ချာတိတ်ဘဝကို ထပ်ပြန်ကျော့၊ မတူအောင် နောက်ထပ်
ပြန်ကျော့ချင်တာရယ်၊ ဘာမှ
မဖြစ်ချင်တော့တာရယ်။

သီဟသူ
၁၂/၀၂/၂၀၁၅

အိမ်ထောင်စုဇယား၊ အိမ်ခန်းဖွဲ့စည်းပုံနှင့် မိသားစုဓာတ်ပုံ

အိမ်လိပ်စာပြောင်းတိုင်း အိမ်ထောင်စု
ဇယားမှာ လိုက်ပြောင်းရတယ်။ ဒါပေမဲ့
လူတွေပြောင်းမသွားဘူး။ ဒါပေမဲ့ အိမ်ပြောင်းရတော့
အခန်းဖွဲ့စည်းပုံတွေ ပြောင်းသွားတယ်။ ဒါပေမဲ့
နံရံမှာ ဓာတ်ပုံတွေချိတ်မြဲ။ ဒါပေမဲ့
ကြာလာတော့ ဓာတ်ပုံတွေ
ဆေးသားပြယ်လာတယ်။ ဒါပေမဲ့ ပြောင်းမသွားဘူး
မိသားစု။ ။

သီဟသူ
၁၁/၀၂/၂၀၁၅

Jan 3, 2015

တနင်္ဂနွေစကား-၄

ပြန်မလာ ဒီအတိတ်
ဘီယာဟာ အရက်တော့မဟုတ်ပါ ရီဝေညများ

ထပ်ခိုးလေးပေါ်က ရီဝေညများ
နိုင်တီတူး နှပ်ဆေး ရီဝေညများ

အချစ်ရွာ၊ လမ်းနဲ့အလွမ်း၊
လက်ဖက်ရည်ရိုးရိုး၊ ကျောက်မြောင်းရီဝေညများ

ဘီယာဟာ အရက်တော့မဟုတ်ပါ
ဘီယာဟာ အရင်လို မခါးသက်တော့ပါ

သတိရတုန်း ချရေးမိ
စကားလုံးများ

သီဟသူ
၀၇-၁၂-၂၀၁၄

Jan 1, 2015

ဒိုင်ယာရီ ၂၀၁၄

သွားမတိုက်ပဲ အိပ်ပျော်သွားခဲ့ရင် အပြစ်ရှိသလို အမြဲခံစားရတယ်။
လူ့မျက်စိဟာ ကင်မရာမှန်ဘီလူးဆို ၄၃မမ ဖြစ်လိမ့်မယ်။ ငါ့ဖုန်းက ကင်မရာမှန်ဘီလူးက ၂၈မမတဲ့။
နေ့လည်စာစားပြီး ရုံးစားပွဲပေါ်မှောက်မအိပ်ခင် ပြက္ခဒိန်ပေါ်က ဒီနေ့နေ့စွဲကို ကြက်ခြေခတ်လိုက်တယ်။
ရိုက်ပြီးသား ဖလင်လိပ်များ ဆေးဖြစ်ရန် မသေချာသေး။

သီဟသူ
၀၇-၁၂-၂၀၁၄