> သီဟသူ [dot] blogspot [dot] com: January 2010

Jan 19, 2010

စနေ နေ့တစ်ဝက် (၂)

ဂြိုဟ်သိမ် ဂြိုဟ်မွှား ဂြိုဟ်ပဲ့ကနေ အလင်းအထိ
အငမ်းမရ
စုပ်ယူထားခဲ့တဲ့
တွင်းနက်တစ်ခုလို ငါ

အပေါ်ယံ ငြိမ်သက်နေပေမယ့်
အတွင်းမှာ လှိုက်
ဆူပွက် လောင်ကျွမ်းနေတဲ့
မီးတောင်တစ်ခုလို ငါ

စုပ်ယူ လောင်ကျွမ်းထားခဲ့သမျှ
ပြန် အန်ထုတ်လိုက်တဲ့အခါ
ငါ့ ဂစ်တာလေး
ကြိုးပြတ်သွားခဲ့ရ...

သီဟသူ
၂၊ ၁၊ ၂၀၁၀

အော်သံ

မြည်နေတယ်
အော်သံ
စာမျက်နှာထက်ကနေ
ပန်းချီကားထဲကနေ
မျက်ဝန်းထဲကနေ
အော်သံ
မြည်နေတယ်

အော်သံ
ကြားနေရတယ်
စာလုံးတွေ/ဘာသာစကားတွေကတဆင့်
အရောင်/အရိပ်တွေကတဆင့်
ဆုံလိုက်မိတဲ့ အကြည့်တွေကတဆင့်
ကြားနေရတယ်
အဲဒီ့
အော် သံ ကြီး ကို...

သီဟသူ
၃၀ ၊၁၂၊ ၀၉

Jan 9, 2010

အိပ်ပျော်နေသော ကယ်တင်ရှင်များ

သူတို့ အိပ်ပျော်နေကြတယ်။ သူတို့ဟာ ကယ်တင်ရှင်တွေပေါ့။ သူတို့ဟာ နတ်ဒေဝတာရဲ့ အစိတ်အပိုင်းဖြစ်သလို ကောင်းကင်ဘုံရဲ့ တစ်စိတ်တစ်ဒေသလည်းဖြစ်တယ်။ သူတို့ အိပ်ပျော်နေကြတယ်။ သက်တံခုံးရဲ့အောက်မှာ။ သူတို့ဟာ အိပ်ပျော်နေတဲ့ ကယ်တင်ရှင်တွေပဲ။ ဒုက္ခဘုံထဲက လူသားတွေဟာ တစ်ခါတစ်ရံမှာ တောက်ပတဲ့ သက်တံခုံးကြီးကို တွေ့မြင်ကြရတယ်။ ဒါပေမဲ့ သူတို့ဟာ သက်တံခုံးကြီးအောင်မှာ ဘာတွေရှိမလဲဆိုတာကို မသိကြဘူး။ လူသားတွေဟာ နေ့အခါမှာ ရယ်မောကြပြီး ညအခါမှာ ငိုညည်းကြတယ်။ လူတို့ဌာနေမှာ နေ့အခါ ရယ်သံတွေထွက်ပေါ်လာတတ်ပြီး၊ ညအမှောင်မှာ ငိုညည်းသံတွေ ထွက်ပေါ်လာတတ်တယ်လေ။ နေ့မှာဖြစ်စေ၊ ညမှာဖြစ်စေ၊ ရယ်မောသံပဲဖြစ်စေ၊ ငိုညည်းသံပဲဖြစ်စေ အဓိပ္ပာယ်ကတော့ အတူတူပါပဲ။

သူတို့ မလွတ်မြောက်ကြသေးဘူး။ နေ့မှာညမှာ သူတို့ဆီက ထွက်ပေါ်လာတဲ့အသံတွေဟာ လေထဲမှာတုန်ခါပြီး အဝေးကိုရောက်ရှိသွားတတ်တယ်။ သူတို့အိုမင်းလာသည်အထိ ရယ်မောကြ။ သူတို့ အိုမင်းလာသည်အထိ ငိုညည်းကြ။ လူသားတွေရဲ့ အသံဗလံတွေဟာ နေ့စဉ်ညစဉ် ပျံ့လွင့်နေမြဲပါပဲ။ အစာရေစာ မဝလင်သူတွေဟာ အိမ်တကာလှည့်ပြီး တံခါးကိုခေါက်ကြတယ်။ နာမကျန်းသူတွေဟာ ဝေဒနာကို နာကျင်ခက်ခဲစွာ လက်ခံကြရင်း မျက်ရည်တွေ ယိုစိမ့်စီးဆင်းလာကြတယ်။ ခြေထောက်ပြတ်ကြီးတစ်ဖက်ဟာ လမိုက်ညတွေမှာ လမ်းတွေပေါ်တဖွဖွ လျှောက်သွားနေတတ်သတဲ့။ အိမ်တံခါးကိုပိတ်ပြီး သူတို့ တီးတိုးပြောကြတယ်. ညဥ့်သန်းခေါင်ယံမှာ လူခေါ်ခေါင်းလောင်းတွေ မြည်တတ်သတဲ့။ ဒါပေမဲ့ ဘယ်သူမှ အချိန်မတော်ကြီး တံခါးကို သွားမဖွင့်ရဲကြဘူး။

ဝံပုလွေတွေဟာ ခုအခါမှာ လူယောင်ဆောင်နိုင်ကြတယ်လို့ သူတို့ ယုံကြည်ကြတယ်လေ။ အထူးသဖြင့် အဘိုးအိုကြီးတွေ အသွင်နဲ့ပေါ့။ သူတို့ဟာ လမ်းတွေပေါ်မှာလျှောက်သွားနေကြရင်း ဘယ်သူဟာအမြီးပါမလဲ။ သူ့အမြီးကို ဘယ်လိုဝှက်ထားမလဲလို့ သတိထားပြီးကြည့်ကြတယ်။ အကောင်းဆုံးကတော့ ညအခါရောက်ရင် အိမ်တံခါးတွေ၊ ခြံတံခါးတွေ လုံခြုံအောင်ပိတ်ထားကြဖို့ပဲဆိုတာ သူတို့သိကြတယ်။ ဒါပေမဲ့ သက်တံခုံးကြီးအောက်မှာ ဘာတွေရှိတယ်ဆိုတာကိုတော့ သူတို့မကြားဘူး။ သက်တံခုံးကြီးအောက်မှာ အိပ်ပျော်နေတဲ့ ကယ်တင်ရှင်တွေရှိတယ်လေ။ ကယ်တင်ရှင်တွေဟာ ကျားတွေကို ဝံပုလွေဖြစ်အောင် ပြောင်းလဲပစ်နိုင်တယ်။ ဝံပုလွေတွေကိုလည်း ယုန်ကလေးတွေဖြစ်အောင် ပြောင်းလဲပစ်နိုင်စွမ်းပါတယ်။ ပြတ်နေတဲ့ခြေထောက်တွေကို အကောင်းပကတိ ပြန်ဖြစ်စေနိုင်ပြီး၊ ခွင်နေတဲ့ခြေထောင်ကို ဖြောင့်မှန်စေနိုင်ပါသည်။ နာမကျန်းသူတွေဟာ ကယ်တင်ရှင်ရဲ့ လက်ညှိုးနဲ့ ထိလိုက်တာနဲ့ ရောဂါဝေဒနာတွေ ပျောက်ကင်းချမ်းသာသွားမှာဖြစ်တယ်။ အတောင်ကျိုးနေတဲ့ ငှက်ကလေးတွေတောင် ကယ်တင်ရှင်လက်ညှိုး ညွှန်လိုက်တာနဲ့ လေထဲမှာ ပျံဝဲနေနိုင်စွမ်းတာပေါ့။ ဒါ့အပြင် မွတ်သိပ်ဆာလောင်သူတွေကိုလည်း ပူဆာသိမ်းလို့ ငြိမ်းစေနိုင်လိမ့်မယ်။ တစ်နေ့မှာတော့၊ မကြာသေးတဲ့ တစ်နေ့မှာတော့ လူပုလေးတစ်ယောက်ဟာ လူတို့ဌာနေကို ရောက်ရှိလာခဲ့ပြီး ကောင်ကင်ဆီဦးမော့ကာ ထရမ်းပက်တစ်လက်ကို ကျယ်လောင်စွာမှုတ်တယ်။ ထရမ်းပက်မြည်သံဟာလေထဲမှာ စူးစူးနစ်နစ်တုန်ခါပြီး သက်တံခုံးကြီးဆီထိ ရောက်ရှိသွားနိုင်အောင် မြည်နေလေတော့တယ်။

နေမျိုး
၂၀၀၂၊ ၁၁၊ ၃၀
ည ၈း၂၂ နာရီ

နေမျိုး
မြည်နေတဲ့ထရမ်းပက် (ဝတ္ထုတိုငယ်စု)
ပထမအကြိမ်၊ ဇန်နဝါရီ၊ ၂၀၀၆
မိုးကောင်းစာအုပ်တိုက်

ရေငုပ်သင်္ဘော

ဆောင်းလလယ်နေ့ရက်တွေမှာ ရေငုပ်သင်္ဘောတစ်စီးဟာ ပင်လယ်ထဲမှာ တိုးဝင်ငုပ်လျှိုး ခုတ်မောင်းသွားတယ်။ တရွေ့ရွေ့။ ထိုမှတရွေ့ရွေ့။ ပြီးတရွေ့ရွေ့။ ဆောင်းလလယ်နေ့ရက်တွေဟာ တဖြည်းဖြည်း အအေးဓာတ်ပိုမိုပြင်းထန်လာတယ်။ ဒါပေမဲ့လေ ရေငုပ်သင်္ဘောဟာ ခုတ်မောင်းလျက်ပဲကွယ်။ သူဟာ ရေငုပ်သင်္ဘောဆိုတော့ ရေထဲမှာငုပ်လျှိုးပြီး ခုတ်မောင်းရတာပေါ့။ တရွေ့ရွေ့။ ထိုမှတရွေ့ရွေ့။ ပြီးတရွေ့ရွေ့။ ရေငုပ်သင်္ဘောဟာ သူ့ဝမ်းဗိုက်ထဲမှာ ဆောင်းလရဲ့အအေးစက်ဆုံး ပင်လယ်ရေတွေကိုမျိုချကာ ခုတ်မောင်းလျက်ပဲ။ ပင်လယ်ရဲ့ ပို၍အေးစက်တဲ့ ဒေသဆီ ဦးတည်လို့ပေါ့။ ဆောင်းရင့်ရင့်ရက်တွေရောက်လာတော့ ရေငုပ်သင်္ဘောဟာ ခဲစပြုနေပြီဖြစ်တဲ့ ရေလွှာထဲကို ရောက်လာပြီဖြစ်ကြောင်း သတိပြုမိတယ်။ သူမျိုချထားတဲ့ရေတွေဟာ သူ့ဝမ်းဗိုက်ထဲမှာ ခဲစပြုပြီ။ ရေငုပ်သင်္ဘောဟာ ခုတ်မောင်းလျက်ပဲလေ။ ညင်ညင်သာသာနဲ့ သူဦးတည်ရာလမ်းကြောင်းအတိုင်း ခုတ်မောင်းနေလေတယ်။ တရွေ့ရွေ့။ ထိုမှတရွေ့ရွေ့။ ပြီးတရွေ့ရွေ့။ ပြင်းပြတဲ့ဆောင်းရက်တွေ ရောက်လာပေါ့။ ရေငုပ်သင်္ဘောဟာ ခဲနေတဲ့ရေသားထုထဲကို ရောက်ရှိသွားပြီ။ ဒါဟာ ဆောင်းကာလရဲ့ အအေးဆုံးလပဲဖြစ်မယ်ထင်ရဲ့။ ပင်လယ်ရေဟာ အေးစက်တဲ့ အစိုင်အခဲအသွင်နဲ့ ငြိမ်သက်မှုကိုပြုပြီး။ ရေငုပ်သင်္ဘောလည်း တစ်စတစ်စနဲ့ ရေခဲထဲမှာပဲပေါ့။ သင်္ဘောသားတွေလည်း ရေငုပ်သင်္ဘောထဲမှာ ခဲနေကြပေါ့။ သူတို့ကိုယ်ခန္ဓာမှာ ရေခဲမှုန်တွေ ကပ်ငြိနေလိမ့်မယ်ထင်တယ်။ တယ်လီစကုပ်ထဲမှာ မြင်ရတာကတော့ ကြီးမားလှတဲ့ ရေခဲထုကြီးပေါ့။ ဆောင်းလရဲ့ အအေးစက်ဆုံးနေ့ရက်တွေမှာ ပင်လယ်ဟာရေခဲလို့။ ရေခဲထဲမှာ ရေငုပ်သင်္ဘောခဲလို့။ ရေငုပ်သင်္ဘောထဲမှာ သင်္ဘောသားတွေလည်း ခဲနေမှာပဲ။ သင်္ဘေသားအိုကြီးတစ်ယောက်ရဲ့ တောင့်နေတဲ့လက်ထဲမှာ ဝိုင်ဖန်ခွက်ကခဲလို့။ ဆောင်းရက်တွေ လွန်ခဲ့ရင်ဖြင့် ပင်လယ်ဟာ အရည်ပျော်လာလိမ့်မယ်။ ရေငုပ်သင်္ဘောကြီးလည်း ခဲနေရာက ပြန်လည်အသက်ဝင်လာလိမ့်မယ်။ ခဲနေတဲ့ပန်ကာတွေ လည်လာကြလိမ့်မယ်။ ခဲနေတဲ့သင်္ဘောသားတွေဟာ အေးစက်တောင့်တင်းညောင်းညာနေတဲ့ သူတို့ခန္ဓာကိုယ်တွေကို ပြန်လည်ပြုလုပ်ကာ ရေငုပ်သင်္ဘောကြီးကို ဆက်၍ ခုတ်မောင်းကြမှာပေါ့။ သင်္ဘောသားအိုကြီးလည်း သူ့လက်ထဲက ဝိုင်တစ်ခွက်ကို ရေခဲမထည့်ပဲ မော့ချလိုက်လိမ့်မယ်။ တရွေ့ရွေ့။ ထိုမှ တရွေ့ရွေ့ …။ ပြီးတရွေ့ရွေ့ …။

နေမျိုး
၂၀၀၂၊ ၁၂၊ ၁၆

နေမျိုး
မြည်နေတဲ့ထရမ်းပက် (ဝတ္ထုတိုငယ်စု)
ပထမအကြိမ်၊ ဇန်နဝါရီ၊ ၂၀၀၆
မိုးကောင်းစာအုပ်တိုက်

ကြောက်ရွံ့တတ်ခြင်း

ဝိုင်ယာကြိုးတွေကို သူမ ကြောက်ရွံ့တတ်လာခဲ့သည်မှာ မကြာသေးဟု ဆိုနိုင်သော်လည်း (၂)နှစ်ခန့်တော့ရှိပေပြီ။ ဝိုင်ယာကြိုးများကို ကြောင်ရွံ့ဖို့အတွက် လုံလောက်သည့် တစ်ခုတည်းသော အကြောင်းအရာမှာ သူမ ဓာတ်လိုက်ခံရဖူးခြင်းပင် ဖြစ်သည်။ လွန်ခဲ့သော (၂)နှစ်ခန့်က စိုစွတ်ထိုင်းမှိုင်းသည့် နေ့ရက်တစ်ခုတွင် သူမသည် ဝိုင်ယာကြိုးတစ်ချောင်းကို အမှတ်မထင် ကိုင်တွယ်မိလိုက်သည်။ သွယ်တန်းထားသောဝိုင်ယာကြိုးသည် မူလအနေအထားမှ အိကျနေကာ သူမရှေ့တွင် ကာဆီးထားသလို ဖြစ်နေသည်။ သူမက စမ်းတိစမ်းတမ်းဖြင့် ဝိုင်ယာကြိုးကို ကိုင်တွယ်မိလိုက်သည်။ ဝိုင်ယာကြိုးဟူသည် မည်သည့်လျှပ်စစ်ဓာတ်မျိုးကိုမဆို စီးဝင်နိုင်သော အရာဖြစ်ကြောင်း ကျွန်ုပ်တို့အကျဉ်းအားဖြင့် သိနားလည်ခဲ့ကြပြီ။ ထို့ကြောင့် သူမကိုင်တွယ်လိုက်သော ဝိုင်ယာကြိုးသည် လျှပ်စစ်ဓာတ် စီးဝင်နေရုံမျှမက ပေါက်ပြဲနေသေးပေရာ ထိုပေါက်ပြဲနေရာကိုမှ ဆုပ်ကိုင်မိသောသူမ၏ ကိုယ်ခန္ဓာအတွင်းသို့ ဝိုင်ယာကြိုးထဲတွင် ကိန်းအောင်းနေသော လျှပ်စစ်ဓာတ်များ လျင်မြန်စွာ စီးဝင်သွားခဲ့ပေသည်။ လူဆိုတာကလည်း လျှပ်ကူးပစ္စည်းတစ်မျိုးပါပဲ။ သူမကိုယ်ခန္ဓာမှာ တဆတ်ဆတ် တုန်ခါသွားသည်။ သူမ၏လက်မှာ ပြင်းထန်သော အင်အားသက်ရောက်မှုတစ်ခုကို အလိုအလျောက် ပုတ်ထုတ်ပစ်နိုင်ခဲ့သဖြင့် သူမသက်သာရာ ရသွားခဲ့သည်။ သို့ရာတွင် ဝိုင်ယာကြိုးထဲမှ လျှပ်စစ်ဓာတ်သည် သူမ၏ ကိုယ်ခန္ဓာထဲမှ သိမှုအာရုံကြောတစ်ခုကို လောင်ကျွမ်းစေခဲ့ဟန်တူပါသည်။ သူမစကား သိပ်မပီတော့။ (နဂိုကလည်း သွားတွေမစုံတော့သဖြင့် စကားပြောလျှင် လေတွေထွက်ကာ လေလုံးမကွဲပဲ ဖြစ်တတ်သည်။) သူမသည် ဓာတ်လိုက်ခံရပြီးသည့်နောက်တွင် ပါးရေများ ပိုတွန့်လာကာ ဆံပင်များလည်း ပိုဖြူလာခဲ့သည်။ သို့ရာတွင် အမြင်အာရုံမှာ ပို၍ သန်စွမ်းလာခဲ့သည်။ အထူးသဖြင့် ဝိုင်ယာကြိုးတွေကိုကြည့်ဖို့ပေါ့။ ခြေလှမ်းတွေက ဆတ်တငံ့ငံ့ဖြစ်လာသည်။ ဒါပေမဲ့ သူမ နေကောင်းပါသည်။ နေကောင်းပေမယ့် သူမသည် ဝိုင်ယာကြိုးများကိုတော့ ကြောက်ရွံ့သွားခဲ့ပြီ။ တစ်ခါတစ်ရံ အိမ်မှ ကလေးသူငယ်များနှင့် အပြင်သို့ လမ်းလျှောက်ထွက်ဖြစ်သည့်အခါ ဝိုင်ယာကြိုးများအောင်မှ ဖြတ်လျှောက်ရမည့်လမ်းကို ရှောင်သည်။ မတော်တဆ ဝိုင်ယာကြိုးပြတ်ကျလျှင် ဘာဆက်ဖြစ်နိုင်ကြောင်း သူမသိထားသည်မဟုတ်ပါလား။ မီးခလုတ်တွေနားလည်း မသွားတော့ပါ။ မီးခလုတ်တွေဟာ အာမခံချက်မရှိတဲ့ အရာဝတ္ထုတစ်မျိုးမျှသာလို့ သူမထင်မှတ်တော့သည်။ အိမ်ထဲမှာ တုန်တုန်ချည့်ချည့်နှင့် လှည့်ပတ်သွားလာရင်း ဝိုင်ယာကြိုး အပြတ်အစ တစ်ခုတလေကို တွေ့လိုက်မိပြီဆိုပါလျှင် သူမသည် အဆိပ်ပြင်းသော မြွေဆိုးတစ်ကောင်ကို တွေ့လိုက်ရသလို အော်ဟစ်ကာ တစ်စုံတစ်ယောက်ကို ကောက်ယူဖယ်ရှားစေပါသည်။ ပြတ်တောက်နေတဲ့ ဝိုင်ယာကြိုးထဲမှာ လျှပ်စစ်ဓာတ်တွေ ခိုအောင်းမနေဘူးလို့ ဘယ်သူပြောနိုင်မလဲ။ ဟေ့လာကြစမ်း ဒီမှာဝိုင်ယာကြိုးတစ်ခု ငါ့ရှေ့က ကောက်ပစ်လိုက်ကြစမ်းမြန်မြန်။

နေမျိုး
၂၀၀၂၊ ၁၁၊ ၂၂

နေမျိုး
မြည်နေတဲ့ထရမ်းပက် (ဝတ္ထုတိုငယ်စု)
ပထမအကြိမ်၊ ဇန်နဝါရီ၊ ၂၀၀၆
မိုးကောင်းစာအုပ်တိုက်

ပဲ့တင်သံ

ကျွန်တော်ဟာ သိုးတစ်ကောင်ပါ။ ကျွန်တော်ဟာ သိုးတစ်ကောင်ပါ။ ကျွန်တော်ပြောတာ ကြားရဲ့လား။ ကျွန်တော်ပြောတာ ကြားရဲ့လား။ ကျွန်တော့်ပုလင်းထဲမှာ ဝိုင်အရက်တွေ ကုန်သွားပြီ။ ကျွန်တော့်ပုလင်းထဲမှာ ဝိုင်အရက်တွေ ကုန်သွားပြီ။ သူတို့ ဓားတွေကို သွေးနေကြတယ်။ သူတို့ ဓားတွေကို သွေးနေကြတယ်။ ထောင်ချောက်တွေ နေရာတိုင်းမှာရှိတယ်။ ထောင်ချောက်တွေ နေရာတိုင်းမှာ ရှိတယ်။ သူတို့ ဘယ်တော့မှ စကားမပြောကြဘူး။ သူတို့ဘယ်တော့မှ မရွေ့လျားကြဘူး။ သူတို့ဘယ်တော့မှ မရွေ့လျားကြဘူး။ ဘုရားသခင်ကို ပြောလိုက်ပါ။ ကျွန်တော်ဟာ သိုးတစ်ကောင်လို့။ ဘုရားသခင်ကို ပြောလိုက်ပါ။ ကျွန်တော်ဟာ သိုးတစ်ကောင်လို့။ သိုးတစ်ကောင်လို့။ သိုးတစ်ကောင်လို့။ သိုးတစ်ကောင်လို့။

နေမျိုး
၂၀၀၂၊ ၉၊ ၂၈
ညနေစောင်း ၆း၁၈ နာရီ

နေမျိုး
မြည်နေတဲ့ထရမ်းပက် (ဝတ္ထုတိုငယ်စု)
ပထမအကြိမ်၊ ဇန်နဝါရီ၊ ၂၀၀၆
မိုးကောင်းစာအုပ်တိုက်