> သီဟသူ [dot] blogspot [dot] com: 2013

Dec 31, 2013

၂၀၁၃

သက်ရောက်မှုတိုင်းမှာ
တန်ပြန်သက်ရောက်မှု ရှိတယ်။

"အဟောသိကံ" ဆိုတာကလည်း ရှိသေးတယ်။

ဆုတောင်းကောင်းရင်တော့
သားရွှေအိုး ထမ်းလာတာ မြင်ရနိုင်ပါလိမ့်မယ်။
၂၀၁၄ မှာ အဟောသိကံများ ရွှေအိုးထမ်းလာတာ မြင်ရပါစေသား။ ။

သီဟသူ
၃၁-၁၂-၂၀၁၃

၂၀၁၃

ပြန်ပေးသမားလက်မှာ ရွေးစရာ လက်ဝတ်ရတနာမရှိ
သူမကြိုက်တဲ့ လင်္ကာအပြည့်

သုခမိန်လှိုင်
၃ ဇူလိုင် ၂၀၁၃


အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

မြန်မာ၊ ၂၀၁၃

အကြောင်းအရာက ခမ်းနားကြီးကျယ်
ကျွန်တော်တို့ကတော့ သေးသေးငယ်၊

ကျွန်တော်တို့ အသက်ရှူမဝခဲ့ပါ
ကျွန်တော်တို့ ဘယ်တော့မှ အသက် ဝ ဝ ရှူရမယ်
ကျွန်တော်တို့ အသက် ဝ ဝ ရှူနိုင်ပါရစေ။ ။

သီဟသူ
၃၀-၁၂-၂၀၁၃

Dec 30, 2013

လေးတင်ခန်း

ဘယ်နှယ့်
ငါ မတဲ့ သစ်ရွက်လေးမှာ
စကြဝဠာကြီးက ပါနေရတာလဲ
အချစ်များမှန်လျှင်
လေးပါစေသား။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 29, 2013

ဒို ရေ မီ ဖာ

ချစ်သူရေ
မင်းဦးခေါင်းမှာ သက်တံ ထွက်ဖို့
အဲဒီသက်တံမှာ ငါတေးသီဖို့
အဲဒီတေးမှာ ကမ္ဘာကြီးပျော်ဖို့
အဲဒီ အပျော်မှာ နတ် လူ သာဓုခေါ်ဆိုဖို့။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 28, 2013

သို့ မေမေ (၁၀)

သို့ မေမေ အာလုပ်စကားမှာ ဖေဖေ့ကိုပါ စိတ်ကညွှတ်တယ်
မေမ နေကောင်းလားမေးရင်း ဖေဖေ နေကောင်းဖို့ ဆုတောင်းတယ်
မေမေက ဆော့ဖ်ဝဲဆို ဖေဖေက ဟာ့ဒ်ဝဲ
သားတို့က နေကြာပန်းတွေ
မေ နဲ့ ဖေ နေမင်းကြီးဘက်ကို အမြဲ ဦးလှည့်တယ်။

မေမေရေ
၈၀ ခုနှစ်များက ဓာတ်ပုံတွေ ပျက်သွားတာ ဝမ်းနည်းဖွယ်ပါပဲ
ခုတော့
မြေးမလေး ဓာတ်ပုံတွေဟာ နံရံအဘက်ဘက်မှာ
ပျော်စရာပါလေ။ ။

သီဟသူ
၂၈-၁၂-၂၀၁၃

စနေ နေ့တစ်ဝက် (၂၁)

နှုတ်တိုက်ချပေးတာတောင်
အကျအပေါက် များလွန်းတယ်၊
များများညည်းပြီး မြန်မြန် ပြန်ရယ်နိုင်ဖို့၊
တက်တူးလို အရေပြားပေါ်မှာသာ ရေးကြေးဆို
ဒီလောက် များများ ရေးမိမယ်မထင်။ ။

သီဟသူ
၂၈-၁၂-၂၀၁၃

နှစ်ပါးသွား

စိန်တုံးများ တစ်တုံးပြီးတစ်တုံး
ပတ္တမြားခဲများ တစ်ခဲပြီးတစ်ခဲ
ရွှေဒင်္ဂါးများ တစ်ပြားပြီးတစ်ပြား
မင်းဟာတွေလား. . .
သူများဟာတွေပါ။

တွေးခေါ်စရာမလိုဘဲ တွေးခေါ်ခဲ့ရသော အမှားများ
လူပြက်ကြီးတွေရဲ့ ငိုအားထက် ရယ်အားများ
နှစ်ပါးသွားခဲ့ပြီ။ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 27, 2013

၃၄" x ၄၂" ဆယ်ချပ်

၂၀၀၁ ခုနှစ်က
(ပန်းချီဆွဲဖို့) ဘောင်ကျပ်ထားတဲ
ကင်းဘတ်ဆယ်ချပ်
ဘာမှမဆွဲပဲထားတဲ့အရသာ
ဘာနဲ့မှ မလဲနိုင်ခဲ့ပါလား။

ဆွဲလိုက်ချိန်မှာ
ကမ္ဘာကျော်လိမ့်မယ်
ဒေါ်လာတွေရလိမ့်မယ်
(သေလွန်သည်အထိ)
အဓိပ္ပာယ်ဖွင့် ချီးကျူးကြလိမ့်မယ်
ထိုအချိန်မှာ
အရသာအားလုံး ဆုံးရှုံးသွားပြီဖြစ်ကြောင်း
ပြောပြခဲ့ပါတယ်။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 26, 2013

အလွမ်း

၁၉၇၃ တုန်းက
ငတ်ငတ်ပြတ်ပြတ်နဲ့
ကျွန်တော့်မြို့ကလေးရဲ့
အောင်မင်္ဂလာစျေးလေးထဲမှာ
စားရတဲ့ကော်ရည်ခေါက်ဆွဲအရသာ
ဘယ်မှာမှမရတော့ဘူး။

လောကတစ်လွှား
အရသာဒီလောက်ရှားသလား
(ဆန်းဆန်းပြားပြားတွေကတော့
အများသားပေါ့။)

အဖြူရောင်ဝတ်စုံလေးကို
မီးပူမတိုက်နိုင်ဘဲ
ခေါင်းအုံးအောက်မှာ
ထားအိပ်ခဲ့တဲ့
အိပ်မက်တွေ
အခုထိအရသာရှိတုန်းပဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 25, 2013

နောက်ဆုံးတစ်နည်း

လက်ဖက်ရည်ကို အရောင်ပြပြီး
ဘာတွေကိုများ
ငါမော့သောက်ခဲ့မိပါလိမ့်။

အရသာမရှိ ဘဝကြီးကို
အရသာရှိချင်ယောင် ဆောင်နည်းတွေထဲက
နောက်ဆုံးတစ်နည်းပါပဲလား။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

မှတ်စု (၃)

ဟာသ
လောကကြီးမှာ ဟာသပေါတယ်။
မှန်ထဲကသူ အရယ်ရဆုံး။

နေ့များ
အစွဲတွေနဲ့ ပျော်ရွှင်ကြ။
ကိုယ်တော့် ကျေးဇူးကို ချီးမွမ်းကြ။
သောကြာ။

အလွမ်း
အိမ်ပြန်ချင်စိတ်ဟာ
ရထားဥသြသံနဲ့ တွဲ/တွယ်ချိတ်ထား။

သီဟသူ
၂၃-၁၂-၂၀၁၃

Dec 24, 2013

LIVE SHOW

မျက်ရည်တွေသည် ချယ်ရီပန်းများ မဟုတ်
ဒေါသတွေသည် ပီယာနို မဟုတ်
အပူမီးတွေသည် ဝိုင်နီနီ မဟုတ်
ကြေကွဲမှုတွေသည် မြူဇီယံ မဟုတ်
ပသာဒ မပါ
နားဝင်မချို
အမြင်မလှ
ခမ်းခမ်းနားနား မရှိ။

ဘဝဟူသည် လိုက်ဖ်ရှိုးတစ်ပွဲ ဆင်နွှဲခြင်းမျိုး
မအောင်မြင်ခြင်းတွေကို အောင်မြင်စွာ တင်ဆက်ခြင်းမျိုး။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 23, 2013

(ဖြစ်နိုင်ခြေ)ပေါက်မဲများ

ငါ့အင်္ကျီအိတ်ထဲမှာ
လက်ကိုင်ဖုန်းပါတယ်
Aztor ပါတယ်
ထီတစ်အုပ်ပါတယ်
PARKER တစ်ချောင်းပါတယ်
ဗလာစာရွက်တစ်ရွက်ပါတယ်။

စကားအပြတ်မပြောလိုက်နဲ့
ဗဂျမ်းကာတွန်းထက် သာနေပြီပဲ။

အာကာသထဲကခေါ်သံကြားဖို့ရှိတယ်
ကော်လက်စထရောကျဖို့ရှိတယ်
သန်းကြွယ်သူဌေးဖြစ်ဖို့ရှိတယ်
အကြွေးစာရင်းအားလုံး
ပြီးဆုံးဖို့ရှိတယ်။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 22, 2013

စာကြည့်တိုက်

မသိတဲ့ဝေါဟာရ
မသိတဲ့အချက်အလက်
မသိတဲ့အဓိပ္ပာယ်
မသိတဲ့ရာဇဝင် သိလိုလျှင်
စာကြည့်တိုက်ကြီးထဲမှာ ရှာပါ။

တကယ်တော့
ငါတို့ကိုယ်တိုင်က စာကြည့်တိုက်ကြီးတွေ
မသိတဲ့အရာတွေ အများကြီးနဲ့။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 21, 2013

တယောများ

မာရီလင်မွန်ရိုးကိုထပ်သတ်တဲ့တသတ်တွေ
လောကဓာတ်ပညာရပ်မှာ
မိုးထိ အထပ်ထပ်ဆောက်ပြီးပါပြီ။

ပြန့်ကားကျယ်ပြောသော စက်ဝိုင်းကြီးအောက်
မေးထောက်ထားသော တယောများ
အဲဒီ့ဓာတ်ပြားဟာ သက်သေပဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 20, 2013

အင်္ဂါဂြိုဟ်မှ ကျောက်တုံးများ

အင်္ဂါဂြိုဟ်မှာလည်း
ကျောက်တုံးတွေ နေထိုင်ကြတာပဲ
ကျောက်တုံးတွေဆိုတော့
(လွယ်လွယ်နဲ့) ခေါင်းမကွဲဘူးပေါ့။

နတ်သမီးငါးရာနဲ့ တွေ့တွေ့
ငရဲမင်းကြီးနဲ့ တွေ့တွေ့
အရေးကြီးတာက
ခေါင်းမကွဲဖို့ပဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 19, 2013

စနေ နေ့တစ်ဝက် (၂၀)

ဖတ်ခဲ့တာတွေ ဘယ်လောက်တောင်ရှိခဲ့ပြီလဲ၊
ပြီးတော့ ဘယ်လောက် ကျန်ခဲ့သလဲ။
ရေးဖြစ်ခဲ့တာတွေထဲကကော
ဘယ်လောက်များ ကျန်ခဲ့သလဲ။

ကျေနပ်နိုင်ရဲ့လား။
ပျော်နိုင်ရဲ့လား။
ဒီ အားထုတ်မှုများ။*

ဝမ်းဗိုက်အဆာနဲ့ ရင်ဘတ်ဗလာကို
ပြိုင်တူပြေ/ဖြေဖို့ အားထုတ်ရင်းနဲ့
ဗလာဖြစ်မှုဟာ ပိုမို ပြန့်ကားလာ၊
နေပျော်ပါရဲ့လား။

ဒီလိုနဲ့
စနေ နေ့တစ်ဝက်များ...


သီဟသူ
၁၉၊ ၁၂၊ ၂၀၁၃

*မအောင်မြင်ခဲ့သော အားထုတ်မှုများ (http://thihathu.blogspot.sg/2013/12/blog-post_3039.html)



ကမ္ဘာကြီး

အယုံမရှိကြပါနဲ့
ကမ္ဘာကြီးဟာ (သေနေရာက)
မယုံနိုင်အောင် လှပဦးမယ်
မယုံနိုင်အောင် မွှေးပျံ့ဦးမယ်
မယုံနိုင်အောင် လန်းဆန်းဦးမယ်
မယုံနိုင်အောင် ကခုန်ဦးမယ်
မယုံနိုင်အောင် ဂျွမ်းထိုးဦးမယ်
မယုံနိုင်အောင် . . . .

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 18, 2013

မအောင်မြင်ခဲ့သော အားထုတ်မှုများ

ငါ လိုချင်တာ "သည်ဟာတွေ" မဟုတ်။


ဘဝမှာ "သည်ဟာတွေ" ကိုသာ
ငါ "" ခဲ့။ ။

သီဟသူ
၁၇၊ ၁၂၊ ၂၀၁၃။

အပွင့်များ

ကြွေစရာတွေ ကြွေပြီးမှ
အချစ်တွေဖူးသစ်တဲ့အခါ
ငါ့အပွင့်တွေ
ဖွင့်ဖောက်ဖတ်ကြည့်ကြပါတော့။

သမိုင်းဦးအစကအတိုင်းပါပဲလား
မိန်းမနဲ့ယောက်ျား
ရိုးမသွားသေးဘူး
မြွေနဲ့ သစ်သီး
ချိုမြိန်မှုနဲ့ အဆိပ်
ငယ်ထိပ်တက်ဆဲ
အိပ်မက်တွေလည်း စျေးကြီးဆဲ။ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 17, 2013

တောမှော်ရုံ

ငါ့မနက်ခင်း
မောနင်းစတားမုန့်တီ
မာကျူရီလက်ဖက်ရည်
ကယ်မိကယ်ဘရားသားစ်ဂီတ
မောင်မြင့်စိုး ပန်းချီပြပွဲနဲ့
အစကောင်းခဲ့ပြီ။

အနှောင်းသေချာ၊ မသေချာ
ငါ့ကိစ္စမဟုတ်တော့။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 16, 2013

ဗင်ဂိုးပြန်လာလျှင် နေပျော်စေချင်သောကမ္ဘာ

မိချောင်းတစ်ကောင်ကို
ချစ်သူလို့ အမည်ပေးလိုက်ရင်
အနမ်းတွေများပေးမလား. . .

ဒါဆိုရင်
ငရဲကို ပြင်သစ်ရေမွှေး
ကံကြမ္မာကို ဒေလီယာပန်း
ဒုက္ခကို နီကိုးလ်ကစ်ဒ်မင်းနှုတ်ခမ်း
ပြန်လည်လန်းဆန်းလာသောကမ္ဘာ
လေဘာတီအငြိမ်းနဲ့ ဧည့်ခံမယ်။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 15, 2013

မြစ်များ

မြစ်တစ်ခုကိုသယ်ဆောင်ရသလို
ပင်ပန်းခဲ့ပါတယ်။
ဒါဆို
အားလုံးလည်းပင်ပန်းခဲ့လိမ့်မယ်
စာနာလို့ ရပါတယ်။

ထိုမြစ်များ
ထိုအချစ်များ
စုံးစုံးနစ်အောင်
စီးရစ်ကြ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 14, 2013

ဘဝရုပ်ရှင်

ကြယ်သီးတပ်ထားသောသီချင်း
အမာရွတ်ရာတွေဘယ်မှာ
မမြင်သာတော့ဘူး။
ဘောင်းဘီအိတ်ထဲလက်နှိုက်
အားလုံးကိုပုခုံးတွန့်
များများသရုပ်ဆောင်ဖို့လည်း
မလိုတော့ပါဘူး။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 13, 2013

သတင်းစာကြော်ငြာ

အထိတ်တလန့် ထွက်ပြေးခန်းမှာ
ပန်းခင်းက ရှိနေသေးတယ်
သဲကန္တာရ
အာတိတ်ဒေသ
ဆူထစ်တောင်တန်း
ဆိုက်ပရပ်ပင်တွေနဲ့လမ်း
ပြေးလမ်းရှည်ရှည်
ဘယ်အထိများ
ထွက်ပြေးဦးမှာလဲ အချစ်ဆုံးရေ
အားလုံးစိတ်ပူနေတယ်
အမြန်ဆုံးပြန်လာပါ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 12, 2013

ချစ်သူသက်သက်

စိမ်းစိုသောလွင်ပြင်
မြင်းပေါ်တင်ဖို့ အစီအစဉ်
မအောင်မြင်ခဲ့သူ

လဖက်ရည်သောက်တယ်
ရုပ်ရှင်ကြည့်တယ်
ဓာတ်ပြားဖွင့်တယ်
မီးရထားစီးတယ်
ချစ်သူ့ ပန်းအိုးတွေရေလောင်းတယ်။

ကောင်းကင်ကြီးကို
မ, ကြည့်လိုက်
ဆ, ကြည့်လိုက်
တစ်ခုခုထူးမယ်လို့
ကမ္ဘာကြီးကို ချစ်တဲ့ဖက်က
အမြဲမျှော်လင့်ချက်ထားခဲ့သူ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 11, 2013

ဟစ်ပ်ဟော့ပ်ကဗျာ

ကွေးမြစ်ပေါ်ကတံတားမှာ
တံတားကြီးနေရာက ကျောခင်းလို့
ဗင်ဂိုးရဲ့ပန်းချီကားမှာ
ကျီးကန်းတွေနေရာကထပျံလို့
မန့်ချ်ရဲ့အော်သံမှာ
အသံနေရာကအော်ဟစ်လို့
ပင့်ဖလွိုက်ရဲ့ အယ်လ်ဘမ်မှာ
နံရံတွေနေရာကခေါင်းမော့လို့
နာဂါဆာကီနဲ့ ဟီရိုရှီးမားမှာ
အနုမြူဗုံးနှစ်လုံးနေရာက သရုပ်ဆောင်ခဲ့သူ
လူ,
သူဟာ
ကာရန်မပါသော ကဗျာတစ်ပုဒ်
(ဝါ)
သံစဉ်မလိုသောဟစ်ပ်ဟော့ပ်တစ်ပုဒ်
ကျွန်ုပ်တို့ လက်တွေအတွက်ကိုင်စရာ
မင်္ဂလာရှိပါစေသတည်း။ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 10, 2013

နှစ်ထောင့်တစ်ဆယ့်သုံး

အောက်တိုဘာ - ဒီဇင်ဘာ
-----------------------------

တုန်လှုပ်ဖွယ်ပါပဲ။

လောကအမြင်တွေ ပြောင်းသွားတယ်။

ကြက်သီး ဖြန်းဖြန်းထ။

"စာသိ" နဲ့ မငြိ၊
"ငါသိ" နဲ့မှ ထိတော့တယ်။

ပန်းပြတ်ခိုက်ပေမယ့်
တစ်ငုံကျန်သေးသမို့
ခေါင်းဖြီးထားပါမယ်။ ။

သီဟသူ
၁၀၊ ၁၂၊ ၂၀၁၃

ဝတ်စုံ

ပိတ်စတစ်စ
ကတ်ကြေးနဲ့ ကိုက်ချပစ်လိုက်တယ်
စက်ပေါ်တင် အပ်ချက်ပေါင်းများစွာ
စိုက်ချပစ်လိုက်တယ်။

အရောင် အသွေး
အဆင် အကွက်
အင်္ကျီဝတ်ပြီး ထွက်ခဲ့တယ်။

အသားကိုဖောက်ပြီးမှ
အပေါက်တွေထဲမှာ နေရာယူ
ချုပ်ရိုးချုပ်သား အမာရွတ်များ
အားကောင်းမောင်းသန်ချိတ်ဆက်လို့။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 9, 2013

အသွားနှစ်ဖက်တေးသွား

ဓားတွေကို တန်းစီထားတာ
အဲဒါ မီးဖိုခန်းပဲ။

အိမ်ရှင်မရဲ့ လက်ရာ
ဓားများ
သစ်သီးလှီးဖို့ ဓား
ငရုတ်သီးလှီးဖို့ ဓား
ဟင်းရွက်လှီးဖို့ ဓား
အသားလှီးဖို့ ဓား
ငါးလှီးဖို့ ဓား
ချိစ်နဲ့ ပေါင်မုန့်လှီးဖို့ ဓား
ဓားများ
အတို အရှည်
အကြီး အသေး
အဆင့်ဆင့် တန်းစီ
ဘင်ခရာ တပ်ဖွဲ့တစ်ဖွဲ့
ညီညာစွာ ချီတက်ခဲ့တဲ့
သူရဲကောင်း ခြေလှမ်းတွေနဲ့။

ငါတို့ စားခဲ့ကြတယ်
ဓားတွေကို စားခဲ့ကြတယ်
ကမ္ဘာမြေကို လှပစွာ သိမ်းပိုက်မယ့်
အသွားနှစ်ဖက်
ဓားထက်ထက် တေးသွားတွေနဲ့။ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 8, 2013

ဒဏ်ရာကျသူ

ဂွမ်းလိပ်
ပတ်တီး
တင်ချာ
နာကျင်တဲ့ဒီဇိုင်းများနဲ့
ဘာကြောင့်သင့်ကိုယ်သင်
ဖွဲ့နွဲ့ချင်ရတာလဲ?

အမြဲစိမ်းတောအုပ်တွေဟာ
ပျော်ပွဲစားထွက်ကြဖို့လား?
တစ်ယောက်နဲ့တစ်ယောက်
တိုက်ခိုက်ကြဖို့လား?

ချစ်ရေးဆိုသူမရှိပဲ
ချစ်သောအဖြေပေးခဲ့မိတာ
ငါ အရူးလား? ။ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 7, 2013

ကိုယ်တို့ စကြဝဠာ

ပန်းသီးထဲတွင်ဝင်ရောက်၍
ငါပြန်လည်ပေါက်ဖွားချင်သည်။

စူပါမင်းမဖြစ်ချင်
ငြိမ်းချမ်းချင်သည်။

လမင်းကြီးပေါ်ကို
မရောက်ဖူးလို
သောကမဲ့သောလူသားများကြားတွင်
ပျော်မွေ့နေချင်သည်။

သေဆုံးသွားသောချစ်သူတွေ
ပြန်ရှင်စေချင်သည်။

ဒဏ်ရာမရဘူးသူ၏အိမ်မှ
သောက်ရေတစ်ခွက်ကိုသာရှာပါ
အရာရာပြည့်စုံပါလိမ့်မည်။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

အိပ်မက်များ (၄)

ရေကို အဆက်မပြတ် ဆာလောင်နေတာ၊
သစ်တောကြီးတွေကို မီးက လောင်ကျွမ်းသွားတာ၊
မျက်စိတစ်ဆုံး ခြောက်သယောင်း
ရင်ဘတ်ထဲအထိ ဆာဟာရ ဖြစ်ထွန်းလာတာ
မျက်စိမှိတ်လိုက်တာနဲ့ ဒါတွေပဲ မြင်မြင်နေရတာ၊
ည ည အိပ်ရမှာ စိုးထိတ်နေရတာ၊
ည ည ဒီအိပ်မက် ပြီးပါစေတာ့လို့
ဆုတောင်းရင်း
ဆက် အိပ်မက် မက်နေရတာ။ ။

သီဟသူ
၆၊ ၁၂၊ ၂၀၁၃။

အိပ်မက်များ (၃)

မဆွဲရေသေးတဲ့ ပန်းချီကားလွတ်များလို
မရိုက်ရေသေးတဲ့ ဖလင်ကွက်လွတ်များလို
မရေးဖွဲ့ရေသေးတဲ့ ကဗျာရှည်ကြီးတစ်ပုဒ်လို
မမက်ရသေးတဲ့
ငါ့ရင်ထဲက
အိပ်မက်များ။ ။

သီဟသူ
၆၊ ၁၂၊ ၂၀၁၃။


အိပ်မက်များ (၂)

ရင်ခုန်ခဲ့
ယုံကြည်ခဲ့
ရဲဝံ့ခဲ့
စွန့်စားခဲ့
ကျရှုံးခဲ့

အကြိမ်ကြိမ်။ ။

သီဟသူ
၆၊ ၁၂၊ ၂၀၁၃။


Dec 6, 2013

အမည်မရှိရေတံခွန်

မွှေးသော
မြင့်သော
လှသော
ရည်ရွယ်ချက်ထဲက ရေဆေးငါးကြီးတွေဟာ
အမြဲကျော့ရှင်းနေတာပဲ။

ဘယ်တုန်းကမှလည်း
မမိခဲ့ဖူးဘူး
သူတို့ကိုစိတ်ကူးထဲမှာထားရတာနဲ့ပဲ
အဲဒီ့ရေတံခွန်ဟာ
တသွင်သွင် စီးဆင်းတော့တာပဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 5, 2013

နာမည်ကြီးနှစ်ယောက်

မြို့က လက်ပတ်နာရီတစ်လုံးရလာလို့
တစ်ရွာလုံး ထူးဆန်းကြတဲ့တောသားဟာ
မင်းလား? ငါလား?

ကြယ်တွေကို ရေတွက်ဖူးတဲ့ အရူးတွေဆိုရင်တော့
မင်းရော၊ ငါရော။

မင်းက လေယာဉ်ပျံလုပ်တယ်
ငါက ဝယ်ပြီးဗုံးကြဲတယ်
ငါက ကြံပင်စိုက်တယ်
မင်းက ဝယ်ပြီး အရက်ချက်တယ်။

မင်းပိုက်ဆံကို ငါယူတယ်
ငါ့ပိုက်ဆံကို မင်းယူတယ်
အခုတော့ တို့နှစ်ယောက်
တစ်ယောက်ကိုတစ်ယောက်
အချစ်ကြီးချစ်မိနေကြပြီ။

လောကဓံနဲ့ကံကြမ္မာ
တို့နာမည်တွေ ဘယ်သူပေးသလဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 4, 2013

နှင်းဆီပန်းများနှင့် လက်ထပ်ရခြင်း

အမေ့ရင်ခွင်မှ သားငယ်
ပင်လယ်လိုပွင့်ပြီး
ကမ္ဘာကြီးအား ဆင်မြန်းခဲ့ပါပြီ။
အလင်းစများ
မွှေးရနံ့များ
အမှောင်များ
ခြေချစရာနေရာလွတ်မရှိအောင်
အောင်မြင်ခဲ့သော ဆင်းရဲခြင်းများ
မကျန်စေခဲ့ရပါဘူး။

စိမ်းမြေ့သောကမ်းခြေ
ဝေးပါစေဦး။

ချစ်တတ်တာကလွဲပြီး
ကျွန်တော့်မှာသတ္တိ
များများစားစား မရှိလှပါဘူး။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 3, 2013

မိုးသတ်သမား

မိုးတစ်ည၊ သေနတ်တစ်လက်
လောင်းကုတ်အင်္ကျီတစ်ထည်နဲ့
စိတ္တဇလူသတ်သမားတစ်ယောက်
ရောက်ရှိလာသော မိုးညများဟာ
ဝတ္ထုတစ်ပုဒ်ပါပဲ ။
အေးစက်နေသော ကော်ဖီတစ်ခွက်
ညှော်နံ့ထွက်နေသော ရုပ်မြင်သံကြားတစ်လုံး
၁၉၂၃ ခုနှစ်ရဲ့ တိုက်ကြီးထဲက တိုက်ခန်းတစ်ခန်း
အအေးမိနေကြသော မိသားစုတစ်စု
အပြင်ဘက်ကမိုးဟာ သဲကြီးမဲကြီး
တကယ့် လေကြီးမိုးကြီးပေါ့။

အဲဒီမိုးကိုရပ်ဖို့
ဘယ်မိုးသတ်သမားကိုများ
ငါ ငှားရပါ့မလဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 2, 2013

ဆံပင်ဖီးသူများဇာတ်လမ်း

ကိတ်မုန့်ဟာ
ချစ်သူကို ကျွေးဖို့ပါ
ချစ်သူမျက်နှာကိုပေါက်ဖို့ မဟုတ်ပါဘူး
အစွန်းအထင်းများသောအင်္ကျီ
လူ့အရေပြားသာ ဖြစ်ပါတော့သည်။

ပြေပြစ်သော ဖျော်ဖြေမှု
ငါတို့ဇာတ်ရုံကြီးတစ်ခုလုံး
ကန့်လန့်ကာတွေ ရှိတယ်
သံပြိုင်အဆိုအဖွဲ့နဲ့ တေးဂီတဝိုင်း ပါဝင်တယ်

မြိုင်မြိုင်ဆိုင်ဆိုင် အနာတရတွေ
အားရပါးရ အရယူလိုက်ကြစမ်းပါ
အစောက လဲကျခဲ့သူအားလုံး
ဇာတ်သိမ်းသီချင်းပြီးဆုံးရင်
ကန့်လန့်ကာချ
ဖုတ်ဖတ်ခါ၊ ပြန်ထနိုင်ကြမှာပါ။

ဝမ်းနည်းပူဆွေးမှုတို့အပေါ်
ဆောင်းထားသောဦးထုပ်
အစ,က ပြန်လည်ပြုလုပ်ကြရအောင်။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Dec 1, 2013

ကမ္ဘာမြေရဲ့ ချစ်သူ

ကဗျာ။

သုခမိန်လှိုင်
CD..2 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 30, 2013

မောသူ့အိပ်မက်

အပြာရောင်ကောင်းကင်ဟာ ရှုမောမဆုံး
လူသားအားလုံး နတ်မြင်းပျံစီးလို့
အိပ်မက်ရဲ့ အပြင်
ပြန်မထွက်ချင်တော့ဘူး။

သုခမိန်လှိုင်
CD..2 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 29, 2013

အနိစ္စတရားကိုသီဆိုခဲ့သောသီချင်း

နှင်းဆီပန်းများလည်း နီရဲခဲ့ပါသည်
ဒုက္ခတရားများလည်း နီရဲခဲ့ပါသည်
နှစ်တွေကြာခဲ့ပြီ။

နဂါဆာကီ
ဟီရိုရှီးမား
ဂျူးခြောက်သန်းဆိုတာ
ပုံပြင်မဟုတ်ပါဘူး
နှစ်တွေကြာခဲ့ပြီ။

မောင်စိန် မရှိတော့ဘူး
သန်းကြွယ် မရှိတော့ဘူး
မော်ဒန်ကာတွန်း မရှိတော့ဘူး
နှစ်တွေကြာခဲ့ပြီ။

ရှုမဝ ဦးကျော် မရှိတော့ဘူး
ရှုမဝမဂ္ဂဇင်း မရှိတော့ဘူး
နှစ်တွေကြာခဲ့ပြီ။

ဖော်ဝေး မရှိတော့ဘူး
မောင်လေးအောင် မရှိတော့ဘူး
မိုးဝေမဂ္ဂဇင်း မရှိတော့ဘူး
နှစ်တွေကြာခဲ့ပြီ။

ဗန်းမော်တင်အောင် မရှိတော့ဘူး
သိန်းဖေမြင့် မရှိတော့ဘူး
ဇဝန မရှိတော့ဘူး
ရွှေမန်းတင်မောင် မရှိတော့ဘူး
ကြယ်နီ မရှိတော့ဘူး
မခင်စိန် မရှိတော့ဘူး
ကျော်ဆွေ မရှိတော့ဘူး
ဝင်းဦး မရှိတော့ဘူး
ရွှေဘ မရှိတော့ဘူး
ရွှေပြည်အေး မရှိတော့ဘူး
ဒါရိုက်တာချစ်ခင် မရှိတော့ဘူး
ကောလိပ်ဂျင်နေဝင်း မရှိတော့ဘူး
မြတ်လေး မရှိတော့ဘူး
ကြည်ကြည်ဌေး မရှိတော့ဘူး .....

တွံ့တေးသိန်းတန်
မြသန်းတင့်
တက္ကသိုလ်ဘုန်းနိုင်
ခင်နှင်းယု
ခင်ဝမ်း
မင်းမင်းလတ်
မောင်ချောနွယ်
မရှိတော့ဘူး မရှိတော့ဘူး မရှိတော့ဘူး
( မောလိုက်တာ )
နှစ်တွေကြာခဲ့ပြီ။

'အောင်မင်း' ဆိုတဲ့ လမ်းမကြီးကို
'နိဗိန္ဒ'လို့
ဘယ်တုန်းကများ
အမည်ပြောင်းလိုက်ကြတာလဲ
နှစ်တွေကြာခဲ့ပြီ။

သုခမိန်လှိုင်
CD..2 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 28, 2013

ခပ်စိမ်းစိမ်းကမ်းခြေ

အဲဒီမိုးဟာ
သူအပြင်ထွက်မှာကိုစောင့်ဆိုင်း
ဘယ်လိုအငြိုးနဲ့များ
သူ့ကိုရွာမလဲ။

ရေကန်ကြီးတစ်ကန်ထက်
နက်နဲသောကြံ့ကြံ့ခံမှုများ
အိုင်ထွန်းနေခဲ့ပြီးပါပြီ ။

ငရဲအိုးထဲ
စိတ်လိုလက်ရ
နေရာရွေးပြီးခုန်ချ
လူ့ပြည်က အပ်တစ်စင်း
ဗြဟ္မာ့ပြည်က အပ်တစ်စင်း
မြင်းစီးတတ်တယ်
ဒိုင်ဗင်ထိုးတတ်တယ်
ကဗျာစပ်တတ်တယ်
KISSပေးတတ်တယ်
မြစ်နံဘေးမှာတော့
အချစ်ရေး အဆင်မပြေဘူးတဲ့
ဖိနပ်ချွတ်ပြီးနေပါပြီ။

သုခမိန်လှိုင်
CD..2 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 27, 2013

အဲဒီမှာ

စကြဝဠာကြီးဟာ
အကြီးမားဆုံးသောသေတ္တာကြီးတစ်လုံး။
အဲဒီမှာ. . . မမျှော်လင့်သောပန်းများ
မတင်းတိမ်နိုင်ခဲ့သောဆည်းဆာများ
မဝခဲ့သောအချစ်များ။
အဲဒီမှာ. . . ပုံပြောဆရာကြီးအန်ဒါဆင်
ဂီတစာဆိုကြီး မြို့မငြိမ်း
ရုပ်ရှင်ဒါရိုက်တာကြီးကူရိုဆာဝါ။

အဲဒီမှာ
လက်ကိုင်ပဝါလေးတစ်ထည်
ကမ္ဘာကြီးတစ်ခု
ပျောက်ဆုံးသွားပုံအခမ်းအနား။

အဲဒီမှာ
မျက်လှည့်ဆရာကြီးရဲ့
ကရုဏာကြီးတဲ့အသံက
သင်တို့ ဘယ်တော့မှ
မျက်ရည် မကျရတော့ပါဘူး။

သုခမိန်လှိုင်
CD..2 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 26, 2013

ချစ်သော ကမ္ဘာ

          ချစ်သော ကမ္ဘာ I

မာဆတ်က
အပေါစား ပေါင်ဒါမှုန့်နံ့ကိုလည်း ချစ်တယ်
ကျွန်တော်တို့ဘဝဟာ ပျော်စရာပါပဲ။

၂၁ ရက်၊ စက်တင်ဘာလ၊ ၂၀၁၃ ခုနှစ်

               ***

          ချစ်သော ကမ္ဘာ II

ဟော့ဒီ့ဘီယာတစ်ကျိုက်သာ ခင်ဗျားဆိုရင်
ကျွန်တော် တစ်သက်လုံး ချစ်နေတော့မှာပဲ။

၂၁ ရက်၊ စက်တင်ဘာလ၊ ၂၀၁၃ ခုနှစ်

               ***

          ချစ်သော ကမ္ဘာ III

ခင်ဗျားက ကျွန်တော့်ကို ကဗျာရွတ်ပြ
လက်ဖက်ရည်တစ်ခွက်စာ ခွေးခြေပေါ်မှာ ပစ္စတုပ်ထိုင်လို့
ညကို ဓါတ်ကူးနေပုံများ။

၂၁ ရက်၊ စက်တင်ဘာလ၊ ၂၀၁၃ ခုနှစ်

               ***

          ချစ်သော ကမ္ဘာ IV

အလုပ်မရှိရင် အတင်းတုပ်ပေါ့
ပေါင်မုန့်မရှိရင် ကိတ်မုန့်စားပေါ့
ဖိနပ်က အစ
လျှပ်စစ်ပစ္စည်း အလယ်၊
လူ အဆုံး၊
အဟောင်းတန်းမှာ ကြိုက်တာ ရနေတာပဲ
ပျော်စရာကြီး၊
ခေါင်းကိုက်ပျောက်ဆေးပြားလေးသာ ဆောင်ထားရုံ။

၂၆ ရက်၊ စက်တင်ဘာလ၊ ၂၀၁၃ ခုနှစ်

               ***

          ချစ်သော ကမ္ဘာ V

တစ်ခန်းပြီး နောက်တစ်ခန်း
နောက်တစ်ခန်းပြီး နောက်ထပ်တစ်ခန်း
အသွားကတော့ ဇာတ်ညွှန်းအတိုင်းပဲ၊

ချောက်တွေ့ရင် ခုန်မယ်
ဆူးတွေ့ရင် ခုတ်မယ်
ရန်များကို ကိုယ်ရှင်းမယ်ပေါ့ ကိုဇော်ဝင်းထွဋ်ရယ်၊

ဘဝကြီးက နေပျော်စရာ
အခုထိတော့
ရန်သူဘက်က အကျအဆုံးအများတုန်း။

၂၆ ရက်၊ စက်တင်ဘာလ၊ ၂၀၁၃ ခုနှစ်

               ***

          ချစ်သော ကမ္ဘာ VI

လိုတိုင်း "တ" လို့ ရကြေးဆို
လောကကြီး အပျက်မသာသာဖြစ်သွားမှာပေါ့
ခင်ဗျားမျှော်လင့်သလို
ခင်ဗျား မမျှော်လင့်သလို
ဘုရားသခင်ရဲ့အံစာဟာ လိမ့်နေဦးမှာပဲ။

၂၆ ရက်၊ စက်တင်ဘာလ၊ ၂၀၁၃ ခုနှစ်

               ***

          ချစ်သော ကမ္ဘာ VII

ခါးက နာသလိုလို
ဇာတ်ကျောပဲ တက်သလိုလို
ညနေ၊
ဝီစကီလေး မဝင်သေးခင်အထိသာ။

၂၆ ရက်၊ စက်တင်ဘာလ၊ ၂၀၁၃ ခုနှစ်

               ***

          ချစ်သော ကမ္ဘာ VIII

FUN ကိုကျော်ပြီး
Call me maybe နဲ့ Carly Rae တက်သွားတော့
MTV Music Awards ကို ငါတို့ "တောက်" ခေါက်ခဲ့

အနုပညာဆိုတာ
ကိုယ့်အပင်နဲ့ ကိုယ့်အသီးနဲ့
မပျော်ဘူးကို ပျော်ပျော်ကြီး ပြောတတ်ကြရုံသာ...။   ။

၂ ရက်၊ အောက်တိုဘာလ၊ ၂၀၁၃ ခုနှစ်

               ***

          ချစ်သော ကမ္ဘာ IX

ဘုရားသခင်တောက်ချလိုက်တဲ့ စီးကရက်လို
ပျင်းရိပျင်းတွဲ တောက်လောင်ရင်း
ငါတို့ ဖြတ်သန်းကြတယ်
ဝီစကီလေးမြုံ့ရင်း
သံဝါသပြုရင်း
ပေါ့ပျက်ပျက် ပျော်ရွှင်ဖွယ်နေ့ရက်များ။   ။

၅ ရက်၊ အောက်တိုဘာလ၊ ၂၀၁၃ ခုနှစ်

               ***

          ချစ်သော ကမ္ဘာ X

ပေါင်ကြားက ဝဲကို
လူမမြင်အောင်ဖုံးပြီး မော်ကြွားခဲ့
လောက်တက်ရင်
ခိုးပြီး ဆေးသိပ်လိုက်ရုံပဲမဟုတ်လား။

၉ ရက်၊ အောက်တိုဘာလ၊ ၂၀၁၃ ခုနှစ်

               ***

          ချစ်သော ကမ္ဘာ XI

မန္တလေးမုန့်တီစားရသလို
ခပ်တိုင်းမှမပါပဲ ဘဝဆိုတာ...
အရက်၊ ဆေးလိပ် တီထွင်သူများကို
ကျွန်တော်တို့ ကျေးဇူးတင်ကြရုံ။

၉ ရက်၊ အောက်တိုဘာလ၊ ၂၀၁၃ ခုနှစ်

               ***

          ချစ်သော ကမ္ဘာ XII

အချိန်မတိုင်ခင်သာ နောင်တရကြေးဆို
ကျွန်တော်တို့ ကမ္ဘာကြီးဟာ...

၉ ရက်၊ အောက်တိုဘာလ၊ ၂၀၁၃ ခုနှစ်

               ***

ချစ်မင်းမောင်
http://www.cmmaung.me/

အနီရောင် အော်ပရာ

ဒိုင်း. . . ဂန္ဒီ
ဒိုင်း. . . ဗိုလ်ချုပ်အောင်ဆန်း
ဒိုင်း. . . ကနေဒီ
ဒိုင်း. . . မာတင်လူသာကင်း
ဒိုင်း. . . ဂျွန်လင်နွန်
ဒိုင်း. . . အန္ဒီရာဂန္ဒီ
ဒိုင်း. . . ရာဂျစ်ဂန္ဒီ
ဒိုင်း. . . ဒိုင်း. . . ဒိုင်း. . . ဒိုင်း. . .

သုခမိန်လှိုင်
CD..2 - ဂျွန်လင်နွန် မဆိုခဲ့သော သီချင်းများ  [(၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 25, 2013

လူ့ဘဝကြီးဟာ စုံထောက်ဝတ္ထုပဲ

မီးခံသေတ္တာတစ်လုံး
သုံးမကုန်သော ပိုက်ဆံများ
ဖြုန်းမကုန်သော ဆင်းရဲခြင်းများ
ဒါဟာ
လျှို့ဝှက်သည်းဖို ဇာတ်လမ်းတစ်ပုဒ်ရဲ့အစပဲ
ရေနွေးလိုအငွေ့ ဆူနေတာတောင်မှ
စူပါမင်းဖြစ်လိုက်
ဒိုင်နိုဆောဖြစ်လိုက်
အဲဒီအမှုတွဲမှာ
ရှားလော့ဟုမ်းရှုံးသွားတယ်။

သုခမိန်လှိုင်
CD..2 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 24, 2013

ဝေလငါး၏မျက်ရည်များ

အမှန်တရားဆိုသောအမှားတရံ
ကျွန်တော့်မှာအင်္ကျီ အဝတ်အစားဆင်သလိုမြဲမြံ ။
ယုံကြည်စိတ်ချစွာပဲ
လက်ဖက်ရည်တစ်ခွက်မှာလိုက်တော့
သကြားအရသာစစ်စစ်နဲ့
ဒါဆို
ကျွန်တော်ဟာအစစ်တစ်ခုပေါ့ ။

ပင်လယ်ကြီးကိုလည်းခြေထောက်တင်နိုင်ခဲ့
လက်ပတ်နာရီကိုကြည့်လိုက်တော့ ၁၁ နာရီခွဲ
ကဲ . . . ကျွန်တော်အောင်မြင်စွာရှိနေကြောင်း
သက်သေပြချက်မှာ
နေ့လည်စာဝေလငါးဟင်း
မျက်ရည်တွေကျဆင်းလို့။

သုခမိန်လှိုင်
CD..2 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 23, 2013

ရေနစ်တဲ့ရေ

ကိုယ့်အချစ်နဲ့ကိုယ်
ကိုယ့်အကြောင်းနဲ့ကိုယ်
ကိုယ့်ဆင်းရဲတွင်းနဲ့ကိုယ်
ကိုယ့်ငါးမျှားချိတ်ကိုကိုယ်တိုင်ပြုလုပ်ပြီး
ကိုယ့်အာခေါင်မှာချိတ်ခဲ့တဲ့နေ့က
စတော်ဘယ်ရီခင်းကြီးကလည်း
နီရဲလှပနေလိုက်တာ ။

သုခမိန်လှိုင်
CD..2 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

သို့ မေမေ (၉)

နားမလည်တဲ့ စာအုပ်တွေဖတ်ပြီး
အပါးမလည်စွာ လောကထဲထွက်တဲ့ သား အတွက်
ဂုဏ်တော်တစ်ထောင်ပွားထားတဲ့ မေမေ့စိတ်ပုတီးဟာ
အခု
နံရံမှာ
ချိတ်ပုတီးဖြစ်လို့နေ။

မေမေ
နေကောင်းလား မေမေ။*

သီဟသူ
၂၂၊ ၁၁၊ ၂၀၁၃။

*ကိုငှက်၏ မေမေ နေကောင်းလား မှ

စနေ နေ့တစ်ဝက် (၁၉)

ခြောက်ရက်ကြာ ဖန်တီးမှုအတွက်
ဖန်ဆင်းရှင်
တနင်္ဂနွေကို လိုအပ်ခဲ့။

မပြီးဆုံးနိုင်
မနက်ကိုး ညခြောက်များအတွက်
ကျွန်တော်
စနေ နေ့တစ်ဝက်ကိုပါ လိုအပ်နေဆဲ. . .

သီဟသူ
၂၂၊ ၁၁၊ ၂၀၁၃

Nov 22, 2013

ရက်စက်သော အချစ်ဇာတ်လမ်း

ငြိမ်းချမ်းရေးရဲ့ နဖူးစာဟာ
စစ်ပွဲတွေနဲ့သာ ညားရရှာ။

စေ့စပ်လက်စွပ် မဝတ်ရဘဲ
ဇွတ်ဖြစ်ရတဲ့ မုဆိုးမ
အကြိမ်ကြိမ် နစ်နာကြေး ရရှိပုံမှာ
ညူကလီးယားများ
စကတ်ဒုံးကျည်များ
ပက်ထရီရော့များနှင့်
အနက်ရောင်ဝတ်စုံများ။

တကယ်တော့
သူမဟာ ဘာအစွမ်းအစမှ မရှိဘဲ
လူသားတွေ တမ်းတရည်စူးထားတဲ့
စိတ်ကူးထဲက
ချစ်သူတစ်ဦးမျှသာပါလား။

ငါ
ဘယ်တော့မှ မေ့နိုင်တော့မှာ မဟုတ်ဘူး။

သုခမိန်လှိုင်
CD..2 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 21, 2013

ချစ်သောချစ်သူ

ငါ့ကိုစိတ်မနှံ့ဘူးပြောရင်
မငြင်းချင် ။
ကမ္ဘာကြီးကိုမြင်းပေါ်တင်
ရေကြည်ရာမြက်နုရာခေါ်သွားချင် ။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 20, 2013

ချစ်သောထိုခရီး

ထိုပုလင်းထဲတွင်
သူ့ကိုယ်သူပြန်လွမ်းသောအရည်များ
ထိုပန်းခင်းထဲတွင်
သူ့ကိုယ်သူပြန်လည်ငေးမောလေ့ရှိသောအချစ်များ
ထိုဂြိုဟ်တုထဲတွင်
သူ့ကိုယ်သူဖမ်းယူနားဆင်လေ့ရှိသော
လောကဓံတရားများ

ထိုအရာများအား
သူသည်ကြယ်တံခွန်တစ်ခုအဖြစ်ဖန်ဆင်းပြီး
စီးဆင်းခဲ့ပါတော့သည် ။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 19, 2013

ချစ်သောတွမ်အင်ဂျယ်ရီ

ငါဟာ
ငါမဖြစ်ခဲ့ဘူးဆိုရင်
တွမ်အင်ဂျယ်ရီဖြစ်ချင်တယ်။
ဘယ်သူကလိုက်လိုက်
ဘယ်သူကပြေးပြေး
အားလုံးကိုအပြုံးဆေးကျွေးနေရရင်
ပြတ်သွားတဲ့လက်တွေပြန်ဆက်မယ်
ကွဲသွားတဲ့ခေါင်းတွေပြန်ကောင်းမယ်
ဆယ်ပေါင်တူကြီးနဲ့ထုပြီး
ပုသွားတော့လည်းပြန်ရှည်မယ်။
နာကျင်ရလွန်းလို့
ထွက်သွားရတဲ့ကြယ်တွေလည်းပဲ
ပြန်လည်ချိတ်ဆွဲတောက်ပမယ်။

တွမ်အင်ဂျယ်ရီဆိုတာ
အမြှောက်ထဲထည့်ပစ်ခံရပြီး
ပြန်လာနိုင်ကြတဲ့သူရဲကောင်းတွေပဲ ။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 18, 2013

ချစ်သောဇာတ်ညွှန်း

သင်လိုချင်တာတွေကို
သင်မလိုချင်သလိုရရှိပြီး
သင်မလိုချင်တာတွေကို
သင်လိုချင်သလိုရရှိတော့
ချစ်သူ့ခေါင်းမှာ ပန်းကလေး
ပန်ပေးနေပုံရဲ့ နောက်အခန်းမှာ
လူဆိုးတွေလာတော့မယ်ဆိုတာ
သိနေကြပါပြီ။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 17, 2013

ချစ်သောရေတံခွန်

ရေတံခွန်ထဲက ထွက်ခဲ့တဲ့သက်တံ
မိုးကို ပျံတယ်။
ငါသည် မြေကြီးနဲ့မကွဲမကွာ
အချစ်စိတ်များ ပြည့်ခဲ့သောနေ့က။

သစ်ရွက်လို ကြွေသောဘဝများ
လိုက်လံကောက်ယူထွေးပွေ့ခြင်းငှာ
မစွမ်းသာခဲ့။

ခြေဦးတည့်ရာလည်း မသွားနိုင်
ဤတောမြိုင်အတွင်း၌
သားရဲတိရစ္ဆန်များ
ငှက်ကျေးသာရကာများ
ဝင်္ကပါကွေ့များ
ဒဏ္ဍာရီနေ့များ
အားလုံး ရေတံခွန်ထဲမှာ ရှိတယ်။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 16, 2013

အိပ်မက်များ

ကမ်းခြေကိုလာခဲ့တာ
သဲ ရဲတိုက်လေး ဆောက်ကြည့်လိုစိတ်နဲ့သာ။

ဒီရေအတက်မှာ
တည်ဆောက်ခဲ့သမျှ ပြိုကျသွားမယ်ရယ်လို့တော့
မတွေးထားခဲ့မိပါ။

သီဟသူ
၁၅၊ ၁၁၊ ၂၀၁၃

ချစ်သောသံသရာ

လူသားထက် အိမ်သည် ကြီးမား
အိမ်ထက် မြစ်သည် ကြီးမား
မြစ်ထက် ပင်လယ်သည် ကြီးမား
ပင်လယ်ထက် စကြဝဠာသည် ကြီးမား
စကြဝဠာထက် ဒုက္ခသည် ကြီးမား
ဒုက္ခထက် လူသားသည် ကြီးမား ။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 15, 2013

ချစ်သောကမ္ဘာကြီး

မျက်ရည်တွေနဲ့နေ ငိုခဲ့တာ
သမီးလေးလား?
သားငယ်လား?
ကမ္ဘာကြီးဖြစ်နေခဲ့တဲ့အခါ
ကျွန်တော်, မချော့တတ်တော့ဘူး။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 14, 2013

ချစ်သောမေးခွန်းများ

ဘယ်လိုဆပ်ပြာမျိုးနဲ့
ရေမိုးချိုးလိုပါသလဲ
ညစ်ပေသွားတဲ့ နှလုံးသားလေး
ပြန်လည်ဖြူစင်လာသည်အထိ။

ဘယ်လိုမှန်နဲ့များ
ကြည့်ရှုချင်ပါသလဲ
အပိုအလိုရေးထားတဲ့ အတ္ထုပ္ပတ္ထိ
မိမွေးတိုင်းဖမွေးတိုင်း တွေ့သည်အထိ။

ဘယ်လိုဘီးမျိုးနဲ့
ဖီးသင်ချင်ပါသလဲ
ဝေဒနာအမွှေးအမျှင်များ
ရာဇဝင်မှာဖြန့်ခင်း
လှေကားထစ်များ နင်းသွားနိုင်သည်အထိ။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 13, 2013

ချစ်သောမာရ်နတ်

ဒုက္ခဆိုတာ မာရ်နတ်ပဲ
အောင်ခြင်းရှစ်ပါးဟာ
သူပါရမီဖြည့်တာပဲ။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 12, 2013

ချစ်သောပန်းချီကား

ကျီးကန်းရောင်သောကများထာဝရပျံသန်းလျက်
နွားနို့က ဖြူစင်
ရေက ကြည်လင်
ပျော်ရွှင်မှုမှာ အရောင်စုံ
လူတို့ဇာတ်ခုံသည်
ပန်းချီကားတစ်ချပ်ဆိုလျှင်
ကျွန်တော် မော့သောက်ပစ်လိုက်ပါတော့မည်။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 11, 2013

ချစ်သောစာအုပ်

ငါဟာ . . .
ငါမဖြစ်ခဲ့ဘူးဆိုရင်
ဟစ်တလာ မဖြစ်ချင်ဘူး
မူဆိုလိုနီ မဖြစ်ချင်ဘူး
စာအုပ်တစ်အုပ်ဖြစ်ချင်တယ်။
(အရှုံးတွေထဲက ထူ - ထ
အန်နာဖရန့် ဒိုင်ယာရီ)

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 10, 2013

ချစ်သောကျေးဇူးများ

ဘဂျမ်း
အောင်ရှိန်၊ မောင်စိန်
သန်းကြွယ်၊ ဘကြည်
ဝေါ့ဒ်ဒစ္စနေတို့ဟာ
ကျွန်တော့်ရဲ့ ရှေးဦးအစ
ဇာတ်လိုက်ကြီးတွေပေါ့။

ရှုံ့မဲ့ပြီး အောက်စိုက်နေသော နှုတ်ခမ်းများ
ပုံမှန်နေသားတကျပြုံးလို့ရအောင်
သူတို့ပြုပြင်ပေးသွားကြတာလေ။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 9, 2013

ချစ်သောမင်းနဲ့ငါ

မင်းနဲ့ငါဆိုတဲ့ လက်ဖက်ရည်ဆိုင်မှာ မင်းနဲ့ငါ
မင်းနဲ့ငါဆိုတဲ့ အဝေးပြေးလမ်းမကြီးပေါ်မှာ မင်းနဲ့ငါ
မင်းနဲ့ငါ အမည်ရတဲ့ ငရဲမှာလည်း မင်းနဲ့ငါ
ပန်းသီးစားရဦးမယ်
မြွေကိုက်ခံရဦးမယ်
စစ်တိုက်ကြရဦးမယ်
တစ်ယောက်အနာကိုတစ်ယောက်က
လျှာနဲ့လျက်ပေးကြရဦးမယ် မင်းနဲ့ငါ။

သုခမိန်လှိုင်
CD..1 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 8, 2013

ဂိုးသမား ၂

ကမ္ဘာကြီးကိုပိုက်လို့
ပွေ့လို့
တရှုပ်ရှုပ်နမ်းလို့
ကိုယ်လွမ်းတဲ့အရာတွေ ပါရဲ့လား?
ဒဏ်ရာမပါသောဘဝ
ဒဏ်ရာရပါစေ
ငါဖမ်းပါရစေ။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 7, 2013

အနုပညာ

ဪ. . . အမှားအပြည့် လောကီအပေါ်
နေပျော်သော လူ့ရွာ
ငါ ရှာကြံခဲ့မိလေသလော။

ကြိုးစားပါတယ်
စွမ်းဆောင်ပါတယ်
တိုင်ထိပြီး ထွက်လာတဲ့ ဘောလုံးပါ
ဂိုးမရပါဘူး။

ကျေးဇူးတရားတို့ဝိုင်းရံ
ခန္ဓာကိုယ်နဲ့ အသက်ရဲ့ ဖြစ်တည်မှုမှာ
မြဲမြံခဲ့ရပြန်။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 6, 2013

အသက်ရှူခြင်းသံခိပ်

ကန်တင်လိုက်တယ် တနင်္ဂနွေတစ်ခု
ကန်တင်လိုက်တယ် ငါ့ကို
ကနတင်လိုက်တယ် အိုက်စကရင်တစ်ခွက်
ကန်တင်လိုက်တယ် ကိုဆိုဗိုစစ်ပွဲများ
ကန်တင်လိုက်တယ် ဘလက်မိုးနိုက်တေးများ
ကန်တင်လိုက်တယ် အမျိုးအမည်မတူ
ဒုက္ခချင်းတူတဲ့ အနာတရများ

ကန်တင်လိုက်စမ်းပါ့
အလှတရားလင်းလက်
လွတ်လွတ်ကျွတ်ကျွတ် သယ်ဆောင်လာတဲ့
ကမ္ဘာကြီးကို။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 5, 2013

ကာရန်

အောင်မြင်ခြင်းဟာ ပျင်းဖို့ကောင်းတယ်
အနုပညာနဲ့ ကမ္ဘာကြီးကို
ကိုယ့်ဘက်ကပဲ ချစ်ရတာ ကောင်းတယ်။

ဒီလိုနဲ့ပဲ
တေးတစ်ပုဒ်ဆိုတိုင်း
ဂါထာအစွမ်း ရှိခဲ့တယ်။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 4, 2013

So So Close

So So Close
ဘောလုံးပွြ ကြေညာသူရဲ့အသံ
ဘာသာပြန်ရင် ပျက်သွားမှာစိုးလို့။

So So Close
ပိတ်ဆို့မှုတွေကြားမှာ
သွင်းသွားတဲ့ဂိုးကို
ကြေညာရင်း သုံးသွားတာပါ။

So So Close
ငါ လှပစွာ သွင်းမယ်။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 3, 2013

ဂြိုဟ်သား

ကမ္ဘာကြီးက
ကုလားကားပဲ။

မြို့တက်
စိတ်ညစ်
တောပြန်။

မြို့တက်
စိတ်ညစ်
တောမပြန်
မြို့ထက်မြို့တွေ ဆက်တက်မယ့်ငါ့ကိုတော့
ဘယ်ဂြိုဟ်သားစာရင်းသွင်းမလဲ။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 2, 2013

နိဗိန္ဒ

မာယာကော့စကီ
ဂျက်လန်ဒန်
ဗင်ဂိုး
မာရီလင်မွန်ရိုး
မြို့မငြိမ်း
ကတ်ကိုဘိန်း
စာအုပ်အထူကြီး ၆ အုပ်
မှတ်သားစရာက တစ်ကြောင်းတည်း
ကမ္ဘာကြီးကို ငြီးငွေ့ခဲ့ကြတယ်။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Nov 1, 2013

ဆုကြေး

ဘဏ်တိုက်ကြီးထဲက
ငွေတွေကိုသာ
လိုချင်ခဲ့တဲ့ ဓားပြ။

တန်ရာတန်ကြေးကတော့
ကျည်ဆန်တွေသာ ရခဲ့ရ။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Oct 31, 2013

စာသား

အသံကြားတယ်
ကမ္ဘာကြီးကို ခေါင်းတိုက်မိတာပါ
မနာပါဘူး
စိတ်အလို ဆန္ဒရှိနေ့များ။

လှလှပပ ဝင်သွားခဲ့ပေါ့
မွေးနေ့တစ်ခုရဲ့ သက်တံ
အချစ်စိတ်ကလေးတစ်စက်နဲ့
ပင်လယ်ကြီး ဖြစ်ခဲ့တယ်။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Oct 30, 2013

ကဗျာ

စကြဝဠာကို ကြိုးနဲ့ဆွဲခေါ်လာပြီး
ကမ်းခြေကို ပို့ပေးခဲ့တယ်။
သက်သက်သာသာ နေဝင်သွားတယ်
သက်သက်သာသာ အိမ်ပြန်ကြတယ်
သက်သက်သာသာ မီးထွန်းကြတယ်
သက်သက်သာသာ သေကြတယ်။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Oct 29, 2013

သံစဉ်

ငါ့ကို
စိတ်ဆိုးမာန်ဆိုး ဖြစ်စေမဲ့ နေ့ကလေးကိုပေးတော့
ငါ့မှာ
ချော့မြှူရတယ်
ပွတ်သပ်ရတယ်
ပြီးမှ
သီချင်းလုပ်ပြီး ဆိုခဲ့ရတယ်။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Oct 28, 2013

ဂိုးသမား

ကိုယ့်အချစ်နဲ့ကိုယ်
ရူးသွပ်မှုတွေကြောင့်သာ
ငါ့တာဝန်တွေ ဖြစ်ပေါ်လာခဲ့။

မိုးတိမ်တွေကို စောင့်ဖမ်းသူ
ကြယ်ပွင့် အိပ်မက်
ရာသီ ပန်းပွင့်
ရှုမျှော်ခင်းတွေ စောင်ဖမ်းသူ။

လူသားဆိုတာ
စားသောက်ဖွယ်ရာစုံလင်
နေရာထိုင်ခင်းပြည့်စုံ
လုံခြုံငြိမ်းချမ်းနေ့ကလေးတစ်နေ့
ဘယ်နေ့များမှ
ဖမ်းယူနားဆင်ခွင့်ရပါ့။

သုခမိန်လှိုင်
အစိမ်းရောင် ဘောလုံးအသင်း (၂၀၀၀)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

Oct 25, 2013

မုတ်သုံ

အပွင့်မရှိတဲ့
ပိတောက်ပင်လေးက
မြစ်ကို ဒီလိုပဲ
တစ်သက်လုံး ငေးကြည့်နေမှာလား?

သဲလွန်စဆိုလို့
သဲပွင့်တစ်မှုန်တောင် မထတဲ့
သောင်ပြင်ကြီးကလည်း
အချစ်ကို မျိုသိပ်နိုင်လွန်းပါတယ်။

လောကသုံးပါး၊ ဥတုသုံးပါး
အရွယ်သုံးပါးမှာ
အကွေ့အချိုးတွေ များလွန်းတော့
ရေစီးသံက မနွဲ့နှောင်းဘူး။

လေညင်းကို အပိုင်ရလိုမှုနဲ့လေ
အငြင်းပွားကြတယ်၊
စွန်လွှတ်နေတဲ့ ကလေးငယ်တစ်စုနဲ့
ရွက်လှေတချို့။ ။

မောင်သိန်းဇော်
၂၀၁၀၊ ထီးချိုင့်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 24, 2013

စာမျက်နှာသစ်

ချစ်တဲ့သူငယ်လေ . . .
မကျက်ဘဲနဲ့
အလွတ်ရနေလို့၊
ထောင့်ချိုးထဲကအမှောင်တွေ
ငါမဖတ်ချင်ဘူး၊
ကြယ်ကြွေညတွေ ပုံထားလိုက်။

ချစ်တဲ့သူငယ်လေ . . .
မကြည့်ဘဲနဲ့
မြင်နေရလို့၊
ဆူးကြိုးပေါ်ကနှင်းစက်တွေ
ငါမဖတ်ချင်ဘူး၊
အပြုံးအရယ်တွေ သွန်ပစ်လိုက်။

ချစ်တဲ့သူငယ်လေ . . .
တောင်တွေရဲ့ဟိုဘက်မှာ
နေထွက်လောက်ပြီ၊
အိပ်နေတဲ့ငါနိုးဖို့
ငါ့စိတ်နှိုးပြီ၊

ချစ်တဲ့သူငယ်လေ . . .
အနာဂတ်ကို စွန့်ခွာရအောင်။ ။

မောင်သိန်းဇော်
၂၀၁၀၊ အင်းစိတ်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 23, 2013

နာရီ

အချိန်တွေ
သေလိုက်ရှင်လိုက်။

ပန်းကလေးကိုလည်း
မကယ်တင်နိုင်သေး၊
ကိုယ့်ကိုယ်ကိုယ်လည်း
မကယ်တင်နိုင်သေး၊

လမင်းကြီးရေ . . .
အခွင့်အရေးဆိုတာ
ခု မစားရင် ပုပ်သိုးသွားမှာလား။

ရထားတွေကို
သံလမ်းတွေက ချိုးကွေ့သွားတယ်။ ။

မောင်သိန်းဇော်
၂၀၀၄၊ ပြည်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 22, 2013

ဘဝ

မျဉ်းဖြောင့်တွေ
နောက်ကြောင်းမလုံကြဘူး။

ကျွန်တော်ဖြင့်
လူကြားလမ်းကြား
ပြောင်ပြောင်တင်းတင်း
လည်ပတ်သူ နာရီကို
တစ်နေကုန်အောင် ငုံ့ကြည့်နေရ

လူနေအိမ်တွေ သစ်ပင်ထက် မြင့်လာ
လူတွေသစ်ရိပ်အောက် တည်ရှိဆဲ။ ။

မောင်သိန်းဇော်
၂၀၀၄၊ ၃၄ လမ်း
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 21, 2013

ကဗျာဆရာ

မိုးထဲလေထဲ
ကိုယ့်အသက်ကိုပွေ့ပြီး
ကဗျာရေးသူ

ဆွေးမြေ့ဖွယ်
နှင်းမြူတွေနဲ့ လုံးထွေးလို့၊
သူ့အတွေးမှာ သွေးကိုတွေ့

ဘဝ၌
ရွတ်ဆိုခဲ့သမှ မမေ့နိုင်၊
ဘဝ၌
မရွတ်ဆိုခဲ့ပေမဲ့ ကြားနိုင်၊

သေခြင်းတရားဆိုတာ
ခဲရာခဲဆစ် မဟုတ်ပါဘူး၊
ကိုယ့်ဘက်က
လိုက်လျောနိုင်ဖို့ပဲ လိုပါတယ်။ ။

မောင်သိန်းဇော်
၂၀၀၂၊ ရန်ကုန်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 20, 2013

ပန်းကလေး

ပန်းကလေး
ပန်းကလေးက
ပန်းကလေးဖြစ်ရတာ
သိပ်စိတ်ပါပုံ မပေါ်ဘူး၊

သူ့မှာ
ရင်ခုန်စရာ ဂဃနဏမရှိ။
ကွယ်တို့ရယ်. . .  မွှေးရုံ လှရုံနဲ့
ပန်းတစ်ပွင့်ရဲ့ ဝတ္တရား ကုန်မတဲ့လား
ပန်းကလေးရေ . . .
မင်းစိတ်ကူးလေးနဲ့ ငါ့ကိုပစ်ပါ၊
တစ်ချက်ပစ်ရင် တစ်ကောင်ကျရမယ်လို့
ဆယ်နှစ်လရာသီလုံးလုံး
ကိုယ့်မှာ
မေတ္တာတရားကို ပြောပြဖို့
ရေ မီး အပြည့်အစုံနဲ့
ခန့်ခန့်ကြီး အကျပ်ရိုက်နေသူ၊

ပန်းကလေးရေ . . .
နှလုံးသားထဲက လေယာဉ်ပျံတွေ
အသံပဲကြားနေရ အိုဇုန်းလွှာပါးတာကနေ
နောက်ဖေးဝန်းထရံလေး ပျက်နေတာအထိ
အချစ်မရှိရင် ဘယ်အရာမှ
ပြန်ကောင်းလာနိုင်မှာ မဟုတ်ပါဘူး၊

ပန်းကလေးရေ . . .
စောင့်ဆိုင်းမှုတွေ ကြန့်ကြာလွန်း
ဆန္ဒတွေ အိပ်မက်ထဲပွင့်ကြ၊
ကြယ်စုံညရဲ့ ဘူးစင်လေးတစ်စင်အောက်မှာ
အချစ်နဲ့ကမ္ဘာ
အိုအောင်မင်းအောင်မွှေးလို့။
ပန်းကလေးရေ . . .
ခြေချော်လက်ချော် အလွမ်းလေးတောင်
မင်းမရသင့်ဘူးလား၊

ရှေးရေစက်တွေ
ခေျာကလက်ထဲထည့်ပြီး
မင်းအတွင် လက်ဆောင်ပေးချင်တယ်၊
ကွယ်တို့ရယ် . . . မွှေးရုံ လှရုံနဲ့
ပန်းတစ်ပွင့်ရဲ့ ဝတ္တရား ကုန်မတဲ့လား

ပန်းကလေးရေ . . .
လမ်းထိပ် မုန့်ဟင်းခါးဆိုင်လေးကနေ
နိဗ္ဗာန်အထိ မင်းနဲ့အတူ သွားချင်တယ်၊
နေ့တွေ ညတွေ
တစ်ခုပြီး တစ်ခု
အရစ်ပြုန်းသွားလိုက်တာ
ဒီတစ်ဆောင်းကုန်လည်း
ကိုယ့်မှာ
ပေါင်မုန့်တစ်လုံးဟောင်းသလို
ဟောင်းရုံသာ၊ ဒါပေမဲ့
သူ့မှာ
ရင်ခုန်စရာ ဂဃနဏမရှိ။

ပန်းကလေးရေ . . .
ပန်းကလေးရဲ့ကောင်းကင်
မြန်မြန်အရွယ်ရောက်စေချင်လှပေါ့၊
နှင်းကျတာ၊ နေထွက်တာ၊ ပန်းပွင့်တာ
သဘာဝတရားကိုမှ မယုံရင်
မင်းနဲ့ငါ
ဘာကိုယုံမလဲ။ ။

မောင်သိန်းဇော်
၂၀၀၁၊ တောင်ငူ
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 19, 2013

ဟင်္သာ တချင်း

မမြန်ချင်နေပါစေ
မမြုပ်ရင်တာဝန်ကျေပြီဆိုတဲ့
ဧရာဝတီကြီးရယ်၊ ငါရယ်
၂၀၀၁ ထဲ စီးဆင်းဆဲ . . .

မြစ်က မြို့ကို ထမ်းလိုက်
မြို့က မြစ်ကို ထမ်းလိုက်နဲ့
ဟင်္သာတွေ ဘယ်လောက်လွမ်းလွမ်း
သင့်မေတ္တာ မပင်ပန်းခဲ့ဘူး။

ရေက မြေကို လွှမ်းလိုက်
မြေက ရေကို လွှမ်းလိုက်နဲ့
သူတို့ ဘဝတွေ
အချိန်က ဖုံးအုပ်သွား -

ဗျိုး . . .
'ကိုလင်းခက်'
ခု ကျွန်တော်ရောက်နေတဲ့
ကမ်းတစ်ဖက်မှာ
ဟင်္သာငှက်တွေ မမြင်ရပေမဲ့
အတောင်ခတ်သံတွေ ကြားရတယ်။ ။

မောင်သိန်းဇော်
၂၀၀၁၊ ဟင်္သာတ
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 18, 2013

အကျွတ်အလွတ်

လေက
ယာမြေကို
ပွေ့ချီသွားဖို့ ကြိုးစားခိုက်၊

တို့ကမ္ဘာ
အငွေ့ပြန်ခွင့် မရတာ
ဘယ်လောက်ကြာပြီလဲ

ရိုးပြတ်ကွင်းထဲ
အစုလိုက် အပြုံလိုက်
တံလျှပ်တွေ
တစ်နေကုန် တက်ကြွလို့၊
အကောင်းပကတိကြီးကနေ ရုတ်တရက်
'ငါဟာ အမှန်တရား'လို့
ငယ်သံပါအောင်အော်ရင်း၊
'ဒီမှာအမှန်တရား'လို့
မီးခိုးတအူအူ အချက်ပြရင်း၊

ကြံမိကြံရာ ကြံပင်တွေရဲ့နောက်

ညနေခင်းဟာ
သူ့ကိုယ်သူ မီးသင်းလို့
ထွက်မြောက်ပေါ့။ ။

မောင်သိန်းဇော်
၂၀၀၀၊ ဧလာ
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 17, 2013

တောင်ကုန်းအဟောင်းများ

နွေ မိုး ဆောင်း ရယ်
နင် ဘယ်ပြောင်းပြောင်း
ငါတို့ ကမ္ဘာက
ရိုးရိုးသားသား ဟောင်းတဲ့အဟောင်းပါ၊
ပစ်ထားခဲ့ရင်တောင်
ဘာရှက်ဖို့ ကောင်းမှာလဲ။

လေညင်းရေ
လွမ်းဖို့ အဖော်မညှိလေနဲ့
သင်သွေးအားကောင်းရင်
ငါတို့ နှလုံးသားထဲက ဖြတ်မောင်းပါ။

အချိန်နာရီဆိုတာ
သူရဲဘောကြောင်တဲ့ စက်ဘီးတစ်စီး၊
အသစ်နဲ့ အဟောင်း ခုပဲ ဇာတ်ပေါင်းကြစို့၊
အနာဂတ်ကိုယ်တိုင် ငါတို့စွဲလမ်းမှုထဲက
အဟောင်းတစ်ခုဆိုတာ ဝန်ခံရဲ့ မဟုတ်လား။
၂၀၀၀ရဲ့အဆုံး
တောင်ကုန်းအဟောင်းများ , , ,
ဘာကိုလွမ်းအား ပိုနေသလဲ
မြေသားလှိုင်းလုံး၊ အဲဒီ့တောင်ကုန်းများအောက်
ရုန်းကန် ပွင့် ရွ စကားလုံးတို့အမြစ်တွယ် ခုံးထ၊
အရှုံးဆိုတာလည်း သဘာဝကျရင် လှပတယ်။

လေညင်းရေ
လွမ်းဖို အဖော်မညှိလေနဲ့၊
သင်သွေးအားကောင်းရင်
ငါတို့ နှလုံးသားထဲက ဖြတ်မောင်းပါ။

ရာစုနှစ်တစ်ခုရဲ့ အစွန်
သမိုင်းဦးမြို့အဝင်က ဆည်းဆာ
သူ့ကဗျာ
သွေးအား ကောင်းတုန်းပါပဲ။ ။

မောင်သိန်းဇော်
၂၀၀၀၊ ရေနံချောင်း
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 16, 2013

နိဗ္ဗိန္ဒ

မနက်ခင်းမှ ဟုတ်ရဲ့လား။

ကြယ်တွေ
ဘီယာဆိုင်ထဲက မထကြသေး
လေစိမ်းများ
အပျော်အပါး မက်လွန်းတယ်၊
ဘယ်သယံဇာတကမှ
အသက်ထက်ဆုံး ပြုံးရွှင်နေမယ်
ငါ မမျှော်လင့်ခဲ့ပါ။
ဘဝရဲ့ နွေရက်တွေ အသံထွက်မလှပ၊
သံငုတ်ကြွနေတဲ့ ညတွေထဲ
နှင်းတွေ ဟိုတစ်စ သည်တစ်စ
ဘာကိုမှ လွမ်း မရနိုင်တာ စိတ်အညစ်ဆုံးတဲ့၊
ဆိုလက်စ သီချင်းလေး
အမြင့်တင်ရင်း လုံးပါး ပါးလို့၊
အချိန်မတော်ကြီး
ထ ထ လှော်ရတဲ့ လောကဓံမှာ
မြစ်တွေဟာ မအိပ်ခဲ့ရဘူး။

မနက်ခင်း မှ မနက်ခင်း
မင်းနဲ့မှ
အဝိဇ္ဇာတရားတောင်
အားကုန်လှပြီ။ ။

မောင်သိန်းဇော်
၂၀၀၀၊ ပြည်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 15, 2013

မီးနဲ့လုပ်တဲ့မုန့်

သူ့လက်ထဲမှာ
လေပွေတွေ
တစ်ခုပြီးတစ်ခု၊ အပူတပြင်း
အပူနဲ့ကြီးပြင်း

လောင်မြိုက်ခြင်းနဲ့
ချုပ်သီထားတဲ့
ပွဲစျေးတန်းတစ်လျှောက်

မီးဖိုထက် မီးတောက်ကပိုကြီး

မိန်းမသားတစ်ယောက်
မီးတောက်တစ်ခု
လမ်းနဲ့အစီအရီ

အမြစ်က မြေကိုတွယ်သလို၊
လူ့ကမ္ဘာပေါ် သူနေထိုင်ပုံရဲရင့်

မုန့်ကိုရောင်းမှာလား?
မီးကိုရောင်းမှာလား?
တစ်ဆောင်းလုံးနှစ်ထားတဲ့
ခက်ဆစ်ကိုတော့ သူ မရောင်းဘူး။

လ၊ မှောင်လေ လှလေ
နေ့တစ်နေ့ကို ပြန်အမ်းဖို့
ကြယ်အကြွေတွေ ရေတွက်ရင်း။ ။

မောင်သိန်းဇော်
၂၀၀၀၊ ရေတာရှည်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 14, 2013

တရွေ့ရွေ့ညနေ

စံပယ်မဟုတ်
ကြယ်မဟုတ်သည်
တစ်နယ်စီဝေး
တစ်သွေးလိုလှ
ချစ်ဒုက္ခများ . . .

နေနဲ့ဝေး
လနဲ့ဝေး
ပင်လယ်နဲ့ဝေး
တောတောင်နဲ့ဝေး
ကောင်းကင်နဲ့ဝေး
ရွှေပြည်တော်ဝေး
အမေနဲ့ဝေး
ဝေးနေသေးသမျှ

အချစ်ရေ
တရွေ့ရွေ့ညနေတွေ
စိတ်မရှည်တော့ဘူး။ ။

မောင်သိန်းဇော်
၁၉၉၈၊ ရန်ကုန်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 13, 2013

သဘာဝတရားကမေ့လျော့နေသော ကျွန်ုပ်တို့၏နာမည်များ

ဥသြ ဘယ်ပျောက်
ပိတောက်ဘယ်ရောက်
ရေတစ်ပေါက်တောင်
ငှဲ့ချလို့မရ၊ ဘဝမျိုးနဲ့
ပြောလိုက်ကွယ်
နွေကလည်း နောက်ဆို
နွေမဖြစ်ချင်တော့ဘူးတဲ့။ ။

မောင်သိန်းဇော်
၁၉၉၆၊ မန္တလေး
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 12, 2013

ဆည်းလည်း

ညောင်ရွက်တွေကို
ဦးခေါင်းနဲ့ပွတ်တိုက်ပြီး
လမ်းလျှောက်ကြ၊
ညောင်ရွက် ညောင်ရွက်ချင်း
ပွတ်တိုက်ကြ၊
ညောင်ရွက်နဲ့လေ
ပွတ်တိုက်ကြ၊
အရိပ်တစ်ခုနဲ့တစ်ခု
ပွတ်တိုက်ကြ၊

အသံ အားလုံး ညောင်ရိပ်ခို လို့။ ။

မောင်သိန်းဇော်
၁၉၉၆၊ ရန်ကုန်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 11, 2013

ကောင်းကင်

ရေက ပက်ထုတ်လိုက်တဲ့နေရောင်

မြောင်းမြဟာ
ငါ့မျက်နှာပေါ် ဘောင်ဘင်ခတ်လို့၊

ညနေငန်းအုပ်၊ တဖိတ်ဖိတ်လက် ဗေဒါပွင့်များ
အတောင်ပံနဲ့လူတချို့ ကျောကုန်းပေါ်က မြစ်
ငါတရွတ်တိုက် မျော ပါ သွား ရာ

၁၉၉၅
ဇန်နဝါရီကို တံခါးဖွင့်ကြည့်လိုက်တယ်
ရိတ်သိမ်းကြ၊ အရှင်လတ်လတ် နွံထဲက ကောင်းကင်။ ။

မောင်သိန်းဇော်
၁၉၉၅၊ မြောင်းမြ
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 10, 2013

မီးဖွင့်လိုက်

နေမွန်းတည့်ငါ့အိမ်မှာ
အမှောင်တွေ သိပ်သည်းလွန်းလှသမို့
                                  မီးဖွင့်လိုက်

ခန်းလုံးပြည့်မှောင်တဲ့ အမှောင်ထဲ
တိမ်ရောင်စုံ မမြင်ရ၊
ပင်လယ်စင်ရော်နဲ့ လှိုင်းလုံးများ မမြင်ရ၊
စိမ်းညို့တောင်တန်းတွေ မမြင်ရ၊
ငါ့ရဲ့တစ်ခန်းလုံးမှောင်ရဲ့
                                  မီးဖွင့်လိုက်

ချစ်ခြင်းစကားဖွင့်ဟတဲ့
မျက်လုံးလေးကို မမြင်ရအောင် မှောင်မည်း၊
အလှတရားနဲ့ဝင်းမှည့်တဲ့
သီချင်းသံကို မကြားရအောင် မှောင်မည်း
ပုပ်အဲ့အဲ့အမှောင်တွေသာပြည့်နှက်၊
ပြီးတော့ မှောင်မည်း
                                  မီးဖွင့်လိုက်

လူတစ်ယောက်ရဲ့ ဦးခေါင်း၊ အိပ်မက်တွေနဲ့
အက်ကြောင်း ထနေတဲ့ ကဗျာပေါ့၊
ဟောဒီကမ္ဘာ လင်းရမယ်၊ ဟေ့ညီလေး
သန်မာတဲ့အတွေးထဲက သွေးတစ်စက်ကျလာ
မီးတောက်ဟာ ကိုင်လို့မရဘူး . . .
                                  မီးဖွင့်လိုက်

အာရုံတွေ ငါ့အတ္တနဲ့ထွန်းညှိ
ပျော်မှုအတိပြီးတဲ့ အသံခြေလက်တို့နဲ့ပေါ့၊
လောကဓံတရားကို ညမွှေးကိုင်းတစ်ကိုင်းလို
ငါတို့ဘဝထဲ ညွတ်ကိုင်းလာအောင်
                                  မီးဖွင့်လိုက်

နှလုံးသာတွေနဲ့ ထွန်းညှိ၊ မြို့ရွာတွေနဲ့ ထွန်းညှိ
တိုင်းပြည်နိုင်ငံနဲ့ ထွန်းညှိ၊ ကမ္ဘာလောကနဲ့ထွန်းညှိ
အဲဒီအလျှံညီးညီးပျော်ရွှင်မှုတွေရဲ့
အရိပ်နဲ့အရောင်ဟာ
ဒြပ်ဝတ္ထု အကောင်အထည် မရှိတဲ့
မောင်သိန်းဇော်တစ်ယောက်ဖြစ်တယ်၊
တောက်ပတဲ့ ပွဲခင်းကြီးဟာ
မောင်သိန်းဇော်ရဲ့
အခြားမောင်သိန်းဇော်တစ်ယောက်ဖြစ်တယ်
                                  မီးဖွင့်လိုက်

မနက်ခင်းလေးရေ
တို့နှစ်ယောက်ရဲ့ အလင်းရောင်ဟာ
ဘယ်တော ဘယ်တောင်မှာ ရေငတ်နေပြီလဲ
                                  မီးဖွင့်လိုက်

စိမ်းလန်းခြင်းကို ဘယ်ခါမမေ့လျော့တဲ့
လယ်ကွင်းတွေ ပျော်ရွှင်ဖို့၊
                    မီးဖွင့်လိုက်၊ မီးဖွင့်လိုက်

မိုးသားတိမ်တိုက် (သို့မဟုတ်)
ပျံသန်းလာတဲ့သမုဒ္ဒရာကြီး အတောင်မညောင်းဖို့၊
                                  မီးဖွင့်လိုက်၊ မီးဖွင့်လိုက်

ရပ်နားခြင်းမရှိတဲ့ မြစ်ရေအလျဉ်တွေ လန်းဆန်းဖို့
                                  မီးဖွင့်လိုက်၊ မီးဖွင့်လိုက်

ဒီမှာမိတ်ဆွေ
ငါတို့အားလုံးရဲ့ အမေ့ရင်ခွင် ထိန်ညီးဖို့
ကမ္ဘာကြီးကို မီးဖွင့်လိုက်။ ။

မောင်သိန်းဇော်
၁၉၉၅၊ ရန်ကုန်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 9, 2013

ဟိုပင်၌ သတင်းစာဖတ်ခြင်း

ဘာမှာမလဲ
တိုက်ဂါးဘီယာ
မရိဒ္ဒါလား . . . ။

အေး၊ အဲဒါမဟုတ်ဘူး
A B C  မဟုတ်ဘူး
P M G မဟုတ်ဘူး။

ကြည်ရွှင်ရွှင် မျက်လုံးနဲ့
နေ့စဉ် ချိုပြုံး၊ နှလုံးသားလေး
အိမ်က ရေဆာတယ်ကွယ်။ ။

မောင်သိန်းဇော်
၁၉၉၅၊ ဟိုပင်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 8, 2013

ရှတတ အလုံးအဖန်များ

ကိုယ့်အဆင်အသွေးကို
ရှက်ရွံ့စက်ဆုတ်စွာ ခါယမ်းနေတဲ့
အဝတ်စတစ်ခုအောက်မှာ ငါ ရပ်မိ

အဲဒီအဝတ်စရဲ့ ရှတတအရိပ်က
အရေပြားတွေပေါ်
ကြောင်တစ်ကောင်ပွတ်သပ်သလို၊
ငါ့စိတ်ကိုပွတ်သပ်

အသင်
မျက်စိစုံမှိတ်ပြီး ဘာကိုကြည့်နေသလဲ
အသက်မရှိတဲ့တူရိယာတွေက
အဖန်တလဲလဲ သေတဲ့သံစဉ်တွေကို
မှုတ်ထုတ်တယ်။
မနက်ခင်းတစ်ခုလုံး
စုန်းစုန်မြုပ်သွားအောင် မှုတ်ထုတ်တယ်။
စိတ်ကူးစိတ်သန်းတွေ
အရိုးပြိုင်းပြိုင်းထသွားအောင် မှုတ်ထုတ်တယ်။
ထိတွေ့သမျှ ရေမြေအားလုံး
သွေးစို့သွားအောင် မှုတ်ထုတ်တယ်။

ဒီလိုနဲ့
အရိပ်ရဲ့အလုံးအဖန်များ
သွေးပျက်ရူးနှမ်းစွာ
ငါ့ဦးခေါင်းပေါ် တလူလူလွင့်ဆဲ

ငါ ဆက်ရပ်နေမိ
မွန်းကျပ်လွန်းတဲ့ သစ်ပင်တွေ
မုန်တိုင်းမျှော်သလိုမျိုး။ ။

မောင်သိန်းဇော်
၁၉၉၅၊ မိုးကောင်း
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 7, 2013

အဆင်မပြေမှု နေ့တစ်ဝက်

နမော်နမဲ့တစ်ယောက် မဟုတ်ဘူးလို့
ကိုယ့်ကိုယ်ကိုယ် တာဝန်ယူရဲတယ်၊
ဒါပေမဲ့
အဆင်မပြေမှု နေ့တစ်ဝက်မှာ

ကျွန်တော် မီးသီးတစ်လုံးဝယ်ဖို့
ဆိုင်ထဲဝင်လိုက်တယ်၊
သွားနဲ့ခံတွင်း ပြုပြင်ဆိုင်ဖြစ်နေလို့
ပြန်ထွက်ခဲ့ရတယ်။
ကျွန်တော်မျက်မှန်ပါဝါမြှင့်ဖို့
ဆိုင်ထဲဝင်လိုက်တယ်၊
လယ်ယာသုံးပစ္စည်းအရောင်းပြခန်းမဖြစ်နေလို့
ပြန်ထွက်ခဲ့ရတယ်။

ကျွန်တော်
အိမ်ရိုက်သံ အနည်းအကျဉ်းဝယ်ဖို့
ဆိုင်ထဲဝင်လိုက်တယ်၊
တယ်လီဖုန်း အိပ်ချိန်းဖြစ်နေလို့
ပြန်ထွက်ခဲ့ရတယ်။
ကျွန်တော်
ပြက္ခဒိန်အသစ်နဲ့ မဂ္ဂဇင်းတချို့ဝယ်ဖို့
ဆိုင်ထဲဝင်လိုက်တယ်၊
နှစ်ဆယ့်လေးနာရီ သွေးစစ်ဌာနဖြစ်နေလို့
ပြန်ထွက်ခဲ့ရတယ်။

ဆိုင်းဘုတ်တွေကို
ကျွန်တော်အသေအချာ ဖတ်ခဲ့တယ်။
ဒါပေမဲ့
ကျွန်တော့်ကိုတော့
ဆိုင်းဘုတ်တွေက ဖတ်မကြည့်ကြဘူး။

နေ့တစ်နေ့ အလျားအတိုင်း
ချွေး၊ ခြေသံ နဲ့ မှားယွင်းမှု
တစက်စက် စိမ့်ဝင်
အပေါ်မော့ကြည့်တော့ နေမွန်းတည့်။ ။

မောင်သိန်းဇော်
၁၉၉၅၊ ရန်ကုန်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 6, 2013

ဒီ

လရိပ်တွေ
မနိုးမချင်း
စံပယ်ခင်းာ
စောင့်နေရ၊

အပျက်အတိုင်းပင်လယ်
လမ်းထက်နိမ့်
ဘဝမယဉ်ကျေးမှု
အသံဗလံများလှုပ်ယမ်း
နေ့ရက်ဟောင်းစုတ်ဖြဲတဲ့
လေရိုင်းနှယ်
ဒီ ရေ ပြေး ခဲ့၊

အတားအဆီးမဲ့အိမ်
အိပ်ကောင်းတုန်း။ ။

မောင်သိန်းဇော်
၁၉၉၅၊ အောင်ပင်လယ်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

ချစ်သူသို့

ဒီကောင့်ကဗျာ မဖတ်ဘူးလို့ တင်းထားတာ
တင်းထားလို့ရလား။

အောင်ချိမ့်
ချင်းတွင်းမဂ္ဂဇင်း၊ စက်တင်ဘာ - အောက်တိုဘာ၊ ၂၀၁၃။

Oct 5, 2013

နေ့စွဲ

ငါ့ကိုယူသွားဖို့
မိုးချုန်းသံတွေကြားရ။

နေ့စွဲများ
အဆန်းတကြယ်ဖိစီး၊
တစ်ကိုယ်ရည်
အစိတ်စိတ်အမွှာမွှာဖူးပွင့်စဉ်၊
နေ့နဲ့ညမြှုပ်နှံရာ
စိတ်မြေသားထုထဲ တရိပ်ရိပ်ပျံသန်း၊
လမ်းအားလုံး
ငါ့ကိုယူသွားဖို့
မိုးချုန်းသံတွေကြားရ။

တစ်မုဟုတ်ချင်း
ငါ့ကိုယူသွားဖို့
မိုးချုန်းသံတွေကြားရ။ ။

မောင်သိန်းဇော်
၁၉၉၁၊ မြန်အောင်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 4, 2013

ရေချိုးဆိပ်

သစ်ပင်တွေ
အမှောင်ထဲရပ်ပြီ။

လရောင်က ညှီတာ လား။
ပင်လယ်က ညှီတာ လား။
နှလုံးသားတစ်ခုခုဆီက ညှီတာလား။

အုန်းသီးခွံ၊ ခရုတစ်ခြမ်းပဲ့နဲ့
ခြေရာများ . . . အားလုံးအိပ်ချိန်

တဝုန်းဝုန်းနဲ့
လာ အချစ်၊ ကျွန်တော် ခင်ဗျား
အားလုံးမြင်တယ်
ပင်လယ်မှာ စံပယ်တွေပွင့်လိုံ ။ ။

မောင်သိန်းဇော်
၁၉၈၉၊ သံတွဲ
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 3, 2013

နှစ်ထောင့်တစ်ဆယ့်သုံး

မေ - စက်တင်ဘာ
--------------------

ဒိုင်ယာရီမှာ
ဘာမှ မရေးဖြစ်ဘူး။

ဝယ်ထားတဲ့ စာအုပ်တွေ
ဘာမှ မဖတ်ဖြစ်ဘူး။

အိမ်ကို သတိရလည်း
ဖုန်း မဆက်ဖြစ်ဘူး။

ဘာဖြစ်ချင်နေတာလဲ ဆိုပြန်တော့
ဘာမှ မဖြစ်ချင်ဘူး။

သီဟသူ
၃၊ အောက်တိုဘာ၊ ၂၀၁၃

အသစ်တဖန်

အဲဒီမြူနှင်းတွေပေါ့၊
နှလုံးသားကို
ဆတ်ပိုင်းကျိုးကျစေတာ

လောကကိုရွှေဖြစ်အောင်
မပြုံးနိုင်တဲ့အဆုံး
နေလုံးလည်းကွယ်ပြီ။
ပြီး . . .
တစ်စက်ချင်းရွာတဲ့မိုးထဲ
ပထဝီမြေသားဟာ
ခြောက်သွေ့လွန်းရ၊

ကမ္ဘာတည်မယ့် ဇ နဲ့
ဘယ်သူလဲ?
လ ကို ယူဆောင်ခဲ့တာ
သူ အနုံညာတ မဟုတ်ပေဘူး။ ။

မောင်သိန်းဇော်
၁၉၈၉၊ ရန်ကုန်
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 2, 2013

တိတ်ဆိတ်နေသော ဇာတ်သဘင်

ဓာတ်ဆီကုန်လို့လား။
မိုးလင်းလို့လား။
စက်ချွတ်ယွင်းလို့လား။
ညဟာ
ကြည့်နေတဲ့မှန်ထဲပက်လက်လန်လဲကျ၊

လူ့ဘဝရဲ့
ဝါကျတစ်ကြောင်းက
ခေါင်းထဲမှာ ပါးပျဉ်းထောင်လို့၊
ပတ်စာ ခွာလိုက်တာနဲ့
အိပ်ပျော်သွားတဲ့ ဗုံတွေလို
ကံမကောင်းခဲ့။
ဒီလိုနဲ့
သက္ကရာဇ်ဖြိုသူပ၊
ကြိမ်ဖန်များစွာ သစ်ခဲ့တဲ့မျက်နှာ
(ကြိမ်ဖန်များစွာ) ပြန်ဟောင်းသွား

တိုင်ဖုံးကြားမှာ
ကားဆွဲလေးတစ်ယောက် ဖျားနေရဲ့။

သူအပြင်
ချုပ်ရိုးတွေပြေ
ဘော်ကြယ်တွေ တစ်ပွင့်ချင်းပြုတ်ကျနေတဲ့
လူစွမ်းလူစရှိ၊
သူအပြင်
အိပ်ချင်ယောင်ဆောင်နေတဲ့ အောင်မြင်ခြင်းရှိ၊
သူအပြင်
ဝါယာကြိုးတစ်ချောင်းလွတ်နေတဲ့ သစ္စာအဓိဌာန်ရှိ
သူအပြင်
ငယ်သွား လဲနေတဲ့ လောကဓံတရားရှိ
သူအပြင်
ပပ်ကြားအက်နေတဲ့ အိပ်မက်ရှိ၊
သူအပြင်
မျှော်လင့်ချက်ဟာ မျက်စိနာနေသတဲ့

အဲဒီအခါ
ပြန် မပြော နားမထောင် ကောင်လေးက
နှလုံးသားကို ဘီးကျိုးတစ်ချောင်းနဲ့ ဖြီးသင်ရင်း
(စိတ်ဆိုတာ လေးလံတဲ့အလင်းရောင်)
စိုထိုင်းထိုင်းဘဝ ကြိုးတန်းပေါ် လှမ်းတက်ရင်း
ဇာတ်သေတ္တာထဲက
ကြေးအလိမ်းလိမ်းတက်ညများ။ ။

မောင်သိန်းဇော်
၁၉၈၇၊ သာကေတ
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

Oct 1, 2013



ရိုးရိုးလေးနဲ့လှနေတာ
ခေါင်းဖြီးမထားဘူး၊
ပြောင်ပြောင်လက်လက်တွေ ဝတ်မထားဘူး၊

လသာပုံကအစ
ယဉ်ယဉ်လေးရယ်

အခါတိုင်းလို
ဗုံသံတွေထဲ ကျွံကျနေတဲ့
ညလည်း မဟုတ်ဘူး။
လေတဖြူးဖြူးနဲ့ ည
လကို တစ်ကိုယ်လုံးမြင်ရတဲ့ ည
ကြယ်တွေဆိုလည်း
မျက်စိနောက်စရာကောင်းလောက်အောင်
များများစားစားကြီး ရှိမနေဘူး၊
ယောက်ယက်ခတ်မနေဘူး၊

တစ်ပွင့်ချင်းနဲ့ တစ်ပွင့်ချင်း
ကင်းကင်းရှင်းရှင်းလေးထွန်းနေတာ
သိပ်ကို အချိုးအစားကျတဲ့ည

သဘာဝဖြစ်လျက်နဲ့
တစ်ခါတစ်ရံ
သဘာဝကျစွာ လှပခွင့် မရတဲ့
သဘာဝတရားဟာ
ဒီညထဲ
သဘာဝကျစွာလှပလို့၊

ဟိုယခင်
ရှောင်ပုန်းနေတဲ့ညတွေကို
အလင်းတစ်ဝက်၊ အလွမ်းတစ်ဝက်နဲ့
ကလဲ့စားခေျနေသလိုမျိုး၊

နဂိုကလှပြီးသား ည
စိတ်လွတ်ကိုယ်လွတ်နဲ့
လှချင်တိုင်း လှထွက်သွား
ညငတ်နေတဲ့သူ
ဒီညကို မေတ္တာသက်ဝင်မဆုံးပေါ့။

နှလုံးသား ဖမ်းဆီးချုပ်နှောင်မထားတဲ့


လရောင်မှန်သမျှ အလဟဿမဖြစ်စေရတဲ့


သန်းခေါင်းယံပင်ဖြစ်လင့်ကစား
ပန်းရနံ့တွေကို ဝှက်မထားတဲ့
ကြယ်ပေါင်း ရံ ခ
ကွန်ထဲက လွတ်ထွက်လာတဲ့ညရယ်
ငါ ချက် မစားရက်ပါဘူး။ ။

မောင်သိန်းဇော်
၁၉၈၆၊ မြောင်းမြ
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။

မန္တလေး၊ ၂၀၁၃

ရတနာပုံမန္တလေး
မန္တလေး
ကျွန်မတို့ မန္တလေး
- လူထုဒေါ်အမာ

မန္တလေး
၂၀၁၃ မန္တလေးဟာ
ကျွန်တော် သိခဲ့၊
ထိတွေ့ခဲ့၊
နေထိုင်ခဲ့တဲ့ မန္တလေး
မဟုတ်တော့ပါ။

မန္တလေး (၂)
နေပူပူ
လမ်းပေါ်မှာ
ခေးအော့စ်နဲ့ ယဉ်ပါး
စက်ဘီး၊ ဆိုင်ကယ်နဲ့ မော်တော်ကား။

မန္တလေး (၃)
မန္တလေးဟာ ကျွန်တော့်ကို သူစိမ်းတစ်ယောက်လို
ကျွန်တော်ဟာ မန္တလေးမှာ ဧည့်သည်တစ်ယောက်လို
ထွက်ခွာခဲ့သူဆိုတော့
ကျွန်တော့မန္တလေးလို့
တိုးတိုးလေးသာ ကျူးရင့်ရုံ.,,

သီဟသူ
၁၊ အောက်တိုဘာ

အိမ်အပြန်၊ ၂၀၁၃

စိတ်ရှိတိုင်း
ဟောဟောဒိုင်းဒိုင်းတော့မဟုတ်။

ကြိုကြိုတင်တင်၊
ပြင်ပြင်ဆင်ဆင်။

ဖြစ်မလာတဲ့ ကြိုတင်စီစဉ်ထားမှုများ၊
ဖြစ်လာခဲ့တဲ့ မတော်တဆ ထိခိုက်မှု။

'မင်း သတိမထားလို့ မသိတာပါ၊
ငါကတော့ အမြဲ အနားမှာပါ'လို့ ဆိုတဲ့
လောကဓံ/ဒဏ်။

သွားနေကြ စာအုပ်ဆိုင်ဘက်
ခြေဦးမလှည့်ခဲ့မိပါ။

သီဟသူ
၁၊ အောက်တိုဘာ၊ ၂၀၁၃

Jun 4, 2013

ဇာတ်လမ်းအကျဉ်း

ပက်ကြားအက် မြေပြင် (၁၅မိနစ်)၊
ကြက်ခြေခတ်အပြည့် စာမျက်နှာများ
တစ်ရွက်ပြီးတစ်ရွက်ကျ (၁၅မိနစ်)၊
မီးတောက်မီးလျံများ (၅မိနစ်)၊
ကြက်ခြေခတ်အပြည့် စာမျက်နှာများ ပြာ အဖြစ်ပြောင်းသွား (၅မိနစ်)၊
မီးသင့် ပက်ကြားအက် မြေပြင်ပေါ် ပြန့်ကျဲနေသော စက္ကူပြာများ (၅မိနစ်)၊
နောက်ခံတေးဂီတ - ဟစ္စတီးရီးရ ရယ်သံ ၊ မွန်းလိုက်ဆိုနာတာ၊ နဂါးနီ (၁၅မိနစ်စီ)။

သီဟသူ
၃-၄၊ ၆၊ ၂၀၁၃

May 4, 2013

နှစ်ထောင့်တစ်ဆယ့်သုံး

ဧပြီ
----

တစ်စက္ကန့် မှ တစ်စက္ကန့်
ကူးပြောင်းဖို့ ကြာမြင့်ပုံ
နေ့ရက်များ မြန်မြန်ဆန်ဆန်
ကူးပြောင်းသွားပုံ
အားလုံး ပုံမှန်အတိုင်း
ပုံမမှန်တဲ့ စိတ်နဲ့
မှန်ပုံမပေါ်တော့တဲ့ အမှန်တရား
ဒီနွေမှာ
ငါ့လှေငါထိုး ဘယ်ပဲရောက်ရောက်
ကိုယ့်တရားနဲ့ ကိုယ်ဖြေပါတယ်
နေတတ်တတ်
မနေတတ်တတ်
ကျေနပ်ဖို့ပါပဲ။

သီဟသူ
၀၄-၀၅-၂၀၁၃

Apr 17, 2013

နှစ်သစ်ကူး ဆုံးဖြတ်ချက်များ


ဘယ်နေရာမှာ ဒီအချိုးအကွေ့မှားတွေကို ပြုလုပ်မိခဲ့သလဲ*
၂၀၁၂-၁၃
ဘယ်နေရာက လိပ်ပြာတွေအတောင်ခတ်လို့ ဒီစမ္ပါနဂိုရ်က နွားမပေါင်ပဲ
လာ လာ ကျိုးနေရတာလဲ
၁၃၇၄-၇၄
မသိခြင်းဟာ ကောင်းချီးပေးခံရခြင်းပဲ (သုံးကြိမ်ရွတ်)
ဘုရားသခင် သိတော်မူ၏
သို့သော်
သို့သော်..
သို့သော်...
ကိန်းဂဏန်းများ အသက်ကိုစား၏
ခရစ်သက္ကရာဇ်၊ ကောဇာသက္ကရာဇ်များ
မေ့လျော့ခြင်း မြစ်အတွင်း
အကြိမ်ကြိမ် ရေချိုးဆင်းကာ
အချိုးအကွေ့မှားများ ဆက်လက်ပြုလုပ်ရန်
တေးမှတ်ထားဆဲ

သီဟသူ
ကောဇာသက္ကရာဇ် ၁၃၇၅ပြည့်နှစ် တခူးလဆန်း ၇ရက်
*Stephen Dobyns Lost ကဗျာမှ စာသား

Apr 15, 2013

နှစ်ထောင့်တစ်ဆယ့်သုံး


မတ်
---
၁ မှ ၃၁
မနက် ၈ မှ ည ၅
လမ်းပေါ်မှာက ၁၀ နာရီ ၄၀ မိနစ် ၄ စက္ကန့် ၊ ၆၄ ဒသမ ၅၅ မိုင်

ရှင်းလင်းချက် မပါဘဲ နားမလည်နိုင်ရင်
ရှင်းပြလည်း နားလည်မှာ မဟုတ်*

ရွှေ ဝတ္ထုများ
အမြန်သွား လမ်းမကြီးပေါ်က ဘီယာပုလင်းတွေတင်လာတဲ့ကားတစ်စီးရဲ့
ကြေကွဲဖွယ် ဖြစ်ရပ်မှန် ဇာတ်လမ်း

ပိုက်ဆံအတွက် မဟုတ်။ အသိပေးခြင်းသာဖြစ်။
အရာအားလုံး လောင်ကျွမ်း**

သီဟသူ
၁၂-၀၄-၂၀၁၃
* ဉီးကာဝါန ပြောစကား
** လူရွှင်တော် ပြောစကား`

Apr 3, 2013

ပုံဖျက်ခြင်း


သဘာဝရဲ့ ရွေးချယ်မှု။ အားကြီးသူတို့သာ ရှင်ကျန်မယ့်
တောရဲ့ ဥပဒေသ။ ပြောင်းလဲနေမှု။ ရောနှောပေါင်းစည်းမှု။
မျဉ်းဖြောင့် အချိန်။ မျဉ်းပြိုင် ဆင့်ကဲဖြစ်စဉ်။ ဒိုင်နိုဆောများ။
သဘာဝက ရွေးချယ်ခဲ့တာလား။
ဒိုင်နိုဆောများ ခေါင်းမာခဲ့တာလား။
အခြားတစ်ခုခုအဖြစ် ဆင့်ကဲ ပြောင်းလဲသွားတာလား။
ရှင်ကျန်ဖို့လား၊ ရှင်သန်ဖို့လား။
ဒါဝင်မပြောလည်း ရွေးချယ်ခဲ့တယ်။ မိမိတို့ အမှတ်အသား။
နေမလား၊ သေမလား။

ကွန်မန်ဒိုဇာတ်ကားတွေ ကြိုက်လား။

သီဟသူ
၃၊ ၄၊ ၂၀၁၃

Mar 28, 2013

တယ်လီဖုန်းစကား


အကွာအဝေး မိုင်တိုင်များ
တယ်လီဖုန်း တိုင်များ
လေလှိုင်းမှ တဆင့်
ကြေးနန်းကြိုးများမှ တဆင့်
အားလုံးပဲ အဆင်ပြေကြောင်း

သား ပျော်ရဲ့လား အမေးမှာ
ဆွံ့ အ သွား
အားလုံးပဲ အဆင်ပြေပါကြောင်း

သီဟသူ
၂၇၊ ၀၃၊ ၂၀၁၃

Feb 20, 2013

နှစ်ထောင့်တစ်ဆယ့်သုံး


ဇန်နဝါရီ
-----
ပြန်ခေါ်ကြည့်တော့
မှတ်ဉာဏ်မှာ ဘာမှ မကျန်ခဲ့၊
အလင်း အမှောင် ပုံရိပ်များသာ (MB အချို့)
ကျန်ရစ်ခဲ့။

ငါ့ ဓါတ်ပုံများ -
ဒါကြောင့် ငါဖြစ်သည်။


ဖေဖေါ်ဝါရီ
------
ပြည်ထောင်စုနေ့၊ ဗိုလ်ချုပ်မွေးနေ့ -
ကလေးများနေ့၊
ချစ်သူများနေ့၊
အဖေ့မွေးနေ့၊ အစ်မမွေးနေ့၊
တရုတ်နှစ်ကူးနေ့၊
တစ်နေ့
ပြီး
တစ်နေ့
ဒီ ကွန်ပျူတာ ဖန်သားပြင်ရှေ့။

သီဟသူ
၂၀-၀၂-၂၀၁၃