> သီဟသူ [dot] blogspot [dot] com

Mar 21, 2023


Indie သီချင်းထဲက သာမန်လူတယောက်
(ကမ္ဘာ့ကဗျာနေ့/၂၃)
===============
မနေ့က မှာထားတဲ့
သဲကြမ်းတကျင်းမှာ
အနုပညာ ဘယ်နှစ်အောင်စ၊
အုတ်တခဲမှာ
အမှန်တရား ဘယ်လောက်များများ
ပါလာမလဲ

ဒီမြို့မှာ
မတ်လ တတိယအပတ် ရောက်နေပြီ
မနက် ၆ နာရီလောက်အထိ
မူလအရသာ မကျန်တော့တဲ့
မြူတွေ... မကွဲသေးဘူး
အဲသလို မြူကြောင်တွေကြား
တူးလက်စမြေကျင်းဝမှာ တောင်တောင်အီအီ ရပ်နေရင်း
အရင်ဘဝက အမှတ်မရတော့တဲ့ ကဗျာတွေ မျက်မှန်မှာ လာသီးနေလို့
​အင်္ကျီအောက်စ နဲ့ သုတ်ချရတယ်

ငါ့ကဗျာ မကောင်းလည်း
သူတို့ကဗျာ ကောင်းကြမှာပါ
ငါ မရေးလည်း
သူတို့ ရေးကြမှာပါ။ ။


#ဝင်းမင်းထွန်း
၂၁/၀၃/၂၀၂၃
အင်္ဂါ

No comments:

Post a Comment