> သီဟသူ [dot] blogspot [dot] com: အနက်ရောင်ကို ဝတ်ဆင်လာမိတဲ့နေ့

May 27, 2010

အနက်ရောင်ကို ဝတ်ဆင်လာမိတဲ့နေ့

မိုးလည်းမရွာဘူး လေလည်းမတိုက်ဘူး
အိုက်စပ်စပ်ပူလောင် ခြောက်သွေ့ ဒီနေ့ဟာ ဘာနေ့လဲ။
တချို့လူတွေက ကိုယ့်မွေးနေ့ မွေးရက်ကို မေ့လို့
တချို့လူတွေက စကားပြောဖို့ မေ့နေကြတယ်။

နံရံပေါ်က ပန်းချီကားဟာ အရောင်တွေ မေ့ပျောက်လွင့်ပြယ်
အိမ်ငယ်လေးထဲ တစ်ယောက်တည်း နေနေရတာ အားငယ်စရာလား။
လမ်းပေါ်ကို ထွက်ကြည့်လိုက်တော့ လူတွေက ဥဒဟိုသွားလာလို့
ဘတ်စ်ကားတွေက နောက်ပြန်ကြီး မောင်းနှင်နေကြသလိုလို။

ရာသီဥတုသာသာယာယာနဲ့ ကောင်းကင်ဟာ ကြည်လင်နေသယောင်ယောင်
တိမ်ပုပ်တွေ မြောက်မှတောင် ရွေ့လျား အဆန်းတကြယ်။
ဘာများမှားသွားသလဲ လက်ဖက်ရည်ဆိုင်ထဲ အသံတစ်စုံတစ်ရာမကြားရ
ဒီနေ့မှာမှ သူက အနက်ရောင်ကို ဝတ်ဆင်လာခဲ့မိတယ်။

မင်းထက်မောင်
၈၊ သြဂုတ်၊ ၂၀၀၆
ကဗျာပြောင်းပြန်/၂၀၀၆