၂၀၁၃

သက်ရောက်မှုတိုင်းမှာ
တန်ပြန်သက်ရောက်မှု ရှိတယ်။

"အဟောသိကံ" ဆိုတာကလည်း ရှိသေးတယ်။

ဆုတောင်းကောင်းရင်တော့
သားရွှေအိုး ထမ်းလာတာ မြင်ရနိုင်ပါလိမ့်မယ်။
၂၀၁၄ မှာ အဟောသိကံများ ရွှေအိုးထမ်းလာတာ မြင်ရပါစေသား။ ။

သီဟသူ
၃၁-၁၂-၂၀၁၃

၂၀၁၃

ပြန်ပေးသမားလက်မှာ ရွေးစရာ လက်ဝတ်ရတနာမရှိ
သူမကြိုက်တဲ့ လင်္ကာအပြည့်

သုခမိန်လှိုင်
၃ ဇူလိုင် ၂၀၁၃


အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

မြန်မာ၊ ၂၀၁၃

အကြောင်းအရာက ခမ်းနားကြီးကျယ်
ကျွန်တော်တို့ကတော့ သေးသေးငယ်၊

ကျွန်တော်တို့ အသက်ရှူမဝခဲ့ပါ
ကျွန်တော်တို့ ဘယ်တော့မှ အသက် ဝ ဝ ရှူရမယ်
ကျွန်တော်တို့ အသက် ဝ ဝ ရှူနိုင်ပါရစေ။ ။

သီဟသူ
၃၀-၁၂-၂၀၁၃

လေးတင်ခန်း

ဘယ်နှယ့်
ငါ မတဲ့ သစ်ရွက်လေးမှာ
စကြဝဠာကြီးက ပါနေရတာလဲ
အချစ်များမှန်လျှင်
လေးပါစေသား။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

ဒို ရေ မီ ဖာ

ချစ်သူရေ
မင်းဦးခေါင်းမှာ သက်တံ ထွက်ဖို့
အဲဒီသက်တံမှာ ငါတေးသီဖို့
အဲဒီတေးမှာ ကမ္ဘာကြီးပျော်ဖို့
အဲဒီ အပျော်မှာ နတ် လူ သာဓုခေါ်ဆိုဖို့။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

သို့ မေမေ (၁၀)

သို့ မေမေ အာလုပ်စကားမှာ ဖေဖေ့ကိုပါ စိတ်ကညွှတ်တယ်
မေမ နေကောင်းလားမေးရင်း ဖေဖေ နေကောင်းဖို့ ဆုတောင်းတယ်
မေမေက ဆော့ဖ်ဝဲဆို ဖေဖေက ဟာ့ဒ်ဝဲ
သားတို့က နေကြာပန်းတွေ
မေ နဲ့ ဖေ နေမင်းကြီးဘက်ကို အမြဲ ဦးလှည့်တယ်။

မေမေရေ
၈၀ ခုနှစ်များက ဓာတ်ပုံတွေ ပျက်သွားတာ ဝမ်းနည်းဖွယ်ပါပဲ
ခုတော့
မြေးမလေး ဓာတ်ပုံတွေဟာ နံရံအဘက်ဘက်မှာ
ပျော်စရာပါလေ။ ။

သီဟသူ
၂၈-၁၂-၂၀၁၃

စနေ နေ့တစ်ဝက် (၂၁)

နှုတ်တိုက်ချပေးတာတောင်
အကျအပေါက် များလွန်းတယ်၊
များများညည်းပြီး မြန်မြန် ပြန်ရယ်နိုင်ဖို့၊
တက်တူးလို အရေပြားပေါ်မှာသာ ရေးကြေးဆို
ဒီလောက် များများ ရေးမိမယ်မထင်။ ။

သီဟသူ
၂၈-၁၂-၂၀၁၃

နှစ်ပါးသွား

စိန်တုံးများ တစ်တုံးပြီးတစ်တုံး
ပတ္တမြားခဲများ တစ်ခဲပြီးတစ်ခဲ
ရွှေဒင်္ဂါးများ တစ်ပြားပြီးတစ်ပြား
မင်းဟာတွေလား. . .
သူများဟာတွေပါ။

တွေးခေါ်စရာမလိုဘဲ တွေးခေါ်ခဲ့ရသော အမှားများ
လူပြက်ကြီးတွေရဲ့ ငိုအားထက် ရယ်အားများ
နှစ်ပါးသွားခဲ့ပြီ။ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

၃၄" x ၄၂" ဆယ်ချပ်

၂၀၀၁ ခုနှစ်က
(ပန်းချီဆွဲဖို့) ဘောင်ကျပ်ထားတဲ
ကင်းဘတ်ဆယ်ချပ်
ဘာမှမဆွဲပဲထားတဲ့အရသာ
ဘာနဲ့မှ မလဲနိုင်ခဲ့ပါလား။

ဆွဲလိုက်ချိန်မှာ
ကမ္ဘာကျော်လိမ့်မယ်
ဒေါ်လာတွေရလိမ့်မယ်
(သေလွန်သည်အထိ)
အဓိပ္ပာယ်ဖွင့် ချီးကျူးကြလိမ့်မယ်
ထိုအချိန်မှာ
အရသာအားလုံး ဆုံးရှုံးသွားပြီဖြစ်ကြောင်း
ပြောပြခဲ့ပါတယ်။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

အလွမ်း

၁၉၇၃ တုန်းက
ငတ်ငတ်ပြတ်ပြတ်နဲ့
ကျွန်တော့်မြို့ကလေးရဲ့
အောင်မင်္ဂလာစျေးလေးထဲမှာ
စားရတဲ့ကော်ရည်ခေါက်ဆွဲအရသာ
ဘယ်မှာမှမရတော့ဘူး။

လောကတစ်လွှား
အရသာဒီလောက်ရှားသလား
(ဆန်းဆန်းပြားပြားတွေကတော့
အများသားပေါ့။)

အဖြူရောင်ဝတ်စုံလေးကို
မီးပူမတိုက်နိုင်ဘဲ
ခေါင်းအုံးအောက်မှာ
ထားအိပ်ခဲ့တဲ့
အိပ်မက်တွေ
အခုထိအရသာရှိတုန်းပဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

နောက်ဆုံးတစ်နည်း

လက်ဖက်ရည်ကို အရောင်ပြပြီး
ဘာတွေကိုများ
ငါမော့သောက်ခဲ့မိပါလိမ့်။

အရသာမရှိ ဘဝကြီးကို
အရသာရှိချင်ယောင် ဆောင်နည်းတွေထဲက
နောက်ဆုံးတစ်နည်းပါပဲလား။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

မှတ်စု (၃)

ဟာသ

လောကကြီးမှာ ဟာသပေါတယ်။
မှန်ထဲကသူ အရယ်ရဆုံး။

နေ့များ

အစွဲတွေနဲ့ ပျော်ရွှင်ကြ။
ကိုယ်တော့် ကျေးဇူးကို ချီးမွမ်းကြ။
သောကြာ။

အလွမ်း

အိမ်ပြန်ချင်စိတ်ဟာ
ရထားဥသြသံနဲ့ တွဲ/တွယ်ချိတ်ထား။

သီဟသူ
၂၃-၁၂-၂၀၁၃

LIVE SHOW

မျက်ရည်တွေသည် ချယ်ရီပန်းများ မဟုတ်
ဒေါသတွေသည် ပီယာနို မဟုတ်
အပူမီးတွေသည် ဝိုင်နီနီ မဟုတ်
ကြေကွဲမှုတွေသည် မြူဇီယံ မဟုတ်
ပသာဒ မပါ
နားဝင်မချို
အမြင်မလှ
ခမ်းခမ်းနားနား မရှိ။

ဘဝဟူသည် လိုက်ဖ်ရှိုးတစ်ပွဲ ဆင်နွှဲခြင်းမျိုး
မအောင်မြင်ခြင်းတွေကို အောင်မြင်စွာ တင်ဆက်ခြင်းမျိုး။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

(ဖြစ်နိုင်ခြေ)ပေါက်မဲများ

ငါ့အင်္ကျီအိတ်ထဲမှာ
လက်ကိုင်ဖုန်းပါတယ်
Aztor ပါတယ်
ထီတစ်အုပ်ပါတယ်
PARKER တစ်ချောင်းပါတယ်
ဗလာစာရွက်တစ်ရွက်ပါတယ်။

စကားအပြတ်မပြောလိုက်နဲ့
ဗဂျမ်းကာတွန်းထက် သာနေပြီပဲ။

အာကာသထဲကခေါ်သံကြားဖို့ရှိတယ်
ကော်လက်စထရောကျဖို့ရှိတယ်
သန်းကြွယ်သူဌေးဖြစ်ဖို့ရှိတယ်
အကြွေးစာရင်းအားလုံး
ပြီးဆုံးဖို့ရှိတယ်။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

စာကြည့်တိုက်

မသိတဲ့ဝေါဟာရ
မသိတဲ့အချက်အလက်
မသိတဲ့အဓိပ္ပာယ်
မသိတဲ့ရာဇဝင် သိလိုလျှင်
စာကြည့်တိုက်ကြီးထဲမှာ ရှာပါ။

တကယ်တော့
ငါတို့ကိုယ်တိုင်က စာကြည့်တိုက်ကြီးတွေ
မသိတဲ့အရာတွေ အများကြီးနဲ့။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

တယောများ

မာရီလင်မွန်ရိုးကိုထပ်သတ်တဲ့တသတ်တွေ
လောကဓာတ်ပညာရပ်မှာ
မိုးထိ အထပ်ထပ်ဆောက်ပြီးပါပြီ။

ပြန့်ကားကျယ်ပြောသော စက်ဝိုင်းကြီးအောက်
မေးထောက်ထားသော တယောများ
အဲဒီ့ဓာတ်ပြားဟာ သက်သေပဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

အင်္ဂါဂြိုဟ်မှ ကျောက်တုံးများ

အင်္ဂါဂြိုဟ်မှာလည်း
ကျောက်တုံးတွေ နေထိုင်ကြတာပဲ
ကျောက်တုံးတွေဆိုတော့
(လွယ်လွယ်နဲ့) ခေါင်းမကွဲဘူးပေါ့။

နတ်သမီးငါးရာနဲ့ တွေ့တွေ့
ငရဲမင်းကြီးနဲ့ တွေ့တွေ့
အရေးကြီးတာက
ခေါင်းမကွဲဖို့ပဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

စနေ နေ့တစ်ဝက် (၂၀)

ဖတ်ခဲ့တာတွေ ဘယ်လောက်တောင်ရှိခဲ့ပြီလဲ၊
ပြီးတော့ ဘယ်လောက် ကျန်ခဲ့သလဲ။
ရေးဖြစ်ခဲ့တာတွေထဲကကော
ဘယ်လောက်များ ကျန်ခဲ့သလဲ။

ကျေနပ်နိုင်ရဲ့လား။
ပျော်နိုင်ရဲ့လား။
ဒီ အားထုတ်မှုများ။*

ဝမ်းဗိုက်အဆာနဲ့ ရင်ဘတ်ဗလာကို
ပြိုင်တူပြေ/ဖြေဖို့ အားထုတ်ရင်းနဲ့
ဗလာဖြစ်မှုဟာ ပိုမို ပြန့်ကားလာ၊
နေပျော်ပါရဲ့လား။

ဒီလိုနဲ့
စနေ နေ့တစ်ဝက်များ...


သီဟသူ
၁၉၊ ၁၂၊ ၂၀၁၃

*မအောင်မြင်ခဲ့သော အားထုတ်မှုများ (http://thihathu.blogspot.sg/2013/12/blog-post_3039.html)

ကမ္ဘာကြီး

အယုံမရှိကြပါနဲ့
ကမ္ဘာကြီးဟာ (သေနေရာက)
မယုံနိုင်အောင် လှပဦးမယ်
မယုံနိုင်အောင် မွှေးပျံ့ဦးမယ်
မယုံနိုင်အောင် လန်းဆန်းဦးမယ်
မယုံနိုင်အောင် ကခုန်ဦးမယ်
မယုံနိုင်အောင် ဂျွမ်းထိုးဦးမယ်
မယုံနိုင်အောင် . . . .

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

မအောင်မြင်ခဲ့သော အားထုတ်မှုများ

ငါ လိုချင်တာ "သည်ဟာတွေ" မဟုတ်။


ဘဝမှာ "သည်ဟာတွေ" ကိုသာ
ငါ "ရ" ခဲ့။ ။

သီဟသူ
၁၇၊ ၁၂၊ ၂၀၁၃။

အပွင့်များ

ကြွေစရာတွေ ကြွေပြီးမှ
အချစ်တွေဖူးသစ်တဲ့အခါ
ငါ့အပွင့်တွေ
ဖွင့်ဖောက်ဖတ်ကြည့်ကြပါတော့။

သမိုင်းဦးအစကအတိုင်းပါပဲလား
မိန်းမနဲ့ယောက်ျား
ရိုးမသွားသေးဘူး
မြွေနဲ့ သစ်သီး
ချိုမြိန်မှုနဲ့ အဆိပ်
ငယ်ထိပ်တက်ဆဲ
အိပ်မက်တွေလည်း စျေးကြီးဆဲ။ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

တောမှော်ရုံ

ငါ့မနက်ခင်း
မောနင်းစတားမုန့်တီ
မာကျူရီလက်ဖက်ရည်
ကယ်မိကယ်ဘရားသားစ်ဂီတ
မောင်မြင့်စိုး ပန်းချီပြပွဲနဲ့
အစကောင်းခဲ့ပြီ။

အနှောင်းသေချာ၊ မသေချာ
ငါ့ကိစ္စမဟုတ်တော့။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

ဗင်ဂိုးပြန်လာလျှင် နေပျော်စေချင်သောကမ္ဘာ

မိချောင်းတစ်ကောင်ကို
ချစ်သူလို့ အမည်ပေးလိုက်ရင်
အနမ်းတွေများပေးမလား. . .

ဒါဆိုရင်
ငရဲကို ပြင်သစ်ရေမွှေး
ကံကြမ္မာကို ဒေလီယာပန်း
ဒုက္ခကို နီကိုးလ်ကစ်ဒ်မင်းနှုတ်ခမ်း
ပြန်လည်လန်းဆန်းလာသောကမ္ဘာ
လေဘာတီအငြိမ်းနဲ့ ဧည့်ခံမယ်။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

မြစ်များ

မြစ်တစ်ခုကိုသယ်ဆောင်ရသလို
ပင်ပန်းခဲ့ပါတယ်။
ဒါဆို
အားလုံးလည်းပင်ပန်းခဲ့လိမ့်မယ်
စာနာလို့ ရပါတယ်။

ထိုမြစ်များ
ထိုအချစ်များ
စုံးစုံးနစ်အောင်
စီးရစ်ကြ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

ဘဝရုပ်ရှင်

ကြယ်သီးတပ်ထားသောသီချင်း
အမာရွတ်ရာတွေဘယ်မှာ
မမြင်သာတော့ဘူး။
ဘောင်းဘီအိတ်ထဲလက်နှိုက်
အားလုံးကိုပုခုံးတွန့်
များများသရုပ်ဆောင်ဖို့လည်း
မလိုတော့ပါဘူး။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

သတင်းစာကြော်ငြာ

အထိတ်တလန့် ထွက်ပြေးခန်းမှာ
ပန်းခင်းက ရှိနေသေးတယ်
သဲကန္တာရ
အာတိတ်ဒေသ
ဆူထစ်တောင်တန်း
ဆိုက်ပရပ်ပင်တွေနဲ့လမ်း
ပြေးလမ်းရှည်ရှည်
ဘယ်အထိများ
ထွက်ပြေးဦးမှာလဲ အချစ်ဆုံးရေ
အားလုံးစိတ်ပူနေတယ်
အမြန်ဆုံးပြန်လာပါ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

ချစ်သူသက်သက်

စိမ်းစိုသောလွင်ပြင်
မြင်းပေါ်တင်ဖို့ အစီအစဉ်
မအောင်မြင်ခဲ့သူ

လဖက်ရည်သောက်တယ်
ရုပ်ရှင်ကြည့်တယ်
ဓာတ်ပြားဖွင့်တယ်
မီးရထားစီးတယ်
ချစ်သူ့ ပန်းအိုးတွေရေလောင်းတယ်။

ကောင်းကင်ကြီးကို
မ, ကြည့်လိုက်
ဆ, ကြည့်လိုက်
တစ်ခုခုထူးမယ်လို့
ကမ္ဘာကြီးကို ချစ်တဲ့ဖက်က
အမြဲမျှော်လင့်ချက်ထားခဲ့သူ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

ဟစ်ပ်ဟော့ပ်ကဗျာ

ကွေးမြစ်ပေါ်ကတံတားမှာ
တံတားကြီးနေရာက ကျောခင်းလို့
ဗင်ဂိုးရဲ့ပန်းချီကားမှာ
ကျီးကန်းတွေနေရာကထပျံလို့
မန့်ချ်ရဲ့အော်သံမှာ
အသံနေရာကအော်ဟစ်လို့
ပင့်ဖလွိုက်ရဲ့ အယ်လ်ဘမ်မှာ
နံရံတွေနေရာကခေါင်းမော့လို့
နာဂါဆာကီနဲ့ ဟီရိုရှီးမားမှာ
အနုမြူဗုံးနှစ်လုံးနေရာက သရုပ်ဆောင်ခဲ့သူ
လူ,
သူဟာ
ကာရန်မပါသော ကဗျာတစ်ပုဒ်
(ဝါ)
သံစဉ်မလိုသောဟစ်ပ်ဟော့ပ်တစ်ပုဒ်
ကျွန်ုပ်တို့ လက်တွေအတွက်ကိုင်စရာ
မင်္ဂလာရှိပါစေသတည်း။ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

နှစ်ထောင့်တစ်ဆယ့်သုံး

အောက်တိုဘာ - ဒီဇင်ဘာ
-----------------------------

တုန်လှုပ်ဖွယ်ပါပဲ။

လောကအမြင်တွေ ပြောင်းသွားတယ်။

ကြက်သီး ဖြန်းဖြန်းထ။

"စာသိ" နဲ့ မငြိ၊
"ငါသိ" နဲ့မှ ထိတော့တယ်။

ပန်းပြတ်ခိုက်ပေမယ့်
တစ်ငုံကျန်သေးသမို့
ခေါင်းဖြီးထားပါမယ်။ ။

သီဟသူ
၁၀၊ ၁၂၊ ၂၀၁၃

ဝတ်စုံ

ပိတ်စတစ်စ
ကတ်ကြေးနဲ့ ကိုက်ချပစ်လိုက်တယ်
စက်ပေါ်တင် အပ်ချက်ပေါင်းများစွာ
စိုက်ချပစ်လိုက်တယ်။

အရောင် အသွေး
အဆင် အကွက်
အင်္ကျီဝတ်ပြီး ထွက်ခဲ့တယ်။

အသားကိုဖောက်ပြီးမှ
အပေါက်တွေထဲမှာ နေရာယူ
ချုပ်ရိုးချုပ်သား အမာရွတ်များ
အားကောင်းမောင်းသန်ချိတ်ဆက်လို့။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

အသွားနှစ်ဖက်တေးသွား

ဓားတွေကို တန်းစီထားတာ
အဲဒါ မီးဖိုခန်းပဲ။

အိမ်ရှင်မရဲ့ လက်ရာ
ဓားများ
သစ်သီးလှီးဖို့ ဓား
ငရုတ်သီးလှီးဖို့ ဓား
ဟင်းရွက်လှီးဖို့ ဓား
အသားလှီးဖို့ ဓား
ငါးလှီးဖို့ ဓား
ချိစ်နဲ့ ပေါင်မုန့်လှီးဖို့ ဓား
ဓားများ
အတို အရှည်
အကြီး အသေး
အဆင့်ဆင့် တန်းစီ
ဘင်ခရာ တပ်ဖွဲ့တစ်ဖွဲ့
ညီညာစွာ ချီတက်ခဲ့တဲ့
သူရဲကောင်း ခြေလှမ်းတွေနဲ့။

ငါတို့ စားခဲ့ကြတယ်
ဓားတွေကို စားခဲ့ကြတယ်
ကမ္ဘာမြေကို လှပစွာ သိမ်းပိုက်မယ့်
အသွားနှစ်ဖက်
ဓားထက်ထက် တေးသွားတွေနဲ့။ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

ဒဏ်ရာကျသူ

ဂွမ်းလိပ်
ပတ်တီး
တင်ချာ
နာကျင်တဲ့ဒီဇိုင်းများနဲ့
ဘာကြောင့်သင့်ကိုယ်သင်
ဖွဲ့နွဲ့ချင်ရတာလဲ?

အမြဲစိမ်းတောအုပ်တွေဟာ
ပျော်ပွဲစားထွက်ကြဖို့လား?
တစ်ယောက်နဲ့တစ်ယောက်
တိုက်ခိုက်ကြဖို့လား?

ချစ်ရေးဆိုသူမရှိပဲ
ချစ်သောအဖြေပေးခဲ့မိတာ
ငါ အရူးလား? ။ ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

ကိုယ်တို့ စကြဝဠာ

ပန်းသီးထဲတွင်ဝင်ရောက်၍
ငါပြန်လည်ပေါက်ဖွားချင်သည်။

စူပါမင်းမဖြစ်ချင်
ငြိမ်းချမ်းချင်သည်။

လမင်းကြီးပေါ်ကို
မရောက်ဖူးလို
သောကမဲ့သောလူသားများကြားတွင်
ပျော်မွေ့နေချင်သည်။

သေဆုံးသွားသောချစ်သူတွေ
ပြန်ရှင်စေချင်သည်။

ဒဏ်ရာမရဘူးသူ၏အိမ်မှ
သောက်ရေတစ်ခွက်ကိုသာရှာပါ
အရာရာပြည့်စုံပါလိမ့်မည်။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

အိပ်မက်များ (၄)

ရေကို အဆက်မပြတ် ဆာလောင်နေတာ၊
သစ်တောကြီးတွေကို မီးက လောင်ကျွမ်းသွားတာ၊
မျက်စိတစ်ဆုံး ခြောက်သယောင်း
ရင်ဘတ်ထဲအထိ ဆာဟာရ ဖြစ်ထွန်းလာတာ
မျက်စိမှိတ်လိုက်တာနဲ့ ဒါတွေပဲ မြင်မြင်နေရတာ၊
ည ည အိပ်ရမှာ စိုးထိတ်နေရတာ၊
ည ည ဒီအိပ်မက် ပြီးပါစေတာ့လို့
ဆုတောင်းရင်း
ဆက် အိပ်မက် မက်နေရတာ။ ။

သီဟသူ
၆၊ ၁၂၊ ၂၀၁၃။

အိပ်မက်များ (၃)

မဆွဲရေသေးတဲ့ ပန်းချီကားလွတ်များလို
မရိုက်ရေသေးတဲ့ ဖလင်ကွက်လွတ်များလို
မရေးဖွဲ့ရေသေးတဲ့ ကဗျာရှည်ကြီးတစ်ပုဒ်လို
မမက်ရသေးတဲ့
ငါ့ရင်ထဲက
အိပ်မက်များ။ ။

သီဟသူ
၆၊ ၁၂၊ ၂၀၁၃။

အိပ်မက်များ (၂)

ရင်ခုန်ခဲ့
ယုံကြည်ခဲ့
ရဲဝံ့ခဲ့
စွန့်စားခဲ့
ကျရှုံးခဲ့

အကြိမ်ကြိမ်။ ။

သီဟသူ
၆၊ ၁၂၊ ၂၀၁၃။

အမည်မရှိရေတံခွန်

မွှေးသော
မြင့်သော
လှသော
ရည်ရွယ်ချက်ထဲက ရေဆေးငါးကြီးတွေဟာ
အမြဲကျော့ရှင်းနေတာပဲ။

ဘယ်တုန်းကမှလည်း
မမိခဲ့ဖူးဘူး
သူတို့ကိုစိတ်ကူးထဲမှာထားရတာနဲ့ပဲ
အဲဒီ့ရေတံခွန်ဟာ
တသွင်သွင် စီးဆင်းတော့တာပဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

နာမည်ကြီးနှစ်ယောက်

မြို့က လက်ပတ်နာရီတစ်လုံးရလာလို့
တစ်ရွာလုံး ထူးဆန်းကြတဲ့တောသားဟာ
မင်းလား? ငါလား?

ကြယ်တွေကို ရေတွက်ဖူးတဲ့ အရူးတွေဆိုရင်တော့
မင်းရော၊ ငါရော။

မင်းက လေယာဉ်ပျံလုပ်တယ်
ငါက ဝယ်ပြီးဗုံးကြဲတယ်
ငါက ကြံပင်စိုက်တယ်
မင်းက ဝယ်ပြီး အရက်ချက်တယ်။

မင်းပိုက်ဆံကို ငါယူတယ်
ငါ့ပိုက်ဆံကို မင်းယူတယ်
အခုတော့ တို့နှစ်ယောက်
တစ်ယောက်ကိုတစ်ယောက်
အချစ်ကြီးချစ်မိနေကြပြီ။

လောကဓံနဲ့ကံကြမ္မာ
တို့နာမည်တွေ ဘယ်သူပေးသလဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

နှင်းဆီပန်းများနှင့် လက်ထပ်ရခြင်း

အမေ့ရင်ခွင်မှ သားငယ်
ပင်လယ်လိုပွင့်ပြီး
ကမ္ဘာကြီးအား ဆင်မြန်းခဲ့ပါပြီ။
အလင်းစများ
မွှေးရနံ့များ
အမှောင်များ
ခြေချစရာနေရာလွတ်မရှိအောင်
အောင်မြင်ခဲ့သော ဆင်းရဲခြင်းများ
မကျန်စေခဲ့ရပါဘူး။

စိမ်းမြေ့သောကမ်းခြေ
ဝေးပါစေဦး။

ချစ်တတ်တာကလွဲပြီး
ကျွန်တော့်မှာသတ္တိ
များများစားစား မရှိလှပါဘူး။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

မိုးသတ်သမား

မိုးတစ်ည၊ သေနတ်တစ်လက်
လောင်းကုတ်အင်္ကျီတစ်ထည်နဲ့
စိတ္တဇလူသတ်သမားတစ်ယောက်
ရောက်ရှိလာသော မိုးညများဟာ
ဝတ္ထုတစ်ပုဒ်ပါပဲ ။
အေးစက်နေသော ကော်ဖီတစ်ခွက်
ညှော်နံ့ထွက်နေသော ရုပ်မြင်သံကြားတစ်လုံး
၁၉၂၃ ခုနှစ်ရဲ့ တိုက်ကြီးထဲက တိုက်ခန်းတစ်ခန်း
အအေးမိနေကြသော မိသားစုတစ်စု
အပြင်ဘက်ကမိုးဟာ သဲကြီးမဲကြီး
တကယ့် လေကြီးမိုးကြီးပေါ့။

အဲဒီမိုးကိုရပ်ဖို့
ဘယ်မိုးသတ်သမားကိုများ
ငါ ငှားရပါ့မလဲ။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

ဆံပင်ဖီးသူများဇာတ်လမ်း

ကိတ်မုန့်ဟာ
ချစ်သူကို ကျွေးဖို့ပါ
ချစ်သူမျက်နှာကိုပေါက်ဖို့ မဟုတ်ပါဘူး
အစွန်းအထင်းများသောအင်္ကျီ
လူ့အရေပြားသာ ဖြစ်ပါတော့သည်။

ပြေပြစ်သော ဖျော်ဖြေမှု
ငါတို့ဇာတ်ရုံကြီးတစ်ခုလုံး
ကန့်လန့်ကာတွေ ရှိတယ်
သံပြိုင်အဆိုအဖွဲ့နဲ့ တေးဂီတဝိုင်း ပါဝင်တယ်

မြိုင်မြိုင်ဆိုင်ဆိုင် အနာတရတွေ
အားရပါးရ အရယူလိုက်ကြစမ်းပါ
အစောက လဲကျခဲ့သူအားလုံး
ဇာတ်သိမ်းသီချင်းပြီးဆုံးရင်
ကန့်လန့်ကာချ
ဖုတ်ဖတ်ခါ၊ ပြန်ထနိုင်ကြမှာပါ။

ဝမ်းနည်းပူဆွေးမှုတို့အပေါ်
ဆောင်းထားသောဦးထုပ်
အစ,က ပြန်လည်ပြုလုပ်ကြရအောင်။

သုခမိန်လှိုင်
အမည်မရှိ ရေတံခွန် (စက်တင်ဘာ ၂၀၀၃ - ဇွန် ၂၀၀၄)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။

ကမ္ဘာမြေရဲ့ ချစ်သူ

ကဗျာ။

သုခမိန်လှိုင်
CD..2 - ဂျွန်လင်နွန် မဆိုခဲ့သော သီချင်းများ  (၂၀၀၃)
ဘဏ်ဓားပြ၊ ကျော်မွှေးစာပေ၊ ပထမအကြိမ်၊ ၂၀၁၃။