> သီဟသူ [dot] blogspot [dot] com: ငါးနှစ်ကောင်၊ မြင်းတစ်ကောင်

Aug 22, 2014

ငါးနှစ်ကောင်၊ မြင်းတစ်ကောင်

ကျွန်တော့်မှာ
ငါးနှစ်ကောင်နဲ့ မြင်းတစ်ကောင် ရှိတယ်
တစ်ခုသော မိန်ရာသီမှာ
ကျွန်တော့်အမေက ကျွန်တော့်ကို မွေးပါတယ်

ပုရောဟိတ် ဆရာစံဇာဏီဘိုက
ကြာသပတေးဂြိုဟ်မှာ ငါးတစ်ကောင်နေပြီး
ပင်လယ်ထဲမှာ ငါးတစ်ကောင်နေတယ်လို့ ဟောပြောပါတယ်
ကျွန်တော်ရေးတဲ့ ရေဆေးပန်းချီကားတချို့
လူကြိုက်များခဲ့တာ အဲဒီငါးနှစ်ကောင်ကြောင့် ဖြစ်နိုင်ပါတယ်၊

တရုတ်ဗေဒင်အရ
တစ်ခုသော မြင်းနှစ်မှာ ကျွန်တော့်ကို မွေးပါတယ်
စာရေးဆရာတစ်ယောက်က
မြင်းဆိုတာ 'လဲပြီးရင် ပြန်ထနိုင်ရမယ်'လို့ ပြောပါတယ်၊

တစ်ခုသော ဒီဇင်ဘာနံနက်ခင်း
ကျွန်တော်နေထိုင်တဲ့ မြို့လေးရှိရာ
အမျိုးသမီးတစ်ဦး ရောက်လာပြီး
အင်္ဂလိပ်ခေတ်က ဗီရိုမြင်းလှည်းတစ်စီး လာဝယ်စဉ်
အမှတ်မထင် ကျွန်တော်နဲ့ ချစ်မိသွားကြတော့
သူမက 'မြင်းတစ်ကောင်ပါ အဆစ်ရတယ်'လို့
ဖွဲ့နွဲ့ပါတယ်၊

အခု သူမနဲ့ ကျွန်တော်
လမ်းခွဲခဲ့ကြတာ ကြာပါပြီ
မနှစ်က ထပ်ပြီး ကျွန်တော်
လေတစ်ခြမ်း အဖြတ်ခံရတယ်၊

အခု သူမကို ကျွန်တော်
ဆက်မချစ်နိုင်တော့ပေမယ့်
ပန်းချီကား နည်းနည်း၊ ကဗျာတချို့
ရေးလို့ ရနေပါသေးတယ်၊
ခင်ဗျား ပြောသလို
မြင်းဆိုတာ 'လဲပြီးရင် ပြန်ထနိုင်' ဖို့
လိုအပ်ပါလိမ့်မယ်။ ။

၃၀၊ ဧပြီ၊ ၂၀၀၈။

သော်ဒီဝေ
မြို့တစ်မြို့ ၊ လသုံးစင်း
ပထမအကြိမ်၊ ၂၀၁၃။
မြန်မာဧရာစာပေ