မုဒိတာညများ

ဘဝအား
၉၀ ဒီဂရီအပြည့် မတ်မတ်မရပ်နိုင်ကြသူများ
လယ်ကွင်းများအားဖြတ်၍
အသက်ရှူကျပ်ကျပ် ဘတ်စ်ကားကြီးဖြင့်
ပဲခူးမြစ်နံဘေးက
သက်တမ်းနုနု မြို့ကလေးရှိရာ
ပြန်ကြပြီ
ရေမိုးချိုး . . . ပြီးရင်
ခုနစ်နာရီ ကိုရီးယားကားကို ကြည့်မယ်
ပြီးရင် (အပျိုကြီးမညို ကြိုက်တဲ့) ဒါရိုက်တာရင်နဲ့ လွမ်းမယ်
မီးမလာရင် အဝိုင်းဘက်ထွက်
ကတ္တရာနံ့ ဂျင်နရေတာမီးစက် ညှော်နံ့တွေမပါတဲ့
လေကောင်းလေသန့် ရှူမယ်
ဆူးလေ အနော်ရထာလမ်းမှာ မရှိတဲ့
တစ်မျှော်တစ်ခေါ် ရှုခင်းများနဲ့
ဟောဒါက သန်လျင်တံတား၊ ဒါ ကျိုက်ခေါက်စေတီ
ဟိုမှာ မှုံပျပျ ရွှေတိဂုံ
လရောင် ပါးပါးလေးအောက်
ဘဝအမောတွေ ပျောက်သွားတဲ့အထိ
ရင်ခုန်ချင်ရင်လည်း ရတယ်။
မနာလို မရှိကြပါနဲ့ . . . သူတို့ဟာ
ဘဝကို သူတို့ဘာသာ ရွေးချယ်ခဲ့ကြတာ မဟုတ်ဘဲ
ဘဝက သူတို့ကို ရွေးချယ်ခဲ့ခြင်းမျှသာ
တို့လူသားတွေ တစ်နေ့တခြား
မုဒိတာအား ကောင်းနိုင်ကြပါစေ
သော်ဒီဝေ . . . ယုဇနမှာ နေသည်။

ဖက်ရှင်မဂ္ဂဇင်း၊ မေ၊ ၂၀၁၄။

သော်ဒီဝေ
မြို့တစ်မြို့ ၊ လသုံးစင်း
ပထမအကြိမ်၊ ၂၀၁၃။
မြန်မာဧရာစာပေ