ငါ့လူငယ်ဘဝကို ဖော်ပြမယ့် တီရှပ်

-၁-
ငါကြိုက်တဲ့ သေနတ်များနဲ့ နှင်းဆီပန်းများ
ဒါမှမဟုတ်
ခပ်မိုက်မိုက် စာသားနဲ့
ဒါမှမဟုတ်
'ချေ'
ဒါမှမဟုတ်
'ကတ်'
ဒါမှမဟုတ်
ပလိန်းသက်သက်

ဒါပေမဲ့
အနက်ရောင်။ ။


-၂-
 လျှော်တာများပြီး အရောင်လွင့်
စတစ်ကာလည်း သိပ်မကျန်

"နင့်အင်္ကျီက အရောင်တောင်မပေါ်၊
စုတ်တီးစုတ်ဖတ်နဲ့"

အမေက မဝတ်ဖို့ပြောလည်း
ပြန်ပြန်ဝတ်

ငါ့အတွက်တော့
ဆေးသားအပြည့်နဲ့
အနက်။ ။


-၃-
အနက်ရောင်
တီရှပ်ပေါ်
အဖြူရောင်
သင်္ဘောဆေး
ΝIИ
လိုဂို
စပရေးဖျန်း
ကိုယ်တိုင်လုပ်
တီရှပ်
ငါဝတ်ခဲ့။

ငါအိမ်ကထွက်လာတော့
အဲဒီတီရှပ်
ငါနဲ့အတူ ပါမလာခဲ့။

ဒီတစ်ခေါက်
အိမ်အပြန်
ငါ့အဖေ
အရောင်မရှိတော့တဲ့
ငါ့ ΝIИ တီရှပ်
ကိုဝတ်ပြီး ကားရေဆေးနေတာ
ငါတွေ့ခဲ့ရ။

အရောင်မရှိတော့တဲ့
ငါ့ ΝIИ တီရှပ်ဟာ

ငါ့မျက်စိထဲမှာ
ငါ့လူငယ်ဘဝ၊
ဟုန်းဟုန်းတောက်
အနက်ရောင်တွေနဲ့။ ။

သီဟသူ
၂၀၁၅၀၇၀၁