တစ်ယောက်ယောက်ကို
စောင့်နေရတာထက်စာရင်
တစ်ယောက်ယောက်ဆီ
သွားလိုက်ရတာ
ပိုအဓိပ္ပာယ်ရှိမယ်။
တစ်မနက်ခင်းလုံး
ကျလာတဲ့
စိတ်ကူးတွေကလည်း
အကျိုးအပဲ့
တစ်နေ့ခင်းလုံး
လေးလံမိသမျှကလည်း
အခေါ်အပြောမရှိ
ညနေဆိုရင်
အလွမ်းက
တောရောက် တောင်ရောက် ဖြစ်ဦးမယ်။
လက်ဖက်ရည်တစ်ခွက်နဲ့
အသက်ကို
မျှသောက်ခဲ့တဲ့
သူငယ်ချင်းတစ်ယောက်ကိုလည်း
ဒီလိုနေ့မျိုးမှ
ပိုထိခိုက်ရ
တိုက်ခတ်နေတဲ့
လေထဲ ပါသွားလိုက်တာ
အခုဆိုရင်
နွားဆေးလိပ်လေး
ဖွာေနမှာပဲ။
တစ်ရက်နောက်ကျခဲ့သော
ကိုယ့်သတင်း
ရပ်ဝေးမြေခြား
သူငယ်ချင်းများ
ကိုယ်ကျသွားတဲ့
အသားရည်က
သူတို့လက်မှာ
အသားမာတက်
ကိုယ်တင်ဆက်ခဲ့တဲ့
ဒီတစ်နှစ်လုံးမှာ
သူတို့မေတ္တာတရားက
အလွမ်းဆုံးလား
သစ်ရိပ်
တောရိပ်
အိပ်တန်းပြန်ငှက်ကလေးတောင်
သူ့စိတ်နဲ့
စွဲလောင်
ဒီမှာ
အလေအလွင့် အဖိတ်အစင်တစ်ယောက်
ငါ့ကျန်းမာရေး
မကောင်းကြောင်း
ပြောရမလား
မှတ်တယ်
သူ့မှာ
အသက်တောင်ပါမလာဘူး။
ညရောက်ရင်
အိပ်စရာတစ်နေရာရာရဖို့ရယ်
ဖတ်စရာ
စာအုပ်တစ်အုပ်ဖြစ်နေဖို့ရယ်
ရောက်တဲ့နေရာက
တစ်ယောက်ကိုတစ်ယောက်
ဆုတောင်းရမှာပဲ။
ဖြတ်သွား
ဖြတ်လာ
သရုပ်ဖော်တစ်ခုမှာလည်း
မရခဲ့သော
ဘဝတစ်ခုထည့်မွှေးမိ
ဒီတစ်နေ့လည်း
ကိုယ့်အသက်ကို
ဒီမိန်းကလေးက
ကယ်လိုက်ပြန်ပြီ။ ။
စိုင်းဝင်းမြင့်
စတိုင်သစ်၊
မေ၊ ၂၀၀၁။
