တောင်ကုန်းအဟောင်းများ

နွေ မိုး ဆောင်း ရယ်
နင် ဘယ်ပြောင်းပြောင်း
ငါတို့ ကမ္ဘာက
ရိုးရိုးသားသား ဟောင်းတဲ့အဟောင်းပါ၊
ပစ်ထားခဲ့ရင်တောင်
ဘာရှက်ဖို့ ကောင်းမှာလဲ။

လေညင်းရေ
လွမ်းဖို့ အဖော်မညှိလေနဲ့
သင်သွေးအားကောင်းရင်
ငါတို့ နှလုံးသားထဲက ဖြတ်မောင်းပါ။

အချိန်နာရီဆိုတာ
သူရဲဘောကြောင်တဲ့ စက်ဘီးတစ်စီး၊
အသစ်နဲ့ အဟောင်း ခုပဲ ဇာတ်ပေါင်းကြစို့၊
အနာဂတ်ကိုယ်တိုင် ငါတို့စွဲလမ်းမှုထဲက
အဟောင်းတစ်ခုဆိုတာ ဝန်ခံရဲ့ မဟုတ်လား။
၂၀၀၀ရဲ့အဆုံး
တောင်ကုန်းအဟောင်းများ , , ,
ဘာကိုလွမ်းအား ပိုနေသလဲ
မြေသားလှိုင်းလုံး၊ အဲဒီ့တောင်ကုန်းများအောက်
ရုန်းကန် ပွင့် ရွ စကားလုံးတို့အမြစ်တွယ် ခုံးထ၊
အရှုံးဆိုတာလည်း သဘာဝကျရင် လှပတယ်။

လေညင်းရေ
လွမ်းဖို အဖော်မညှိလေနဲ့၊
သင်သွေးအားကောင်းရင်
ငါတို့ နှလုံးသားထဲက ဖြတ်မောင်းပါ။

ရာစုနှစ်တစ်ခုရဲ့ အစွန်
သမိုင်းဦးမြို့အဝင်က ဆည်းဆာ
သူ့ကဗျာ
သွေးအား ကောင်းတုန်းပါပဲ။ ။

မောင်သိန်းဇော်
၂၀၀၀၊ ရေနံချောင်း
တောင်ကုန်းအဟောင်းများ၊ စိတ်ကူးချိုချိုစာပေ၊ ၂၀၁၃။