အခြားကဗျာဆရာတစ်ယောက်သို့

ဝမ်းနည်းဖွယ်ရာတွေတွေ့တော့
စာမျက်နှာကျော်ပြီးလှန်ခဲ့တယ်။

သူတို့ကလိုအပ်လို့
ငါတို့က မလိုအပ်လို့
ဖြစ်ခဲ့မယ်၊ ပျက်ခဲ့မယ်၊ ခြားခဲ့မယ်၊ ခံစားရမယ်
ငါတို့မှာငြင်းလို့မရ။

ငယ်ရွယ်ချင်တယ်
ငယ်ရွယ်လို့မရတော့ဘူးမဟုတ်လား။

အချစ်ရေးဆိုတာမျိုး
ရှုပ်ထွေးလို့ရနိုင်သေးလို့လား။

ဒီစာမျက်နှာမှာ ပျော်စရာတွေ
ထားခဲ့ချင်သလို
ဒီစာမျက်နှာပေါ်မှာ ငါဟာအကောင်းများများ
မထားခဲ့နိုင်ဘူးဆိုတာ
အခု၊ ဖတ်နေရပြီ
ဖတ်နေရပြီမဟုတ်လား။

လူတစ်ယောက်ဟာ လူတစ်ယောက်အကြောင်း
ငါဟာ ဒီ့ထက်ကောင်းအောင် မရေးနိုင်ပါဘူး။

ပိုကောင်းအောင်
အခြားကဗျာဆရာများ ဆက်ရေးကြပါလိမ့်မယ်။

ကောင်းပါစေ
ပိုကောင်းပါစေ။ ။

အောင်ချိမ့်

ဆေးရှူတဲ့မောင် - အောင်ချိမ့်
ပထမအကြိမ်၊ ၂၀၁၃၊ သြဂုတ်လ
စိတ်ကူးချိုချိုစာပေ