> သီဟသူ [dot] blogspot [dot] com: ဒေါက်တာခမ်းလိတ်မှ သိမယ်

Mar 23, 2014

ဒေါက်တာခမ်းလိတ်မှ သိမယ်

ကက်ဆက်ခလုတ်ကို ရှေ့ကို ရစ်တယ်
တစ်ခါ ကက်ဆက်ခလုတ်ကို
နောက်ကို ပြန်ရစ်တယ် . . .
ဒါဟာ အလုပ်ပဲ
ဒါတွေကို ဒေါက်တာခမ်းမလိတ်မှ သိမယ်
ဆဒ္ဒန်ဆင်မင်း အကြံနဲ့
ဘဝမှာ ဉာဏ်ပညာကြီးမားခဲ့ပေမယ့်
ကံနဲ့ စားရသူတွေထဲမှာ
ကိုယ်တစ်ယောက် မပါခဲ့
ငွေဆိုတာ ပိုက်ဆံနဲ့ရှာမှ ရတယ်
ဒါတွေကို
ဒေါက်တာခမ်းမလိတ်မှ သိမယ်
ပေးကား ပေး၏ မရတဲ့
မုတ်သုန်လေ မြောက်ပြန်လေတို့ထက်လည်း
အချိန်မှန်ခဲ့ရ
ထိုက်တန်တာထက်လည်း ပိုပြီး ရင်းနှီးခဲ့ရ
ဘဝရဲ့ လှည့်ကွက်တွေကြား
အနယ်ထိုင်အောင် စောင့်ခဲ့ပေမယ့်
ချယ်ရီပင်အောက် အခုချိန်ထိ
ရောက်မလာခဲ့သူ တစ်ယောက်အကြောင်းကို
ဒေါက်တာခမ်းမလိတ်မှ သိမယ်
ကက်ဆက်ခလုတ် ရှေ့ကို ရစ်တယ်
တစ်ခါ ကက်ဆက်ခလုတ် နောက်ကို ပြန်ရစ်တယ်
ဒါဟာ သီချင်းတစ်ပုဒ်ပဲ
ဒါ . . . ဒေါက်တာခမ်းမလိတ်မှ သိမယ်။

ဖက်ရှင်မဂ္ဂဇင်း၊ ဇန်နဝါရီ၊ ၂၀၁၃။

သော်ဒီဝေ
မြို့တစ်မြို့ ၊ လသုံးစင်း
ပထမအကြိမ်၊ ၂၀၁၃။
မြန်မာဧရာစာပေ။