အသက်ကယ်ခြွင်းချက်

သဗ္ဗံ
(အလုံးစုံ)
ဒုက္ခများ
ငါ မရွေးချယ်ဘဲ
ရခဲ့။

သဗ္ဗံ
(အလုံးစုံ)
အချစ်များ
ငါ ရွေးချယ်လျက်
လွဲခဲ့။

ကဗျာဆရာဘဝကတော့
ခြွင်းချက်။ ။

၁၉၉၁ ဇွန် ဟန်သစ် မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

အရက်ပုလင်းများနဲ့ကြံခင်းများ

တာရာများ
ဒဏ္ဍာရီများ
သီချင်းများ
ကင်းမြီးကောက်များ
စက်တစ်ခုရဲ့ ဝက်အူများ
နေ့ခုနစ်နေ့သင်္ကေတ တိရစ္ဆာန်များ
အရာရာ
အံချော်မှုများ
ရင်းနှီးတွေ့ဆုံရ။

အရိပ်တွေ ရှည်လျား
ညနေမီးရထားဆန်သူ တစ်ဦးရဲ့
အိပ်မက်တစ်ချို့
ပုလင်းထဲက အရက်တွေက
ကြံခင်းတစ်ခင်း ပြန်ဖြစ်ပါ့မလား။ ။

၁၉၉၁ အောက်တိုဘာ ရုပ်ရှင်တေးကဗျာ မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

သောကြာနေ့ မနက်ခင်း

များလိုက်တဲ့စကားလုံးတွေ
ကိုင်ကြည့်ပြီး
တစ်ခုမှ မကြိုက်တာနဲ့
ပြန်ချ ထားလိုက်ရတယ်
ကြာပြီဆိုတော့
ပင်န်နယ်စလင်မတိုးတော့တဲ့ စကားလုံးတွေ
လှည့်ပတ်၊ ဆက်စပ်
ကျေနပ်ဖွယ်ဖြစ်အောင် နေထိုင်ကြရတဲ့ကမ္ဘာကို
ခုတော့ ငါစိတ်ပျက်နေပုံလေ ။ ။

၁၉၉၀ ဧပြီ ရုပ်ရှင်တေးကဗျာ မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ဝိတ်မခြင်း

ငါ့ လေ့ကျင့်ခန်းက
မိုးတိမ်တွေကို မ တယ်
တီးလုံးတေးသွားချည်းသက်သက် မ တယ်
စာအုပ်တွေကို မ တယ်
ရုပ်ရှင်တွေကို မ တယ်
ပြီးတော့
ကမ္ဘာကြီးကို
ရေနဲ့ ဆွဲလိုက်
ဆီနဲ့ ဆွဲလိုက်
မ တယ်။

အမှိုက်ပုံလို
အဆင်မပြေမှုများစွာ
ကျွန်တော်ဟာ မ ရဦးမှာ မဟုတ်လား။
၁၆ နှစ်သားက
မူးမြစ်ကမ်းနဖူးမြို့ကလေးပေါ်မှာ
ကျော်တင့်
အေးဆွေ
ငယ်သူငယ်ချင်းတွေနဲ့
ဝိတ်မခဲ့တဲ့ နေ့ကလေးတွေ
လွမ်းမိတော့တယ်။ ။

၂၀၀၀ အောက်တိုဘာ ရုပ်ရှင်တေးကဗျာ မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ရွှေကြည်အေးနှစ်များ

ဟိုတုန်းက
တရုတ်လက်ဖက်ရည်ဆိုင်
ကုလားလက်ဖက်ရည်ဆိုင်
ကျိုက်ကျိုက်ဆူနေတဲ့ ရေနွေးအိုးကြီးတွေ
ရွှေကြည်အေးမှာ
( ၁၉၇၂-၃-၄-၅-၆-၇ က )
ငါ နောက်ဆုံး တွေ့ဖူးခဲ့တာပဲ။

တစ်နေ့က
ငါ့ကိုယ်ထဲမှာ တစ်လုံး
ဗြုန်းခနဲ တွေ့လိုက်တော့
ငါ ပျော်သွားတယ်။

ကမ္ဘာကြီးကို ဖျော်တိုက်ချင်တဲ့ ငါ့ကဗျာ
ရေနွေးပွက်ပွက်ဆူမှပေါ့။ ။

၂၀၀၆ ဧပြီ ရုပ်ရှင်တေးကဗျာ မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ရုပ်ရှင်

စိတ်မနိုင်သူ တစ်ဦးရဲ့
ကြည့်ရတဲ့ရုပ်ရှင်ဟာ
ချောက်ချားဖွယ်အတိ။

ဒဏ်ရာတွေဟာ
တောက်ပဝတ်စုံ
ထည်လဲဆင်လို့
အားလုံးဇာတ်လိုက်
စိတ်အိုက်တဲ့အခါ
ရုံအပြင်ပြန်ထွက်လို့လဲ မရတော့။ ။

၁၉၉၁ ဧပြီ ရုပ်ရှင်တေးကဗျာ မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

မွေးနေ့လက်ဆောင်များ

သူ့ရာသီ၊ သူ့ရပ်ဝန်းမှာ
သစ်ရွက်ကြွေတွေနဲ့
နွေရောက်ပြန်ပေါ့။

မိုးတိမ်တောင် အဆန်းတွေနဲ့
အလွမ်းတွေလဲ သယ်ခဲ့ပြီးပါပြီ။

လှည့်စားခြင်းတွေမှာ အနုပညာမြောက်လို့
အနုပညာမြောက်မှုမှာ လှည့်စားခြင်းတွေ။

ဒုက္ခတွေကိုတော့
ပြောင်ပြောင်လက်လက် စက္ကူများနဲ့ ထုပ်ပိုးပြီး
ဖဲကြိုးစည်း
ကျေနပ်စွာ ယူခဲ့ကြတာလေ။ ။

၁၉၉၇ နိုဝင်ဘာ တော်ဝင်ဂျာနယ်

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

မိုးဘွဲ့

အမှတ်တရ
သူ ကျလာပုံက
ကမ္ဘာမြေရဲ့ လွမ်းစရာတွေကိုယ်စား
မလုံတော့တဲ့ စာရိတ္တတွေနဲ့
အိမ်တံခါးတွေလုံအောင်ပိတ်ကြ
ကလေးတွေကို ငဲ့ညှာကြ
တတ်နိုင်သလောက် အမှားနည်းကြ
ဒါလောက်ပဲ ရမယ်ထင်ရဲ့။

မပြင်းထန်ရဲတော့တဲ့ မျှော်လင့်ရိပ်တွေ
ခေါင်မိုးတွေရဲ့ အော်သံအောက်မှာ တိုးတိတ်
လမ်းတွေ နစ်မြုပ်ကုန်ပြီလေ
နည်းနည်းလောက် အားထပ်ထည့်နိုင်ရင်တော့
ရှင်ပြန်ထမြောက်သူတွေလိုအပ်
အရပ်ရှစ်ခွင်မှာ
(အတွေးနယ်ချဲ့ဖို့)
သူ အစွမ်းပြပါစေတော့. . . ။ ။

၁၉၉၀ ဇူလိုင် ရုပ်ရှင်တေးကဗျာ မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

မီးရထား

ဘီတယ် သီချင်းတွေ ကိုယ်ကြိုက်ခဲ့တယ်
မင်းကို ကိုယ်ချစ်ခဲ့တယ်။

အမေရိကန်နဲ့
ဗီယက်နမ် စစ်ပွဲကြီး တကယ်ဖြစ်ခဲ့တယ်
မင်းကို ကိုယ်ချစ်ခဲ့တယ်။

မာရီလင်မွန်ရိုး
အသက်ရှင်ခြင်းကို
သူ တစ်မျိုး ရွေးချယ်ခဲ့တယ်
မင်းကို ကိုယ်ချစ်ခဲ့တယ်။

ခုတော့
(မီးလျှံများနဲ့)
၂၀၀၀ ခုနှစ် နားကပ်
ငါ့ဆံပင်တွေ ဖြတ်ခဲ့
နောက်မှာ ဘူတာရုံတွေ ကျန်ခဲ့
အဆိုး၊ အကောင်း၊ အလွမ်း
မြို့အသီးသီး ကျန်ခဲ့
ဒဏ်ရာများနဲ့သာ ယူထားရတဲ့
သံလမ်းနှစ်ကြောင်းပေါ်မှာ
ဆက်လက် ခုတ်မောင်းဆဲ
မင်းကို ကိုယ်ချစ်ဆဲလေ ....။ ။

၁၉၉၇ ဖေဖော်ဝါရီ ရုပ်ရှင်တေးကဗျာ မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

မမေ့လျော့ခြင်း

အလို....
ထူးဆန်းလိုက်တဲ့ရင်ခွင်
အလွမ်းတွေပွင့်ဝေပြီး
နိုးထလာခဲ့တယ် ။

မထူးဆန်းပါဘူး
အချစ်ရယ်
ဟောဒီကမ္ဘာကြီးမှာ
အလွမ်းတွေကလွဲ
ဘာများရှိလို့လဲ ။ ။

၁၉၉၇ မတ် မြားနတ်မောင် မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ဖောရက်စ်ဂမ့် ဇာတ်ကားမှ ပြဿနာတွေနဲ့တွေ့ရင် ရင်မဆိုင်နဲ့ ပြေးသာပြေး ကဗျာ

ရင်ဆိုင်ဖို့က
ကြိုးဝိုင်းထဲ
စိန်ခေါ်ပွဲတွေထဲ
တစ်ကမ္ဘာလုံး ဝိုင်းကြည့်နေကြမယ့်
လူမိုက်တွေရဲ့ အနိုင်ယူနည်းများထဲ ....

ပြေး၊ ပြေး
ပြေးသာပြေး
ထွက်ပြေးမှုက
ကြယ်ပွင့်တွေထံ
နိုင်ဂျီးရီးယားတောင်တန်းတွေထံ
မြို့မငြိမ်းရဲ့ "မပြီးသေးသော ပန်းချီကား" ထံ
"ကူရိုဆာဝါ" ရဲ့ "အိပ်မက်များ" ထံ
ဒဂုန်တာရာရဲ့ "နှင်းခဲပန်း" ထံ
အံ့မောင်ရဲ့ "အန်ဒါဆင် ပုံပြင်များ" ထံ
"ဟိုချီမင်း" ရဲ့ "ရေဝေစု" ထံ
ဦးသန်းထွန်းရဲ့ "ဗိုလ်တရားလေးပါး" ထံ
ဗန်းမော်တင်အောင်ရဲ့
"ကျွန်တော်ကရော ဘာများတတ်နိုင်ပါဦးမည်နည်း" ထံ
. . . . . . . . . . . . . . . . . . . . . . . . . . . . . . . . . . . . . . . ။ ။

၁၉၉၅ စက်တင်ဘာ ရနံ့သစ် မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ပို့စ်ကဒ်

ငှက်ကလေးသုံးကောင်
စာအိတ်ထဲ လှောင်ပို့လိုက်တယ် ။

စာအိတ်ကိုဖွင့်
ဟင်းလင်းပွင့်သွားရင်လဲ
ငှက်ကလေးတွေခမျာ
ပျံနိုင်မှာမဟုတ်
သူတို့ဟာ အရုပ်တွေပဲ ။ ။

၁၉၉၆ ဖေဖော်ဝါရီ ပန်းဝေသီ မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ပင်လယ်

လမင်းလိုပဲ
ငါမအိပ်တဲ့ညက
ပင်လယ်လိုပဲ စီးခဲ့တယ် ။

သြော် . . . . အရှိန်အဟုန်လား
ကမ္ဘာမြေထုပေါ်က
ပြဿနာပေါင်းစုံရဲ့
အဆအတိုင်းပါ ။ ။

၁၉၉၁ ဇန်နဝါရီ ကမ်းလွန်လေ ကဗျာ မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ပုစွန်တွေဖတ်ဖို့ ကဗျာ

ပုစွန်ကြော်ကို ဝါးနေရင်း
ရေမှာပျော်တဲ့ သူ့အချိန်လေးတွေ မြင်ယောင်
သွားနဲ့လျှာတစ်လျှောက် အရသာပေါ်
တုန်လှုပ်မှုတွေရောက် ။

သြော် .... လောကအနက်ထဲ ထောက်မမီ
ငါ့အတွေးတွေလဲ
တော်တော်တိမ် ထင်ရဲ့ ။

ဒါဆို
ပုစွန်တွေ ပျော်ရွှင်
ကူးခတ်ခဲ့ခြင်းလှော်တက်များ
စနစ်တကျ ကိုက်ဖြတ်ရန်
သွားတွေရှိရာကိုပေါ့ ... ။ ။

၁၉၉၃ ဇူလိုင် ပင်လယ်မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

တနင်္ဂနွေ ဂဠုန်

တိမ်တွေရဲ့ ရောင်စုံ
အကျဉ်းလှောင်အိမ်မှာ
ငါ အကြိမ်ကြိမ် ကျ ။

ပျံသန်းခြင်းမှာ
ဒဏ်ရာများစွာ ။
စကြဝဠာကို မထိုးဖောက်နိုင်ခင်
သီချင်းတွေပေါ်မှာ အိပ်တန်းဝင် ။

နှုတ်သီးဒေါသ
လက်သည်းအတ္တ
ခြေသည်းမာန
တောင်ပံတစ်စုံသာ
အနုပညာ ။

လိုရာရောက် မပျံသန်းနိုင်လျှင်
ဂဠုန် သေဖွယ်ရာပင် ။ ။

၁၉၉၀ ဒီဇင်ဘာ ရုပ်ရှင်တေးကဗျာမဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ဆိပ်ကမ်း

ပင်လယ်တစ်ခုလုံး
လှိုင်းတွေ မရှိ
စံပယ်ပန်းတွေ အပြည့် ။

သက်တန့်လှေက
ကမ္ဘာ့ ရေမြေတောတောင်မကျန်
ချစ်ခြင်းမေတ္တာကို တင်ဆောင် ။

ဆိပ်ကမ်းမှာတော့
အမုန်း မရှိ
စစ်ပွဲ မရှိ
တရားရပြီးမှ
ထပ်မံ ငြင်းခုံစရာ
တရားမရှိ ။ ။

၁၉၉၅ စက်တင်ဘာ ပန်းဝေသီ မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ဆေးရောင်စုံဂြိုဟ်ပြာ၏ အမှားတစ်ယောက်

လူတွေက ငါးမန်းတွေကို စားခွင့်ရှိ
ငါးမန်းတွေက လူတွေကို စားခွင့်မရှိ
လှသလောက် မလှခဲ့သောကမ္ဘာ
အမှားအယွင်းများသည် အင်္ဂါဂြိုဟ်မှာ
ဒုံးပျံအဖြစ် ဆိုက်ရောက်၏ ။

ကောင်းကင်ကြီးနဲ့ ညတွေ
ပျင်းအမနေဖို့
ကြယ်တွေကို ထည့်သွင်းပေးထားခဲ့
ဒါနဲ့ပဲ အလွမ်းအဆွေးတွေကျောက်ချ
စိတ်ကူးယဉ်ခွင်း ရတော့၏ ။

ဒါနဲ့ပဲ
ငါးမန်းစာ ချမကျွေးရဲသူရဲ့ကဗျာ
ဖြစ်ပေါ်လာခဲ့၏ ။ ။

၂၀၀၁ နိုဝင်ဘာ IDEA မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ဆေးမင်ကြောင်

တစ်ခါတုန်းက
လက်မှာ အရုပ်တွေနဲ့ သူငယ်ချင်းတစ်စု
ကမ္ဘာကြီးကို
လက်ဖျံမှာထိုးပြီး
ခရီးသွားခဲ့ကြတယ် ။

အနှစ် နှစ်ဆယ်အကြာ
နှစ်ယောက် သေ
သုံးယောက် ကျန်
ရှင်သန် - ၁
လဲကျ - ၁
ပျံသန်း - ၁ ။

နောက်ဆုံးကျမှ
ကမ္ဘာကြီးရဲ့ကိုယ်ပေါ်က
ဆေးမင်ကြောင်ရုပ်တွေဟာ
ငါတို့မှန်း
သိခဲ့ရ ။ ။

၁၉၉၃ သြဂုတ် ရှေ့ပြေး မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ငါးဆယ်ခရီး

ဝရန်တာမှာ
စိမ်းရွက်တွေကြား
အနီစ များ
မိုးကို ခေါင်းမော့ပွင့်နေကြ။

မိုးရွာလိုရွာ
နေပူလိုပူ
မုန်တိုင်းဖြစ်လိုဖြစ်
မိုးလေဝသ စစ်ပွဲထဲမှာ
သူတို့ခေါင်းဟာခိုင်တော့
သူတို့အပွင့်တွေဟာလဲ မြိုင်မြိုင်ဆိုင်ဆိုင် ရှိပေရဲ့
ဒါနဲ့ ကျွန်တော် သူတို့ရှိရာတက်သွား
(ခူးဆွတ်ဖွယ်ရာများကိုလွမ်းဆွတ်)
ခရီးတွေကို ဆာလောင်မိပြန်ပေါ့။ ။

၁၉၉၇ နိုဝင်ဘာ ရွှေဝတ်ရည် မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်

ချစ်သူ

တို့ အိမ်ခေါင်မိုးတွေအပေါ်
ဆေးရောင်စုံတောင်တန်းများ
လှည့်စားတဲ့ညနေ ။

"ရေ" လို့ ငါမှားခဲ့တဲ့ "မီး"
သင်္ကေတတွေနဲ့ကမ္ဘာ
အရာရာစိတ်လျှော့ဖို့ပြုပြင်ရ ။

သိခဲ့ပါပြီလေ
ရက်စက်ခြင်းမှာ ခေါင်းထိုးယူတဲ့
ငါ့ဘောလုံးဟာ
စွန့်စားခြင်းမကြီးမား
ငါ့ မနေနိုင်မှု တစ်ခုသာ ။ ။

၁၉၉၁ ဇွန် ရွှေဝတ်ရည် မဂ္ဂဇင်း

သုခမိန်လှိုင်
ပုစွန်တွေဖတ်ဖို့ကဗျာ
ပထမအကြိမ်၊ ၂၀၁၂၊ မတ်လ
အညာသား ယဉ်ကျေးမှု စာစဉ်