လူငယ်တစ်ယောက်အကြောင်း - ၁၅

ကြားပါစေသား

သီချင်းအဆိုသန်တဲ့အရွယ်
အံဆွဲထဲက အတင်းခုန်ထွက်လာတယ်။
ကျွန်တော်တို့တွေဟာ တစ်ခါတစ်ခါ ဘီယာ
တစ်ခါတစ်ခါ ရုပ်ရှင်
ဆူးလေလမ်း၊ ဂလုပ်ရုံ
ဗိုလ်ချုပ်လမ်း၊ မီးရထားရုံးရှေ့ ရွိုင်ရယ်၊ ကာလ်တန်ရုံ
ဗိုလ်ချုပ်လမ်းနဲ့ ၃၃ လမ်းထောင့် အိပ်ဇယ်စီယာရုံ
အဲဒီမှာ နိုင်ငံခြား ကားကောင်းတွေ ပြပါတယ်
ကျွန်တော်တို့တွေ ကားကောင်းတိုင်း ကြည့်ဖြစ်ကြပါတယ်။

ဖော်ဝေးဟာ
နံနက်စာ စားပြီး ပိုတဲ့ ပိုက်ဆံကို
အင်းဝတိုက်က နိုင်ငံခြားကဗျာစာအုပ်တစ်အုပ်ဝယ်
ဝါဇီလက်ဖက်ရည်နဲ့ မြည်းလေ့ရှိပါတယ်။

ကျွန်တော်တို့ တစ်ယောက်ကို တစ်ယောက် ချစ်ခင်
တစ်ယောက်ကို တစ်ယောက် အနစ်နာခံ
ရန်ဖြစ်လည်း အတူတူဖြစ်
တစ်ယောက်ပိုက်ဆံ တစ်ယောက်မျှသုံး
လူ့ဘဝမှာ အဲဒီအနေအထားမျိုးနဲ့
အမှောင်ခေတ်မှာ လူဖြစ်ခဲ့ကြပါတယ်။

အဲဒီတုန်းမှာ
ကိုလေးအောင် ဆုံးပါတယ်
(ကျွန်တော်တို့၏ နောင်တော် ကဗျာဆရာ မောင်လေးအောင်)
နောက် ပန်းချီရွှေမောင်မောင်
(ကျော်ကြားတဲ့ ခရမ်းပြာ အဆောင်ကို ရောက်ခါစမှာပဲ ဆုံးပါတယ်)
နောက် ဖော်ဝေး
ကျွန်တော်တို့ရဲ့ ဖော်ဝေး ဆုံးပါတယ်
(ကျွန်တော်တို့တွေ လောကဓံ၏ အရှိုက်အထိုး ခံရခြင်းပါပဲ)
အဲသလိုနဲ့ ကျွန်တော်တို့ နှစ်များ
အဆုံးအရှုံးများတဲ့ နှစ်များ။

ကျွန်တော်တို့ရဲ့ နှစ်များ
ကျွန်တော်တို့ရဲ့ နှစ်များ
ခင်ဗျား ကြားပါစေသား။ ။

အောင်ချိမ့်

လူငယ်တစ်ယောက်အကြောင်း - အောင်ချိမ့်
ပထမအကြိမ်၊ ၂၀၁၂ ခုနှစ်၊ သြဂုတ်လ
Majestic စာပေ