> သီဟသူ [dot] blogspot [dot] com: လူငယ်တစ်ယောက်အကြောင်း - ၁၃

Feb 5, 2014

လူငယ်တစ်ယောက်အကြောင်း - ၁၃

အိပ်ကပ်ထဲ ပိုက်ဆံမပါသူများ

သီချင်းအဆိုသန်တဲ့အရွယ်
အံဆွဲထဲက အတင်းခုန်ထွက်လာတယ်။
ဖြစ်ချိန်တန် ဖြစ်ပြီး
ပျက်ချိန်တန် ပျက်ခဲ့ပါတယ်။

မိုးဝေမှ
တောင်ညွန့် ၁၀၁ လမ်းမှ
ကျွန်တော်တို့ ဝမ်းနည်းစွာ
ထွက်တော်မူ နန်းက ခွာခဲ့ပါတယ်။
လမ်းပေါ်၊ ပလက်ဖောင်းပေါ်
ရောက်သွားခဲ့ပါတယ်။
၃၃ လမ်းထိပ်၊ ခရေပင်အောက်
စုရပ်လုပ်ရာက
ရွှေကြည်အေး လက်ဖက်ရည်ဆိုင်
ထိပ်ဆုံးစားပွဲကို
မျက်စိကျပြီး နေရာယူခဲ့ပါတယ်။

(သုခမိန်လှိုင်၊ ဖော်ဝေး၊ သခွပ်နီ
ကျွန်တော် စသဖြင့် စသဖြင့်
(ရွှေကြည်အေးမှာ တရုတ်ကျောက်စားပွဲကြီး ရှိပါတယ်၊
အံအဆင့်ဆင့် ရေနွေးအိုးကြီးလည်း ရှိပါတယ်)
နံနက် ၉ နာရီများမှာတော့
ပန်းဆိုးတန်း 'ကိုလှချို' ဆိုင်မှာ
အိတ်ကပ်ထြ ပိုက်ဆံမပါဘဲ ထိုင်ကြပါတယ်
(ကျွန်တော်တို့ ရွေ့လျား ရုံးခန်းပေါ့၊ စက်မှုတက္ကသိုလ်က
ကိုသန်းလင်း (ဘုန်းနွယ်လင်း) ပါခဲ့တယ်)

ဆံပင်ရှည်ကြီးတွေ လက်ဖြင့်သပ်၍ သပ်၍
အားဖြည့်ခဲ့ကြတာပေါ့။
Note Book ကိုယ်စီနဲ့
ရေးကြခြစ်ကြတာပေါ့။
တစ်ယောက်နဲ့ တစ်ယောက် ပေးဖတ်
အထပ်ထပ် မီးတင်ကြတာပေါ့။
ဘယ်မဂ္ဂဇင်းကမှ လက်ခံမှာ မဟုတ်တဲ့ ကဗျာ
မော်ဒန်ထက်သန် ကဗျာတွေနဲ့ (အခုတော့ 'ခေတ်ပေါ်ကဗျာ' ခေါ်တာပေါ့လေ)
ပျော်ပျော်ရွှင်ရွှင် (ငွေမရှိဘဲ) တရွရွ
လှုပ်ရှားခဲ့ကြပုံ (ဘယ်က ရမှန်းမသိ သတ္တိ)
ယခုအခါ
ပြန်လည် အားကျမိပါသေး။ ။

အောင်ချိမ့်

လူငယ်တစ်ယောက်အကြောင်း - အောင်ချိမ့်
ပထမအကြိမ်၊ ၂၀၁၂ ခုနှစ်၊ သြဂုတ်လ
Majestic စာပေ