> သီဟသူ [dot] blogspot [dot] com: လူငယ်တစ်ယောက်အကြောင်း - ၉

Feb 1, 2014

လူငယ်တစ်ယောက်အကြောင်း - ၉

ပါရီလို ရင်ခုန်တက်ကြွ

သီချင်းအဆိုသန်တဲ့အရွယ်
အံဆွဲထဲက အတင်းခုန်ထွက်လာတယ်။
ထိုနေ့မှာ တစ်လတစ်ခါ ကျွန်တော် မြို့ထဲထွက်
ထိုနေ့မှာ စာမူ လည်ပို့သောနေ့ ဖြစ်ပါတယ်။
ထိုနေ့မှာ စာမူပို့ရန်
ထိုနေ့မှာ စာအုပ်တန်း မွှေရန်
ထိုနေ့မှာ လူရောင်စုံ ငေးရန်
ထိုနေ့မှာ ကျွန်တော့် အလုပ်တစ်ခု ဖြစ်ပါတယ်။
ထိုနေ့မှာ (ဒိန်ချဉ်၊ ပါပလာလေး သင်းသင်းနဲ့) ချစ်တီး သက်သတ်လွတ်ထမင်း
စားပါတယ်
ထိုနေ့မှာ ပန်းဆိုးတန်း၊ ၃၃ လမ်း စာအုပ်တန်း လျှောက်ပါတယ်
ထိုနေ့မှာ ရွှေကြည်အေး၊ ပွင်းဦး လက်ဖက်ရည်သောက် ထိုင်ပါတယ်
ထိုနေ့မှာ မိုးဝေ၊ ရုပ်ရှင်ပဒေသာ၊ ရုပ်ရှင်မျက်မှန်၊ သွေးသောက်၊ ရှုမဝ
မဂ္ဂဇင်းတိုက်တွေ ရောက်ပါတယ်။
ပန်းချီ ညိုလှနဲ့ ထိုနေ့မှာ
ပန်းချီ ဝသုန်နဲ့ ထိုနေ့မှာ (ဝသုန်က ငယ်သူငယ်ချင်း အခုမှပြန်တွေ့)
ကာတွန်း သော်ကနဲ့ ထိုနေ့မှာ
မောင်သင်းခိုင် (ပျဉ်းမနား) နဲ့ ထိုနေ့မှာ
ကျွန်တော် ဒိုင်ယာရီရေးဖြစ်တဲ့ ထိုနေ့မှာ။
ထိုနေ့မှာ မိုးကောင်းကာင်ဟာ ပြာချင်ပြာ ဖြူချင်ဖြူ
ထိုနေ့မှာ ရာသီဥတုဟာ မိုးမည်းချင်မည်း နေပူချင်ပူ
ထိုနေ့မှာ လှလှ မလှလှ
ထိုနေ့မှာ ရန်ကုန်မြို့ကြီးကို ကျွန်တော်ဟာ ပါရီလို ရင်ခုန်တက်ကြွ။ ။

အောင်ချိမ့်

လူငယ်တစ်ယောက်အကြောင်း - အောင်ချိမ့်
ပထမအကြိမ်၊ ၂၀၁၂ ခုနှစ်၊ သြဂုတ်လ
Majestic စာပေ