> သီဟသူ [dot] blogspot [dot] com: လူငယ်တစ်ယောက်အကြောင်း - ၆

Jan 29, 2014

လူငယ်တစ်ယောက်အကြောင်း - ၆

ဓာတ်ပုံတွေလို

သီချင်းအဆိုသန်တဲ့အရွယ်
အံဆွဲထဲက အတင်းခုန်ထွက်လာတယ်။

အမေက ကျွန်တော်ဝတ်လာတဲ့ အင်္ကျီလုံချည်
ပြန်ပါလာတဲ့ အဝတ်အစားများ အကုန်
ဒန်ဇလုံကြီးထဲ ထည့်ပြီး
ပြုတ်လျှော်ပစ်ပါတယ်။

ကျွန်တော့်ကို ရေချိုးစေပါတယ်။
ခေါင်းလျှော်စေပါတယ်။

ညီနဲ့ညီမက
ဝမ်းသာမျက်ရည် ကျသတဲ့။
(ယခုအခါ တစ်နှစ်တစ်ခါတောင် မတွေ့ကြပါ)

အဖေက သူ နေနေကျအတိုင်း
ထောင့်လေးတစ်ခုမှာ ကုပ်ပြီး ထိုင်နေပါတယ်။
(လက်ကြား ဆေးပြင်းလိပ် ညှပ်လျက် ငြိမ်လျက်)

အစ်မက ပျာပျာ ပျာပျာ
စားစရာ တစ်ခုပြီး တစ်ခု လုပ်တယ်။
(အခု အဲဒီအစ်မက မှတ်ဉာဏ်ချွတ်ယွင်းနေရှာတယ်)

ကျွန်တော့်မှာ စိတ်လှုပ်ရှားမှု တလှပ်လှပ်
အရာရာကို တလှပ်လှပ်
ဓာတ်ပုံစာအုပ်ကို ပြန်ထုတ်ကြည့်သလို
ဓာတ်ပုံတွေလိုပါပဲ။

(ဘဝဆိုတာ အရင်က အရာတွေ၊ အဖြစ်အပျက်တွေ၊ နေ့ရက်တွေကို
အဲသလို အဲသလို ဓာတ်ပုံတွေလို ပြန်ပြန် ထုတ်ကြည့်လို့ရသေးတာ ကံကောင်းတာပဲ)
'အပျော်ဆုံး နေ့တစ်နေ့' ဆိုတာလည်း ဖြစ်နိုင်ပါတယ်
လောကထဲ ပြန်ရှင်ရတာမျိုး မဟုတ်လား။

အဲဒီ တစ်ရက်လို နှစ်ရက်လို ရက်များဟာ
လကလည်း ပိုသာ
နေကလည်း ပိုလင်း
အဓိပ္ပာယ်များ၊ ချစ်ခင်မှုများ၊ မိသားစုများ လင်းလင်းချင်းချင်း
(ကျန်သော မိသားစုများသို့လည်း စိတ်က ရောက်ပါတယ်)။ ။

အောင်ချိမ့်

လူငယ်တစ်ယောက်အကြောင်း - အောင်ချိမ့်
ပထမအကြိမ်၊ ၂၀၁၂ ခုနှစ်၊ သြဂုတ်လ
Majestic စာပေ